1 Utatku mita inta ain inoinií bo inta totok ing kinotabi i Allah Amaí naton, bo inta iḷukadan kom bonu in tongoi i Yesus Kristus. Saḷaku intau inta nogaid kon oaíidan i Yesus Kristus, aku'oi ki Yudas, ki utat i Yakobus,
2 mopo'igum makow: Simbaí ki Allah umuran mobogoi im barakat, totabi bo kobiagan motompia ko'i monimu.
3 Utat mita inta kinotabiku! Totu'u kon oyuíonbií im makusudku nomais kon surat tana'a ko'i monimu, tuata in soaáḷ kasaḷamatan inta ain tumpaḷa kinorasa'an naton. Kon soaáḷ tana'a totokdon kong ginaku im momais kon surat ko'i monimu bo mononggina simbaí mo'ikow umuran mokoporoton kumadai kon onu inta aim pinirisaya monimu inta aim pinoyaput kon intau mita inta ain inoinií i Allah.
4 Sin diaí kinota'a-ta'auanmai, na'anta oyuíon bidon intau mita ibanea inta umuni-uni makow sinumu'ot kon yuaí-yuaík naton. Mosia tua intau mita mora'at inta mopoyotu'uy kon habar soaáḷ totabi i Allah naton. Makusud monia tua im motayakbií kong kasampatan mopoaíid in onu inta kino ibog in awak monia. Mosia tua diaí mopirisaya kong ki Yesus Kristus tua im mongongawasa bo Tuhan naton. Nongkon tungkuḷpabiímai hukuman ko'i monia tua aindon pinota'au muna kom bonu im Buk Mosuci.
5 Tua komintan kinota'auan bidon monimu. Tongaí mo'ibogpa doman aku'oi moponorop ko'i monimu kon soaáḷ naonda ing ki Tuhan noposaḷamat kon umat Israel nongkon butaí im Mesir, ta'e no'iduduimai kon tua pinutuían-Nyadon intau mita kon sigad monia inta diaí mopirisaya.
6 Torop domandon im malaekat mita inta ilimimpat kong kawasa inta inogoi ko'i monia, sahingga im minayak nonaḷaímaidon kon tampat pogogutunan monia. Mosia tua sinoko togot i Allah in rante inta diaí mobonto-bontow kom bonu in tampat inta mosindip kon limonag im butaí. Mosia umuranpabií sinahang kon tua modapot in hukuman popoḷabuídon ko'i monia kon singgai inta ponantuíandon.
7 Torop domandon onu inta nobalií kong kotaí in Sodom bo Gomora bo kong kotaí mita inta kon diugeamai, inta intaunya mita kon tua nogaid doman kon naí inta pinomia im malaekat mita tatua. Mosia nogaid kon soaáḷ mita inta moko'oyak totok bo nogaid doman kon inta diaídon patus aidan in intau. Hukuman ko'i monia tua in tuḷu inta diaí mopio-piong, simbaí tua mobalií poringatan kom bayongan intau.
8 Natua doman intau mita inta mo'ibog momikir kon diaí totu'u modapot im mogaid kon inta mokokotor kon awak monia tontanií. Mosia tua mopo'ompaímai kong kakuasa'an i Allah bo moningkule kom malaekat inta momulia kon soroga.
9 Ki Mikhael tontanií inta itoi im malaekat mita diaí dodai onda nogaid kon naí inta pinomia monia tatua. Kon wakutu in sia nobobayowan in Ibilis soaáḷ ki ine im moko'ulií kom mayat i Musa, sia diaíbií nokobalií nohakim kon Ibilis takin tosingogon moningkule. Ki Mikhael tongaíbií nosingog nana'a: "Toruían i Tuhan ikow!"
10 Ta'e mosia kopia nopoyaput in tosingogon mita pohojat kom bayongan inta diaí kinomangalean monia. Mosia tua naídon onda bo mahaḷuk inta diaí koraian, inta nonota'au kon soaáḷ mita tongaí podudui im porasa'an monia. Bo soaáḷbií mita tatua inta mokopopisií kong koyoyangan monia.
11 Mobodito im mosia! Mosia dinumuduidon kon onu inta inaidan i Kain. Inta tongaí lantaran baí moko'ulií kon doit, daí nogaidon kon onu inta diaí kino ibog i Allah, naí doman ki Bileam. Bo mosia tua irimumud doman lantaran nomarontak naí ki Korah.
12 Ko wakutu i mo'ikow nogaid kon rame nonga'an noyotakin, oaíid in intau mita tatuata inta mokobuí kon sigad monimu. Mosia tumuraí im monga'an takin diaíbií in oyak, bo tongaí morai kong kopontingan monia tontanií. Mosia tua naí doman onda bo goḷom inta dinia in tompot ta'e diaí moko'uyan. Mosia naí doman onda bo pangkoi in ayop inta diaí momomungai umpakah sempo in ayop; pangkoi mita inta ain irabut takin uakatnya bo minatoidon.
13 Mosia notongkai doman im bokoḷ moropot kon dagat inta mokopomukaí kom buraí, natua im mosia monomburaí kon oaíid mita monia inta moko'oyak. Mosia tua in naí doman onda bo mahaḷuk mita inta modondaḷoi magií makow bo inta aim pinosadia'an i Allah kon tampatnya kom bonu in tampat inta paling mosindip modapot ing kopaḷutannya.
14 Ki Henokh, katurunan im pitunya nongkon i Adam, tungkuḷ intua pernah doman nopota'au ing koyow i Allah soaáḷ intau mita tatua. Ki Henokh noguman nana'a, "Indoiai, ki Tuhan mamangoi takin ribuan malaekat-Nya mita inta mokudus
15 sim mohakim kom bayongan intau. Ki Tuhan mohukum kon intau mita mora'at lantaran oaíid mita monia inta moromuí. Bo hukumon-Nyabií in intau mita baradosa bo inta modurhaka inta umuran mopoyaput in singog pohojat ko'i Tuhan."
16 Intau mita tatua umuran mongunsingog bo mopotaḷaí kon intau mita ibanea. Mosia mobiag podudui in ibog monia inta baradosa na'a. Mosia mongonguman kom moḷantud soaáḷ ka'ada'an monia tontanií, bo umuran umapid makow kon intau simbaí moko'ulií kong ka'untungan.
17 Ta'e utatku mita inta kinotabiku, toropdon onu inta kolipod pinoguman in rasul mita i Yesus Kristus, Tuhan naton.
18 Munadon pinota'au monia ko'inimu, kon aka kodiug-kodiugdon in singgai pangabisan yo mo'iangoibií in intau mita inta moningkule ko'i monimu, mosia tuata in intau mita inta nobiag podudui in ibog monia inta baradosa na'a.
19 Mosiadon na'a in intau mita inta mokopomukaí kong kogoguya'atan im pinonobatuían jama'at. Mosia diaí kinawasa'an in Roho i Allah, ta'e kinawasa'andon in ibog mita in dunia na'a.
20 Ta'e mo'ikow, utatku mita, tompiabií saḷaḷu ing kobobiagmu podudui im pirisayamu ko'i Yesus Kristus. Pirisaya inta totok modarit. Bo posambayangdon takin kawasa in Roho i Allah,
21 bo kobiag saḷaḷu kom bonu in totabi i Allah, ko wakutu im mo'ikow mogoḷat makow kom barakat i Tuhan naton ki Yesus Kristus inta mobogoi ing kobiagan mopia bo mononoi.
22 Popo'ontongdon in tabi monimu ko'i monia inta diaípa motantuí im pirisaya.
23 Kapit bo poḷuai im mosia nongkon bonu in tuḷu simbaí mosaḷamat. Bo po'ontong doman in tabi kon intau mita ibanea, ta'e musti motogu'ondok. Kodoiíbií modapot pakeang monia inta aing kinotoran in ibog monia inta binaradosa.
24 Ki Allah, inta mokosanggup moḷukad simbaí mo'ikow diaí moḷabuí, bo inta mokosanggup modia ko'i monimu mayak in tampat pomomarentaíannya inta momulia takin gina mosanang bo modarit.
25 Tongaíbií Sia tua ing ki Allah, Mopoposaḷamat naton pongin i Yesus Kristus Tuhan naton. Siata ing ki Allah inta momulia, Moḷoben, mokawasa bo inta mokobangkaḷ nongkon tungkuḷpa intua, masai na'a bo modapot kopaḷutan in dunia na'a! Amin.

Studi Alkitab lengkap, silahkan lihat Alkitab SABDA :: Yudas 1
Studi Alkitab mobile, silahkan lihat Alkitab Mobi :: Yudas 1

Download Aplikasi Alkitab Karaoke (BETA) Android:
https://play.google.com/store/apps/details?id=org.sabda.alkitabkaraoke