Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ 'Esa moi riaka dodoto gee nanga Dea ma Jo'oungu ma Dutu wini'asokokau. 'Una posironga winisibosonoka de winijaga la nisilaha ma ngekomo ma Yesus Kristus. Ngoi ne'ena 'o Yudas 'o Yakobus ma dodoto, ma Yesus Kristus 'awi yongosi.

² Toga'asoko la 'o simara'ai, 'o singina ma sanangi, de 'o dora ma Jo'oungu ma Dutuno kaidogo-dogo naga nginika.

³ 'Esa moi riaka dodoto tinisiboso-bosono! Ngoi tosidemogaroku totulisi 'o surati nginika ma dumutu ge'ena la 'o laha gee ngone poodumu pamakekau. Ma ne'ena ngoi tomamaoku salingou tinidongose ma ngale nia singina tosikuata de ma surati ne'ena la tatapu nimariwo niapaliara 'o do-dotoko 'iti-tiai gee ma Jo'oungu ma Dutu wokulakau 'awi kawasaka ka ma moi ma ngale kaisi'ado-'adonikau.

⁴ Sababu ngone kopomanakowa 'ena naga 'o nyawa gee manga gokoie de manga gogeruku 'ito-torou yowosanginou ngoneka kayoma'iu-'iunu. 'Ona ge'ena yapu-pulutu 'o do-dotoko ma ngale ma Jo'oungu ma Dutu 'awi dora ngoneno. 'Ona yongose 'ato ma Jo'oungu ma Dutu 'awi dora 'iamoko ngoneno so kaidadi padiai moteke ka to ngone nanga mau de ngaro posisupu nanga nyafisuu ma dorou ma. De 'ona koyongakuwa 'ato ma Yesus Kristus, 'unau wopa-pareta gee to ngone nanga Jou. To 'ona manga hukumani ka ma sirasi 'isidemokau 'o Buku 'Itebi-tebinoka.

⁵ Ge'ena 'iodumu ngini nianakokau. Ma ngoi tomau tinisingano-nganono ma ngale kokia ma Jou wakisipidili 'o Israel ma nyawa gee yogilaongika 'o Mesir ma tonaoka, ma ge'enaka de wakibinasa ma Israel ma nyawa gee koyongaku-ngakuwa.

⁶ Niongano-nganono mita 'o mala'ekati gee ma pareta ma batingi yaparene so ma rai yamada to 'ena ma ngii. Ma Jo'oungu ma Dutu wakokipusuika de 'o bu-busuku gee koitoa-toakuawau dau 'o ngii 'itaru-tarusoka. 'Ena ge'enaka dau sigado ma hukumani yamake gee dua 'o dunia ma do-dogumoka.

⁷ Niongano-nganono mita 'o Sodom de 'o Gomora ma kota, de mita ge'ena ma date-dateoka, gee ma nyawa-nyawa ge'enaka dau yodiai 'isoka 'o mala'ekati gee ma Jo'oungu ma Dutu wapusu-pusuku. 'Ona yakika'angara de yomakapake ka 'o nauru de 'o nauru bolo ka 'o ngeweka de 'o ngeweka so yakisikisaa de 'o 'uku gee koisonge-songenuawau ma ngale 'imadadi 'o nyawa 'iodumu yakisingano-nganono.

⁸ Koge'enali mita 'o guru-guru ma ngeluku go'ona manga singinaka doka ka 'okia sonaa 'imedi-mediri sigado yosowono to 'ona ma sirete manga roesika. 'Ona koyosikiamoiwa ma Jo'oungu ma Dutu 'awi pareta, de yositi-tingoono 'o sagala mala'ekati gee ma Jo'oungu ma Dutu wosidadi-dadiku 'isure-sure daku 'o sorogaaka.

⁹ 'O Mikhael ma sirete ge'ena la 'o sagala mala'ekati ma balusu, ma koma'iwa koge'ena 'idiai. Gedagee 'imakalawani de 'o Tokata ma Koana ma sababu 'imakaributu ma ngale nago'ona dua 'isira yamake 'o Musa wi maieti. 'O Mikhael koimoroinuwa 'o Tokata ma Koanika yahukumu de 'o demo-demo 'isiti-tingoono, 'ena duga kaingose, "Ma Jou 'asa wonidorofu!"

¹⁰ Ma de 'o siti-tingoonou ge'ena, 'o guru-guru ma ngeluku go'ona yalawani 'o sagala moi-moi gee 'ona koyasahe-sahewa. 'Ona 'isoka 'o haewani ma 'akali koi'iwaka gee 'isikanako 'okia sonaa ka de to 'ena ma mau. Ma de bege'enau ma sababu so 'ona kayotorouoka.

¹¹ Yotorouoka 'ona! 'Ona yamotekokau 'isoka 'o Kain wadi-diai. De yakarana ka 'o pipi yamake so yosikaika gee 'isowo-sowonika 'isoka 'o Bileam. De yotorouoka sababu yomalawani 'isoka 'o Korah.

¹² 'Onau ge'ena yajarangahe 'o Ngodomo 'Itebi-tebinoka; 'ona kayakitopokana de manga mahe koi'iwaka, de ka 'ona yomasimututa.

¹³ 'Isoka 'o moku-moku 'ikua-kuata ma 'abo 'isibaoro, koge'enali mita 'ona yosibaoro 'o manarama poda-damaeke. 'Ona 'isoka 'o ngoma 'o diwangoka gee yasowono to 'ena ma ngekomo ma gou-goungu, so ma Jo'oungu ma Dutu wadua-duangou to 'ona ma hukumani 'o darusu 'ifo-foloioka kaisi'ado-'adonikau.

¹⁴ 'O Henokh 'awi 'asali 'o Adamino 'o lape tumudiingukou, ma sirasi wosidemokau ma ngale 'o nyawa go'ona. 'Una wongose 'ato, "Niamake ma Jou woboa de 'awi mala'ekati 'itebi-tebini yocaanoka,

¹⁵ ma ngale wakihakimi 'o nyawa 'iodumu. Ma Jo'oungu ma Dutu wakihukumu 'o nyawa yoti-tingkai sababu manga di-diai 'itorou, de mita wakihukumu 'o nyawa yosowo-sowono de gee koyongaku-ngakuwau, sababu manga demo-demoka yositi-tingoono ma Jouka."

¹⁶ 'Ona kayokurubungou yomariwo de yakisisala 'o nyawa 'iregu. 'Ona yo'ahu moteke ka to 'ona manga mau 'ito-torou. 'Ona yobicara kayosiso-somoa de yomatiingi ma ngale 'o singina yo'ese la yakipoata.

¹⁷ Duga 'Esa moi riaka dodoto gee tinisiboso-bosono, salingou niongano-nganono 'okia naga gee ma sirasi ma Yesus Kristus to ngone nanga Jou 'awi su-suloko yosidemokau.

¹⁸ 'Ona yosidemokau nginika 'ato, dua gee 'o dunia ma do-dogumu 'isoriokau de yoboa 'o nyawa-nyawa gee yositi-tingoono nginika, ge'ena la 'o nyawa gee yo'ahu moteke ka to 'ona manga mau 'ito-torou.

¹⁹ 'Onau ge'ena 'o kadi-dingaka yodi-diai, 'onaka 'o Ngomasa 'Itebi-tebini koi'iwa, so ka 'o dunia ma mau-mau yakiparetano.

²⁰ Ma ngini 'Esa moi riaka dodoto tinisiboso-bosono, tatapu niapaliara nia 'ahu moteke nia ngo-ngaku ma Yesus Kristusika; 'ania ngo-ngaku ge'ena 'itebini ma sala. De nimalahidoa de ma Jo'oungu ma Dutu 'awi Ngomasa ma guata.

²¹ De ngini nio'ahu ka ma Jo'oungu ma Dutu 'awi dora ma sigoronaka, 'ena ngini niodadanu ma Yesus Kristus to ngone nanga Jou 'awi simara'ai, gee dua nikula 'o 'ahu kaisi'ado-'adonika.

²² Niakisimara'ai 'o nyawa gee manga singina 'ikapula-pula.

²³ De niakiriwo niakisipidili 'o nyawa gee matero ka 'o 'ukuoka. De 'o nyawa 'iregukali salingou niakisimara'ai de nimasitiari de ma goungu la 'uwa nidomoteke to 'ona manga sowono. Salingou niodu'uduku to 'ona manga sowono matero ka manga baju gee yamedirokau de to 'ona manga nyafisuu ma dorou.

²⁴ Ma Jo'oungu ma Dutu gee wa'akunu winijaga la 'uwa niootaka 'o dorouku, de wa'akunu wini'asa 'awi bionika gee 'iku-kumati ma sala de nia sala koi'iwa so kaniomore-morene,

²⁵ 'unau ge'ena ma Jo'oungu ma Dutu, nanga Ro-riwo Wonasilaha-laha ma ngekomo ma Yesus Kristus to ngone nanga Jou. Ge'enau so tanu powisihoromati de powisitedene sababu 'una ge'ena ma Jo'oungu ma Dutu gee woku-kumati, wokuru-kurutie, wopa-pareta, ka ma sirasi sigado ne'ena, de kaisi'ado-'adonika! 'Amin. Koge'enau.

Yudas

Video Yudas 1

Ikuti Kami:

KONTAK | PARTISIPASI | DONASI