Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sikamma sari’battangku, ia le’baka nikio’ siagang sannaka nikamaseanna ri Allata’ala Manggea, kammayatompa nikatutuia untu’ Isa Almasi. Battu ri nakke, atanNa Isa Almasi, iamintu Yudas, sari’battanna Yakobus;

² ma’minasa’ mae ri Allata’ala sollannu Nasare ngaseng alla’bi-la’bi barakka’, pangngamaseang, kammayatompa kasalewangang.

³ Sikamma sari’battangku sannaka kukarimangnginna! Sanna’ dudu erokku annulisi’ sura’ mae ri kau ngaseng ri passala’na kasalamakkang nitarimayamo. Mingka kamma-kamma anne erokka’ kusa’ring ampakaingakko lalang ri anne suraka, sollannu barjuang turus untu’ katappakkanta; anjo katappakkanga sikaliji Napassareang Allata’ala sa’genna satunggu-tungguna mae ri Umma’Na.

⁴ Nasaba’ tanisa’ringai na nia’mo siapa are tu kodi ateka’ antama’ ri tangnga-tangngata. Anjo ke’nanga sangnging tau panra’; naputara’ baleki biritta pangngamaseanNa Allata’alata, sollanna akkulle anggappa kasampatang ke’nanga untu’ anggaukangi ero’ hawa napasuna. Taerokai ke’nanga antarimai Isa Almasi, Batara Makoasa tena ruanna. Battu riolo dudu iji nanipau la’bi riolo memammo lalang ri Kittaka hukkungang lanagappaya ke’nanga.

⁵ Yangasenna anjo nuasseng ngasemmi. Mingka, erokko kupakainga’ ri passala’ antekamma bateNa Batara ampasalamaki umma’ Israel battu ri butta Mesir; mingka ribokoanganna Nabunoi sikamma tau tenaya natappa’ ri alla’na ke’nanga.

⁶ U’rangi tongi sikamma malaeka’ eroka appanggaukang allaloangai kakoasanna ke’nanga, sa’genna a’lampa ke’nanga ambokoi pammantanganna. Nisikko’mi ri Allata’ala sikamma anjo malaekaka siagang rante tamattappuka, irawa ri tampa’ sassanga rawanganna buttaya. Anjoremmi ke’nanga nitahang turus, sa’genna nitappuki hukkunganna ke’nanga ri Allo sannaka heba’na sallang.

⁷ U’rangi tongi kota Sodom siagang Gomora kammayatompa kota-kota niaka ri ampi’na, appanggaukang kammaya todong anjo sikamma malaekaka tuma’buttana. Nagaukangi ke’nanga nikanaya gau’ bawang siagang gau’ bambalaka; sa’genna nisessa ke’nanga siagang pepe’ a’rinraya satunggu-tungguna, untu’ a’jari pappakainga’ mae ri sikontu rupataua.

⁸ Kammatommi anjo tau a’rupa-rupa dudua nanawa-nawa, sa’genna a’gau’ dosamo ri batangkalenna tonji ke’nanga. Nacini’ rawai kakoasanNa Allata’ala siagang nahinai sikamma apa-apa attallasaka siagang mala’birika ri suruga.

⁹ Manna kalenna Mikhael, iamintu kapalana malaekaka, tale’bakai a’gau’ kamma anjo. Ri wattunna a’besere’ siagang Billisika passabakkang inai langgappai maya’na Musa, tena nabarani Mikhael angngadeli siagang bicara hina Billisika. Angkanaji bawang Mikhael, "LaNapakainga’ lompoko Batara!"

¹⁰ Mingka napakka’-pakkanaimi siagang nahinami ke’nanga sikontu anjo apa-apa tanapahanga ke’nanga. Sanrapangi ke’nanga olo’-olo’ tenaya pikkiranna, iamintu pakkasia’naji bawang napake untu’ angngassengi apa-apaya. Mingka passabakkang iatommi anjo apa-apa kammaya naancuru’ ke’nanga.

¹¹ Cilaka ngasengi ke’nanga! Amminawammi ke’nanga rioloang le’baka naolo Kain. Napanaummi kalenna ke’nanga ri kalo’bang kalinguanga sangkamma Bileam, sollanna akkulle ke’nanga anggappa doe’. Na niancuru’ tommo ke’nanga lanri angngewana sangkamma Korah.

¹² Ri wattunnu assua’-suara’ angnganre, ia ngasemmi anjo tau kammaya anra’massiko. Nasaba’ tena siri’na ke’nanga angnganre siagang sanna’ angngoana; kaparalluang kalennaji bawang najampangi ke’nanga. Sanrapangi ke’nanga rammang nairika anging mingka tena nappaturung bosi. Sanrapang tongi ke’nanga poko’ kayu tenaya na’rappo manna pole nawattu pa’rappoammo; sanrapangi poko’ kayu le’bakamo nibi’bu’ siagang mate taba sikalimi.

¹³ Sanrapang bombang sannaka lompona siagang a’busa-busaya ri tamparanga, sangkamma tommi anjo sanrapanna a’busa-busana panggaukang appakasiri’-siri’na ke’nanga. Sanrapangi ke’nanga bintoeng-bintoeng pitilampa-lampaia, siagang le’bakamo nipasadiang tampa’na ri Allata’ala, iamintu lalang ri tampa’ sannaka sassanna sa’genna satunggu-tungguna.

¹⁴ Henokh, iamintu sossorang makatujua lapisi’na battu ri Adam, le’baki napau la’bi riolo pirangalloang ri passala’na ngaseng anne tau kammaya. Angkanai Henokh, "Ciniki sallang, labattui Batara siagang assa’bu-sa’bu malaeka’ matangkasa’Na,

¹⁵ untu’ angngadeli sikontu rupataua. LaNahukkung ngasengi Batara sikamma tau ja’dalaka lanri panggaukang bambala’na ke’nanga. Siagang laNahukkung ngaseng tongi bicara-bicara hina napaua sikamma tau dosaya siagang dorakaya."

¹⁶ Anjo taua tuli a’reku’na ngaseng giginna siagang tuli nasalakanna tau maraenga. Tuli naturukiangi ke’nanga apa nakaerokia pa’mai’ dorakana ke’nanga. Napalecei kalenna ke’nanga, siagang a’bali’ ballammi ke’nanga sollanna akkulle anggappa passawallang.

¹⁷ Mingka sikamma sari’battangku sannaka kukarimangnginna, u’rangi apa-apa le’baka napau sikamma tunisuroNa Batara Isa Almasi pirangalloang.

¹⁸ Napauang ngaseng mako la’bi riolo angkanaya punna a’reppese’mo Allo Kiamaka, lammumbami tau ancau-cauako, iamintu sikamma tau anturukiai ero’ kaja’dallanna lalang ri katallassanna.

¹⁹ Yangasemmi anne ke’nanga tau lappa’niaka passisala-salang siagang nikoasaia ri sipa’-sipa’ ero’ pakkalinoanga. Anjo ke’nanga tau tena ngaseng nanipantamai ri RohNa Allata’ala.

²⁰ Mingka ikau ngaseng, sikamma sari’battangku, parallui tuli nupakajarre’ turus katappakkannu mae ri Isa Almasi; anjo tappa’nu sanna’ tangkasa’na. Na lalang kammana anjo appala’ doangko siagang koasa RohNa Allata’ala;

²¹ siagang tuli a’la’lang mako irawangang pangngamaseanNa Allata’ala, lalang nutayanna passareNa Batarata Isa Almasi, Ia lassareako katallassang sitojennaya siagang mannannunganga.

²² Ia tau ranggaselaya atinna, parallui nupa’nyata pangngamaseannu mae ri ia.

²³ Besoki assulu’ tau sanrapang lalanga ri pepeka sollanna salama’ ke’nanga. Mae ri tau maraenganga, parallui nupa’nyata pangngamaseannu nirurunganga siagang malla’; mingka kabirisi ba’lalo pakeang ra’masa’na ke’nanga napakamma kaerokang dorakana ke’nanga.

²⁴ Allata’ala, Makoasaya anjagaiko sollanna tena nutu’guru’ siagang Makoasaya angngerangko mae ri dallekang mala’biri’Na siagang rannu kammayatompa tena callannu,

²⁵ Iami Allata’ala, tenaya ruanNa; Iami ampasalamakki’ tete ri Isa Almasi Batarata. Iami Allata’ala Mala’birika, Malompoa, Makoasaya, kammayatompa Magassinga battu riolo sa’genna kamma-kamma anne kammayatompa sa’genna satunggu-tungguna! Aming.

Yudas

Video Yudas 1

Ikuti Kami:

KONTAK | PARTISIPASI | DONASI