Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sampesuvu-sampesuvu anu nipokio nTuamata Alatala majadi todeaNa: Komiu mpuu-mpuu nipotove nu Alatala, bo nijagaiNa sampe i Yesus Kristus makava mpanjili. Sura hitu lako nte yaku, i Yudas, batua i Yesus Kristus bo sampesuvu i Yakobus.

² Kuperapi ala komiu ledo maupu-upu mombarasai tove nu Alatala, bo ala Ia mabelo nte komiu bo mompakatinonto raramiu.

³ Sampesuvu-sampesuvu nipotoveku, naoge mpuu raraku motulisi sura ka komiu, mombatesa kabelona nirasaita pura-pura anu nipakasalama i Yesus. Tapi nirasaiku eva naria anu nompasuu yaku mombabaliki niaku haitu. Apa naria nte kita tona anu nanggeni pepatuduki nasala. Sia sampe niuliku aginamo kutulisi sura mompakaroso raramiu ala komiu mompasimbuku mpuu mangeva tona anu madota mombabaliki pepatuduki nakana. Pepatuduki nakana nipasimbayu nu Alatala ka pura-pura todeaNa. Bo pepatuduki haitu aga sanggani nidekei nu Alatala sampe ri kasae-saena bo ledo namala rabaliki.

⁴ Nariamo bara sako-ndua tona nesua nggalino-lino ri tatangata ntopomparasaya. Pangulira ira sampesuvuta sampomparasaya, tano mai ira ledo nangoseaka dota nu Alatala. Pangulira ledo makuya kita mangoseaka dota rarata nadaa apa Alatala nompotove kita bo raampungiNa salata haitu. Tapi pepatuduki haitu ledo ntoto nakana, ira aga nombatenggoaka pepatuduki anu nombatesa kabelo nu Alatala. Nisapura i Yesus Kristus saito-itoNa Magau bo Tuputa. Lako ri nggauluname pehuku rapambela ka ira nipakatantu mamimo bo nitulisi riara Buku Gasa.

⁵ Nau nisanimiumo pura-pura hitu, kana kupopatora ka komiu pehuku nu Alatala ka tona novia nadaa. Nggaulu, Tupu nombakabasaka todeaNa *toYahudi lako ri tana Mesir. Tapi naupu sia, naria sanu ira ledo nomparasaya sampe nipatesiNamo ira ri karava bai.

⁶ Tora muni *malaeka-malaeka nTupu nggaulu. Sanu ira ledo naosa rarara nte kuasa nipakatantu nu Alatala ka ira, sampe nipalaisira ponturora ri suruga. Ira nitarunggu nu Alatala ri ponturo nalanda mpirika bo nipou ante rante anu ledo namala rapudusi. Bo ira ledo rakabasaka sampe makava tempona ira rahuku ri Eo Potangara bara maipia.

⁷ Tora munimo tupu ngata Sodom bo Gomora nggaulu bo ngata-ngata ri sinjorina. Ira nasimbayu nte malaeka-malaeka pangane, haitumo ira muni ledo nabasa-basa nosimpogau nte tona ledo bereira mboto bo nangoseaka pokainggu nabuga ntotomo. Ngatara nipakaropu ante apu rapopatora ka pura-pura tona, pokainggu nadaa rahuku ante apu sampe ri kasae-saena.

⁸ Nau naria jonjo pehuku nu Alatala ka tona nadaa pangane, guru-guru mpodava gahaitu batena novia nadaa. Pangipi-pangipira niulira lako nte Alatala, tano mai ledo nakana. Pangipira haitu nanggeni ira novia dosa anu nompakaruto karora mboto. Ira nompandaente kuasa nu Alatala bo nanjalai malaeka anu nipokumaaka ri suruga.

⁹ Tano i Mikhael mboto, nau ia tadulako malaeka nu Alatala, ledo nabia manjalai Magau nu Seta. Tempo kamate i Musa, i Mikhael bo Magau nu Seta nosinjanaika isema mangala karobata i Musa. Nirasai i Mikhael ledo masipato ia manjalai Magau nu Seta. Ia aga nanguli, "Damo Tupu mombahuku iko!"

¹⁰ Tapi guru-guru mpodava haitu nanjalai mpengaya-ngaya anu ledo nisanira. Ira nasimbayu eva binata-binata anu ledo namala nompekiri. Anu nirasaira, haitumo nioseakara ante ledo ria rekena. Bo pokainggura haitumo sampe ira rahuku nu Alatala.

¹¹ Mandasa mpuu ira! Nipasialara katuvu i Kain nggaulu anu nasiriati bo navuu matana nte tueina. Nipasialara ntoto sala i Bileam anu nasadia movia nuapa-nuapa asaa manggava doi. Bo nievara Alatala nasimbayu eva i Korah nggaulu sampe ira muni masipato rahuku nu Alatala.

¹² Tempo komiu nasiromu nangande nosanggani-nggani mantora posangu raramiu nte i Kristus, guru-guru mpodava gahaitu aga nepakaeya. Ledo naeya matara nompebasa nangande bo aga nompekirika karora mboto. Ira ledo ntoto ria gunana, nasimbayu eva kulimu vuri anu ledo najadi uda, aga niburusi mpoiri. Bo ira nasimbayu eva kayu ledo novua ri tempo mpovuana, eva kayu nitovo bo nipekalesi sampe namate mpuu.

¹³ Ira nasimbayu eva balumba mbaso niburu mpoiri, bo pokainggura anu nepakaeya nasimbayu eva rumpu bo bura natapa nitompesaka ri talinti. Ira nasalandala lako ri dala nakana nasimbayu eva betue-betue mpolinja ri langi ledo nangoseaka dala nipakatantu ka ira. Jadi nipakasadia nTupumo ponturo nalanda mpirika ka ira sampe ri kasae-saena.

¹⁴ I Henokh, muli kapitu-ntapina lako nte i Adam, nombaboto pehuku nu Alatala ka guru-guru mpodava gahaitu ivei: "Epemo! Tupu makava bara maipia ante njobu-njobu *malaekaNa

¹⁵ mombatangara pura-pura manusia. Ia mombahuku pura-pura topesapuaka sabana pesapuakara. Ia mombahuku topesapuaka nadosa haitu sabana tesa nadaa nisovadakara nanjalai Ia."

¹⁶ Guru-guru mpodava gahaitu batena nongau bo nompakasala tona ntanina. Ira natuvu nangoseaka dota rarara nadaa. Ira nangoe nompakalanga karora mboto bo notesa namomi ala raoseaka ntona dotara.

¹⁷ Sampesuvu-sampesuvu nipotoveku, toramo tesa niuli nu suro-suro nTuputa i Yesus Kristus bara ipia.

¹⁸ Niulira ivei: "Ane maparamo kaupu nu dunia, kana meumba topesapuaka anu mompongei-ngeika pomparasayata. Ira aga mangoseaka dota rarara nadaa bo ledo raoseakara dota nu Alatala."

¹⁹ Tona haitumo nompakagero kasintuvu ntopomparasaya. Ira nikuasai dota-dota rarara nadaa, bo Nosa Gasa nu Alatala ledo ntoto naria nte ira.

²⁰ Sampesuvu-sampesuvu nipotoveku, posipakarosomo pomparasayamiu nangoseaka pepatuduki nakana, sabana pepatuduki niparasayata haitu nagasa mpuu. Bo posambayamo ante pekeniaka Nosa Gasa nu Alatala.

²¹ Komiu kana bate-batena matuvu mantora pepotove nu Alatala ka komiu. Bo tongorakamo kakava nTuputa i Yesus anu mombadekei katuvu nabelo sampe ri kasae-saena ka kita sabana kabelo raraNa.

²² Komiu kana mompoasi tona da nolengga-lengga pomparasayara.

²³ Naria tona ntanina damo kasalandalana. Tulungimo ira ala ira rapakasalama lako ri pehuku, nasimbayu eva porabutakamiu tona lako ri apu. Bo poasi munimo tona nikuasai dota rarara nadaa. Tulungi ira manjili ri dala nakana, tapi jagaimo, mbelaka komiu matekeni mangoseaka pokainggura nadaa. Potovemo tona nadosa tapi povuu matamo nte pokainggura.

²⁴ Ratoiyatamo Alatala sabana Ia nakuasa nombajagai kita ala ledo rakabasakata pomparasayata. Ia nakuasa manggeni kita hau ri suruga mantingayo Ia riara kaogeNa, bo ledo maria salata, bo melabi kadamba rarata.

²⁵ Aga Ia saito-itoNa Alatala. Iamo nompakasalama kita sabana anu nipovia nTuputa Yesus Kristus. Jadi ratoiyatamo Ia, apa Iamo Alatala anu nelabi kaogeNa, Magau nipokumaaka. Iamo nabaraka bo nakuasa lako ri lamba pamulana, sampe sii-sii, bo sampe ri kasae-saena! Amin! Tabe lako nte yaku, Yudas

Yudas

Video Yudas 1

Ikuti Kami:

KONTAK | PARTISIPASI | DONASI