Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Surad gini dau dang, Yudas, Yakobus magto, gedig dan dedag Yesus Krisdus men sogougb. Dan dog surad gini dou yeng Krisden yaugwan, anai yen, kaba, maman Mamina Allah en eija yen dag men lusudohob. Hang en medoc gororougb yen namcir. Dara en agauwesa yen deb naugb en emohw yen dou Yesus Krisdus se Lona Sug En Ecicugwen gin toua.

² Dangga dan dacgeij Allah naugb en medoc eineg an yen. Dara en eseyeiyo yen dougwo areg gecgu augwan. Dara en medoc gororougb yen eiseisaugb terimda toua.

³ Dan indagunerij, dara dan indamouwerij gedig dan indoc gororougb yen, aimougtut, kaba, dan douwan naugb dan dog dau sug Yesus eigdoc maman dau sesar men gogom aud maireseb menau geb huhugb men meijouhw augwan asesa dou yen.

⁴ Doba leng leperwei Allah mer meijouhw dag areibahau mer, kaba, len leinesa se meijen goucimdeb augwougwohob. Dangga sug dan douman dau gin, kaba, dan demog eisaugb aremer maireseb menau geb huhugb gin dou yen deitero. Doba aremer gini eic dan indoc ehin. Hang dan demesulou yen dara goubesa, dauntoba yen yemobsara aud len gin touwero. Doba yen yes agadgeij dougwo len merir namcir. Hanoba yen yaimo areg yen meigdoc ebdebin an ginohob augwan terimda. Anai leng gin, kaba, len lemeigdoumesa maman Adehsud Yesus Krisdus dag meren mougt mera medam deitero. Doba len laideido dougwo enohob. Hang len lemaimo areg gedag beim dara gecabeci gin touwero. Doba len leic merus naugb len merisira ebsa ligida aibibrida. Dara len laimo areg gecgu gus augwan toua terimda. Anai len lauwam an dag sug Allah medoc gororougb mamanohob, kaba, en emeic gogom dou len icira sug len lebesesar gin touwero. Doba en amsoho an len dous. Dobnaro. Anai Allah en mer areg en esa dou maman aimougtutohob, kaba, en emeic mer hom ingma ucan dou maman deitero, doba ebsugeb namcir. Dangga hang, en emamsoho leng leperwei en mer naugb laimo areg gecgu gin touwero. Doba en emeic gogom medam se dum smougb dou len toues, aimo dau areg en og deb se Surad Injil Meb Mohon eisaugb len deb sug nosohob an len toua.

⁵ Eisaugb aremer gin, kaba, yen yecinaga augwan dag misenohob. Doba dan douwan dens gini dou yen deit. Dauntoba yen meigdoc moc dougworo, doba yen meigdoc eiseisan terimda. Anai yen yecinaga dau sug maman Adehsud en eigdoc men lusud leng Israel len laugwan dau meren gogom se cinogo Mesir sug nosa, kaba, dag en emeigdoc hom yom dau len dousero. Doba en eigdoc len laugwan dau cinogo ingga toua. Doba sug len merdoc emebdebin an en se lona daiyamo gacin deitero, kaba, en emamsoho len deb touwero. Doba en eic mor mor dou len laugwan namcir toua.

⁶ Dara en emamsoho malaikad gedig len lemesedougwo meren usi gin touwero. Doba sug len larges dau areg Allah ogugwo dou lenohob. Hanoba len louwaden dau bogo naugb len leic ligida dau lusud misen dag len mersouwer, kaba, en erba len laugwan se lobeigbogo mes se w Seol, dauntoba len lemagunya toua deitero. Doba len leigtou se usi ingga terimda edebeij Lona Gouji hom sug en ogod gogom deinaugb lusud laugwan gin toua.

⁷ Dara leng se cinogo Sodom dara Gomora an cinogo geb acec ingga augwan, kaba, Allah emamsoho len touwero. Doba en esa smougb debin len naugb smougb ait len laugwan beb huhugb namcir. Anai len, kaba, len lemarges dau meren geicara gecgu touwero. Doba len lesogwa deisa malaikad graga merohotimei mohw naugb len merisira ebsa ligida gus aibibrida. Dara meren geicara gus, kaba, dag mihi men geicara toua terimdohob. Hang gogom areg Allah eic dou len ginohob, kaba, dag gansins dou lusud. Dauntoba sug len leiya dau gin, kaba, len lemaimo meren geicara gecgu deit touwero. Doba len lahau an dougwo namcir.

⁸ Dobnaro. Gembala areibahau gedig len leinesa meijen goucimdeb graga, kaba, len lemahau dau Allah dara mougt mera gus len laugwan touwero. Doba len leic merus naugb len leicara laihagab len merir an areg len larougb len an gin terimda. Dara len lemahau dau malaikad gedig len leigtou se gogouf cucugb touwero. Doba len leic len gin laugwan meroho lacecim toua namcir. Hanoba len lemarges dau meren geicara gecgu gin debero. Doba len lebesesar naugb len leic areg gogor debin lenin meraga, aninim dag malaikadir dara leng se Sodom dara Gomora graga, kaba, len leic areg gogor debin lenin meraga gin touohob. Dara len lens dau meren geicara gecgu gin dou lusud, kaba, dag len lemaimo augwan augwougb touwero. Doba len louma debin dag Mena Gogoufu enin eng ogod len dag lomom. Hang len lemeiya augwan gini dag misen touohob.

⁹ Dangga meren geicara augwan gin, kaba, edreg dau malaikad meren mougt mera medam, moho Mikel, men geicara gin toua namcirohob. Anai en, kaba, en moho agas medam namcir toua. Doba sug eni dara Bilis lan lanara laisedim icira Musa medesa sug nosa, kaba, en emedag mougt naugb en emowun Bilis moho, dara en emesbes an en touwero. Doba en enara dou en, endagai: Nanan Adehsud enin eng emen dougwo ban an gins.

¹⁰ Doba gembala areibahau gin, kaba, areg len meru emobgesero, kaba, len lesbes an namcir. Dara areg len meru obgesa ginohob, kaba, augwan gini ahwan len merur mor se dum smougb dous. Anai areg len meru ouforoho se gin, kaba, dag len merisira ebsa ligida gus aibibrida. Dara len merdoc oungmogo naugb len laimo areg len merdoc etrij icira aud areg gecgu augwan toua terimda. Hang meren geicara augwan aimo dag aremeta mog mog meren geicara gin toua terimda. Anai aremeta gin, kaba, len meru emaiyero toua namcirohob.

¹¹ Dangga, kaba, Allah esedeb gogom medam deinaugb lenohob. Anai len, kaba, len merdoc eclul an ara ara namcir. Hang meren geicara gini, kaba, esogwa deisa sud hom, moho Kain, en mohotimei mohw an men geicara dag len leic gecgu dou lusud toua terimda. Hanoba len lemaimo ucina se geica gin toua deitero. Doba sug len merdoc etrij icira aregoufu dag ginohob, kaba, len laimo sud hom, moho Beliam, men geicara dau ucina misen naugb len lerba mohoisa lusud an meren aregoufu touohob. Aninim dag Beliam sug en medoc etrij icira aregoufu sug nosa, kaba, en erba mohoisa leng Israel naugb len lemecguna dou Allah toua deitero. Doba len lecguna dou lugmahara meren seiseij dous. Hang Allah emamsoho len gin touwero, doba en esedeb naugb en emeic mor mor se dum smougb dou len toues. Anai len leicara laihagab en mer an areg en arougb len an gin terimda. Aninim dag sug nosa, kaba, en emamsoho sud hom, moho Korah, an men geicara touwero. Doba sug en owun Musa en moho dauntoba en emedag mougt mera medam naugb len deitero, kaba, Allah eic mor mor dou en touohob.

¹² Dangga hang, len ledag uluto gogor gaic dareh yen toua. Anai sug yen youcimdeb naugb yen yetara aninim, kaba, len lemeigtou dau yen touwero. Doba len leic merus naugb letara dag logo ara gaihim debin yen terimda. Hanoba len lemauwam an len meraguner dara len merdamouwer se Krisdus touwero. Doba se aremer augwan, kaba, len led lenin deseino len. Hang len lemedag umer mogo goho los touwero. Doba len ledag umer mohora gedig loungmen oho dig gacda, dig ginin dous. Anai len lemebehnehino lenin merdoc mes dougwo ara ara augwan touwero. Doba areg len merdoc etrij icirohob, kaba, len laimo gin terimda. Dara len ledag sogo maga hom gedig igda ehin naugb sug era merohob. Dangga sug lusud louwan ledeiya dougwo, doba len lemec mera hom touwero. Hang len lemedag sogo gombrerij bagac namcir. Anai len ledag sogo gedig lusud lohoma an mom augwanohob.

¹³ Sug len leicara dag gin ucucugb terimda, kaba, Allah emamsoho len gini deb touwero. Doba en esedeb lobeigbogo mes geb ai mei se w Seol naugb lenohob. Anai sug len laimo areg geic igdebes dou lusud dag gin terimda, kaba, len ledag duhu mogo medam gerba mesis an gogor se lonog. Dara len ledag tebeij gemec asa mohw hom touwero, doba eineg maga naugb ec augwougb sungga sungga toua. Anai sug len loududa Allah en mer dag gin namcir, kaba, len lemaimo men ucina misen touwero. Doba len ledis naugb len laimo areg len merdoc etrij icira gin dous.

¹⁴ Augwan gini esogwa deisa areg Adam medebeito gedig senggai, en moho Henog, en og deb se Surad Injil Meb Mohon eisaugb len deb sug nosa touohob, endagai: Yen youman dan indir an areg dan den dou yen gin deigeigouhw namcirahabi. Anai se lona daiyamo gacin, kaba, maman Adehsud en emouwaden dau bogo an men malaikadir leinyana gougwa naugb en emogod aremer aga lusud laugwan toues.

¹⁵ Dangga gareg en ohoiya en mer, hanoba en ecic en moho gouhw genes, dara eic en moho bacecim, kaba, en ogod aremer gogom medam deinaugb len laugwan se lona ingga toua. Anai len lemaimo en mer gin touwero. Doba len merdoc mog mog an en, hanoba len ledreg dau areg en arougb len an gin toua namcirohob.

¹⁶ Dara gembala areibahau gin, kaba, len merdoc emesgiraha an areg geb naugb len touwero. Doba len lenara ucucugb an gin. Dara sug aremer inggebga, kaba, len lemos lemod lenin touwero. Doba len lasij gogom debin leng gus terimda. Hanoba len lemauwam an len gus touwero. Doba len laimo areg len merdoc etrij icira aud areg gecgu gini dous. Dara len lemowun lenin touwero. Doba len leigdoumesa lenin meroho deseino lusud dag len lecinaga meijouhw augwan asesa namcirohob. Hanoba len lenara laceca lusud an aremougb toua terimda.

¹⁷ Dangga dan indagunerij, dara dan indamouwerij gedig dan indoc gororougb yen, eigouhw naugb yen meigdoc moc dougwo areg maman Adehsud Yesus Krisdus men lusud len lesulou yen an gin sug nosohob augwan touwero. Doba yen meigdoc eiseisan gin terimda.

¹⁸ Anai sug len lesai en mer dou yen sug nosa, kaba, len lens dau gembala areibahau gini meren geicara deb dou yen touohob, lendagai: Edebeij Lona Sug Ouwedoc gin, kaba, lusud gedig len leic yen lacecim an areg yen meigdoc ebdebin an ginohob, kaba, len lagunya debin yen toua. Anai len, kaba, len lemouwan naugb len lesogwa deisa Allah mohotimei mohw an men geicara gin deitero. Doba len louwan laimo areg len merdoc etrij icira gin dous. Hang sug len leiya, doba yen yeic meijuwemougb esesa naugb yen youwan yaimo areg Allah arougb yen an gini terimda, kaba, len lobohuba dara len lesbes an yen toua namcir.

¹⁹ Dangga hang, len gin, kaba, len lemeic meruwemougb esesa naugb sug len merdoc dag hom dara yen touwero. Doba len louwan naugb lekeba yen daum dous. Anai len lemaimo Mena Gogoufu en mer aud areg en arougb len an ginero. Doba len laimo areg len merdoc etrij icira se cinogo gin dous.

²⁰ Doba dan indagunerij, dara dan indamouwerij, naugb yen, kaba, areg yen meigdoc ebdebin an ginohob, kaba, yen yogo augwan gini dag buc gototo se yen meigdoc mes. Anai areg yen meigdoc ebdebin an gin, kaba, ecabeci. Hanoba mera eisaugb edreg dau areg gus augwan toua namcirohob. Hang yen yousem naugb yen yohud meijen tu icira buc misen gin toua. Dauntoba yen yedag lusud mos se gin toua terimda. Dara yen yemarges dau sug yen yocuncum dou Allah touwero. Doba yen yeicara dangga esesa terimda, aimo dau areg Mena Gogoufu arautut yen aud gin toua.

²¹ Anai sug yen yeicara dag gin, kaba, Allah medoc emesrougb an yen touwero. Doba sug yen yeigtou yateteij naugb Lona Sug Maman Adehsud En Ecicugwen, kaba, eic dag en medoc an yen toua. Hang se Lona ingga, kaba, maman Adehsud Yesus Krisdus emeic maireseb menau geb huhugb dou yen toues. Anai en medoc eineg an yen namcirohob.

²² Dara yen yemenara ucucugb an yen meisir se Krisdus gedig len leija meruwesaba gin touwero. Doba yen meigdoc eineg an len naugb yen yenara yad len merdoc mes. Dauntoba len toua merdoc eica areg yen meigdoc ebdebin an ginohob augwan toua terimda.

²³ Dara leng laimo ucina aud dum smougb ucugwohob, kaba, yen meigdoc emagadgeij an len touwero. Doba yen meigdoc eineg an len naugb yen yeigdoc len dau ucina aud dum smougb gini aud ucina misen ucugb toua. Doba sug yen yahwan len dau dum smougb aud maireseb menau geb huhugb ucugb dag gin, kaba, yen meijus eiseisem dau len. Hanoba yen yebehnehino yenin dau meren geicara sug nosa gini toua namcir. Dauntoba meren geicara gini emeic gogor dou yen touwero. Anai meren geicara augwan, kaba, ecgu namcirohob.

²⁴ Doba Allah, kaba, en mobisamougb namcir naugb sug yen yemobsara dau ucina aud maireseb menau geb huhugb gin touwero. Doba en ahwan yen terimda yen yedebeij en se men maija moc gogouf cucugb gin touohob. Hanoba en eseyeiyo yen se ucina gin toua, dauntoba aremer hom emdagunya debin yen touwero. Doba yen yecabeci deseino en. Dara yen yagahugouhw an en beb huhugb namcir toua.

²⁵ Dangga hang, maman mamarges dau sug maman magahugouhw an Allah dara maman maigdoumesa en moho agas medam touwero. Doba sug maman madag hom dara maman Adehsud Yesus Krisdus dag ginohob, kaba, maman maicara maimo dag gin beb huhugb namcir. Anai enin dous eng Allah mohora hom gedig en eigdoc maman dau sesar men gogom augwan ginohob. Dara enin dous eng eigtou se gogouf cucugb. Hanoba enin eng edag mougt mera medam naugb en moho aiga augwan. Dara enin eng mobisamougb naugb en esedougwo areg en ahasesei augwan dau sugraga terimda beb huhugb gin toua. Augwan gini asesa dag misen namcir.

Yudas

Video Yudas 1

Ikuti Kami:

KONTAK | PARTISIPASI | DONASI