Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ma ngale 'o pipi gee niomau niakisiriwo 'o nyawa yongaku-ngaku, ngoi toga'asoko niamoteke 'isoka gee tosidemo-demokau 'o Galatiaka ma jamati 'isinoimika.

² 'O 'Ahadi ma wange 'isinoi-noimi, ngini salingou niatingaka 'o pipi, moi-moi moteke kokia naga nimadamake. Niadaotika ma pipi ge'ena sigado toboa, la ma 'orasi ge'ena koiparaluuwau niolomu.

³ Dua nako ngoi to-totarikau, ngoi 'asa takisuloko 'o nyawa-nyawa gee ngini niamaoku 'idadioka. Ngoi 'asa tokula 'onaka 'o pipi gee 'o jamati niakisiriwo-riwo ge'ena de ma suratioka, la 'ona ya'asa 'o Yerusalemuka.

⁴ De nako niamakeku yaowa ngoi mita totagi de de 'ona, ge'ena ngoi mita 'asa totagi.

⁵ Ngoi 'asa taika nginika ma 'isira 'o Makedoniakasi totagi, sababu ngoi 'ai singinaka ge'enaka taboa.

⁶ Poilia ngoi dua 'idadi tomanoa tai-taiti de de ngini, poilia ma do'ingo 'o 'alo ma 'orasi. Ge'enaka de ngini 'idadi niriwo ngoi ma ngale tosigila 'ai do-dagi 'o ngii 'iregukali.

⁷ Ngoi tooluku taika nginika duga katotuluka. Nako ma Jou wosidabi, ngoi tomau tomanoa de de ngini ma eta 'o do'ingo.

⁸ Ngoi tomanoa ne'ena 'o Efesus ma kotaka, sigado ma 'orasi 'o Yahudioka manga gutuku ma ngodomo gee yosironga 'o Pentakosta ma Wange.

⁹ Sababu ne'enaka dau ge'ena kaidadi tadiai 'o manarama de ma fa-faedaa, ngaro naga manga gudai yakatatoko.

¹⁰ Nako 'o Timotius woboa, tanu winidawongo niosidi-diai la 'una 'idadi womanoa nginioka de kowododatowa, sababu 'una mita womanarama ma ngale ma Jou wi manarama 'isoka ngoioli.

¹¹ 'Uwa sigado naga munuka kowibaragunawa. Ma tanu winiriwo la 'una 'idadi 'awi do-dagi wosigila wolio ngoino kawosa-sanangi, sababu ngoi de mita nanga 'esa moi 'iregu-regu miodamaa 'awi bo-boa.

¹² Nanga 'esa moi 'o Apolos, ma muruou naga towibaja 'ato 'una de nanga 'esa moi 'iregu-regu yaika nginika. Ma 'una wamaoku koyadaenuawasi ka kone'ena de wotagi. Ma nako dua de wi 'orasioka, 'una 'asa woboa.

¹³ Ngini salingou niomasitiari de nia ngo-ngaku 'uwa 'igiwi 'ania 'ahu ma sigoronaka. Salingou niomo-moroini niomanarama de nimakua-kuata.

¹⁴ 'Iodumu gee niadi-diai, ge'ena salingou niodiai de 'o dora.

¹⁵ Ngini ma rai niakinakokau 'o Stefanus de 'awi woa ma dodaku, 'ona 'isira yongaku ma Kristusika 'o Akhaya ma daeraaka. 'Ona yosidemogaroku yomanarama ma ngale yakileleani ma Jo'oungu ma Dutu 'awi 'umati.

¹⁶ Ngoi toga'asoko tosidemogaroku la ngini niakidomoteke 'ona, de 'o nyawa-nyawa gee yomasida-damanarama de yomasideleleani.

¹⁷ Ngoi tomorene 'o Stefanus de 'o Fortunatus de 'o Akhaikus manga bo-boa. 'Ona ge'ena 'isoka to ngini nia dagali ma ngale ngini koni'iwa ma 'ona posironga 'iriwoka.

¹⁸ 'Ona yadiaiokau 'ai singina 'imorene, 'isoka yodiaiokau nginikali. 'O nyawa-nyawa koge'ena, ge'ena salingou niakibaraguna.

¹⁹ 'O sagala jamati 'o Asiaka manga tabea yosidingoto nginika. 'O Akwila de ngo Priskila de 'o jamati gee yomalomu-lomuno to 'ona manga woaka mita manga tabea yosidingoto de manga singina ma gou-goungu.

²⁰ Nanga 'esa moi nongoka dau yoodumu manga tabea yosidingoto nginika. Nimakatabea moi de moi de nimasikamara'ai 'isoka 'o 'esa moi ma ngale ka 'o ngo-ngaku moi.

²¹ Ngoi taganapu ne'enaka, 'o tabea gee ngoi ma sirete tolefo: Ngoi 'o Paulus, tinitabea!

²² 'O nyawa gee kowidorawa ma Jou, madaka la 'o gorosau yamake! Maranata, ngone tanu, "Mia Jou tanu noboa!"

²³ Tanu ma Jou Yesus winikula 'o co-catu nginika 'Esa moi.

²⁴ Tinidora ngini 'Esa moi nioodumu gee nimarimoi de ma Kristus Yesus. Ngoi 'o Paulus, tinitabea!

1 Korintus

Video 1 Korintus 16

Ikuti Kami:

KONTAK | PARTISIPASI | DONASI