Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Tipaq selapuq dengan saq sampun temanikang dait saq sanget tekasihin siq Allah Bapa serte tepeliharaq bagi Deside Isa Almasih. Lẽman -- Yudas -- hambe Deside Isa Almasih dait semetonne Yakub.

² Rahmat, damẽ sejahtere dait kasih belimpah-limpah umaq side pade.

³ Semeton senamian saq tiang kasihin! Tiang tetu-tetu beniat nulis surat tipaq side pade, mengenai keselametan saq pade-pade sampun ite terimaq. Laguq mangkin tiang merase jari sopoq keharusan ngebẽng nasẽhat tipaq side pade langan surat niki adẽq side pade terus bejuang jari pertahenang iman saq sampun sekali teicanin jari selaẽq-laẽqne tipaq dengan-dengan saq tehususang bagi Allah.

⁴ Sẽngaq ite ndẽq sadar, araq pire dengan saq secare tedoq-tedoq tame ojok tengaq-tengaqte, nike dengan-dengan saq lẽman laẽq sampun tetentuang jari dengan-dengan saq gen nerimaq hukuman. Ie pade dengan-dengan saq ndẽq kenal kance Allah saq salaq guneang berite mengenai rahmat Allahte, jari mauq kesempatan idup lẽq dalem macem-macem hawe napsu, dait saq nolaq Deside Isa Almasih, sopoq-sopoqne Penguase dait Junjungante Saq Mulie.

⁵ Laguq, timaq side pade tetu-tetu sampun nenaoq selapuqne nike, tiang mẽlẽ ingetang side pade mengenai berembẽ Tuhan nyelametang umat Israel lẽman negeri Mesir, laguq sesampun nike binaseang dengan-dengan saq ndẽq percaye saq araq lẽq antare ie pade.

⁶ Inget ẽndah pare malaẽkat saq ndẽq taat jangke liwat bates kekuasean ie pade, sehingge lumbar bilin taoq ie pade ndot. Allah taliq dait sekep malaẽkat-malaẽkat nike kadu rantẽ saq kekel, lẽq taoq saq peteng lẽq bawaq gumi. Lẽq derike ie pade tetahen terus jangke dateng hukuman saq gen ie pade terimaq lẽq jelo penghukuman saq belẽq nike ẽraq.

⁷ Inget ẽndah kote Sodom dait Gomora dait kote-kote lẽq sekiterne, saq pendudukne sampun gawẽq hal-hal saq cabul pade maraq saq tegawẽq siq malaẽkat-malaẽkat nike. Ie pade gawẽq hal-hal saq ndẽq wajar jari kepuasan ie pade sehingge ie pade tesiksaq siq hukuman api saq kekel, gen tejariang peringetan umaq selapuq dengan.

⁸ Maraq nike ẽndah dengan-dengan nike. Siq impi-impi ie pade, ie pade piaq dose lẽq awakne mẽsaq dait menghine kekuasean Allah, dait menghine selapuq saq mulie lẽq sorge.

⁹ Mikael mẽsaq, saq jari datune malaẽkat-malaẽkat nike, ndẽqne uwah piaq maraq nike. Sewaktu ie betungkasan kance Belis mengenai mayitne Musa, Mikael ndẽqne bani hakimin Belis siq ucapan-ucapan saq menghine. Ucapan Mikael cume maraq niki, "Tuhan gen semprak side!"

¹⁰ Laguq siq penghinean-penghinean, dengan-dengan nike nyerang selapuq hal saq ie pade ndẽq ngerti. Dengan-dengan nike pade maraq binatang-binatang saq ndẽq bedowẽ akal, saq nenaoq hal-hal kadu perasaanne, laguq malahan nike saq jari penyebap ie pade binase.

¹¹ Celake ie pade! Ie pade sampun turut langan saq pade maraq Kain. Adẽqne mauq kẽpẽng, ie pade namaqang diriqne ojok dunie sesat, pade maraq Bileam. Dait ie pade ẽndah teancurang lantaran ngelawan pade maraq Korah.

¹² Sewaktu side pade ngaraqang rowah, tingkah laku dengan-dengan nike tetu-tetu nyepaqang angen. Sẽngaq ie pade melak ndẽq araq ilaqne, dait ie cume mentingang diriqne mẽsaq. Ie pade maraq awan saq tetiup siq angin, laguq ndẽq nurunang ujan. Ie pade ẽndah maraq lolo saq ndẽq ngasilang buaq timaq lẽq musim buaq; lolo-lolo saq akahne sampun teembot dait tetu-tetu sampun matẽ.

¹³ Pade maraq umbak saq ganas lẽq segare nimbulang kowok, maraq nike ẽndah ie pade ngowokang perbuatan-perbuatan saq merilaq. Ie pade maraq bintang-bintang saq ngambar, dait saq sampun tesedieang taoqne siq Allah lẽq taoq saq peteng dedet jari selaẽq-laẽqne.

¹⁴ Henok, keturunan saq kepituq lẽman Adam, laẽq sampun benubuat mengenai dengan-dengan nike. Henok bebase, "Serioq, Tuhan rauh kance beiyu-iyu malaẽkat-Ne saq suci

¹⁵ jari hakimin selapuq dengan. Tuhan gen ngukum dengan-dengan saq ndẽq kenal Ie lantaran perbuatan-perbuatan ie pade saq bejat. Dait Ie gen hukum dengan bedose dait durhake lantaran selapuq ucapan penghinean saq ie ucapang."

¹⁶ Dengan-dengan nike tetep doang ngerumun dait nyalahang dengan lain. Ie pade idup menurut hawe napsu ie pade saq bedose. Ie pade ngajum diriqne mẽsaq dait ie pade demen ngajum dengan adẽqne mauq keuntungan.

¹⁷ Laguq side pade, semeton-semeton saq tiang kasihin, inget lẽq napi saq laẽq tesampẽang siq rasul-rasul Junjungante Saq Mulie Deside Isa Almasih.

¹⁸ Ie pade sampun badaq side juluan bahwe ẽraq sewaktu gen ahir jaman niki gen dateng dengan-dengan saq gen ngoloq side pade, nike dengan-dengan saq idup menurut hawe napsu ie pade saq bedose.

¹⁹ Ie pade dengan-dengan saq nimbulang permusuhan. Ie pade ndẽq tekuasein siq Roh Suci, laguq siq kemẽlẽq-kemẽlẽq tabiat dunie niki.

²⁰ Laguq side pade, semeton senamian saq tiang kasihin, terus pesolah diriqde lẽq atas dasar imande saq paling suci. Dait bedo'e siq kuase Roh Suci,

²¹ dait tetep idup lẽq bawaq pengasihan Allah sengonẽq side pade ngantos rahmat Deside Isa Almasih Junjungante Saq Mulie, saq gen ngicanin side idup sejati dait kekel.

²² Side pade harus nyatayang belas kasihan lẽq dengan-dengan saq bimbang atẽne.

²³ Araq ẽndah dengan-dengan saq patut side selametang siq care ngerebut ie pade lẽman api. Laguq tipaq dengan-dengan lainne, side patut nyatayang belas kasihan saq tebarengin siq rase takut. Malahan meriq lẽq kelambi ie pade saq sampun jari kotor siq hawe napsu dunie.

²⁴ Allah, saq sanggup jagaq adẽq side pade ndẽq geriq, dait saq sanggup gadingang side ojok hadirat-Ne saq Mulie siq sukecite dait ndẽq bedowẽ cacat cele,

²⁵ Ie sopoq-sopoqne Allah, Juruselamette langan Deside Isa Almasih Junjungante Saq Mulie. Ie Allah saq mulie, agung, bekuase dait berwibawe lẽman jaman laẽq jangke mangkin dait jari selaẽq-laẽqne! Amin.

Yudas

Video Yudas 1

Ikuti Kami:

KONTAK | PARTISIPASI | DONASI