Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Puari-puari sai radu diurau rik sai dikasihi nihan ulih-Ni Allah Bapa rik dijaga untuk Isa Almasih. Sebagai jelma sai ngebantu Isa Almasih, nyak -- Yudas -- puari Yakobus,

² ngeharap: Semoga Allah ngeni berkat, rahmat rik sejahtera sai belimpah-limpah jama niku.

³ Puari-puari sai tecinta! Nyak temon-temon bemaksud nulis surat jama niku tentang keselamatan sai ram jejama radu alami. Kidang tano nyak ngerasa tedurong ngeni petuah keti jama surat inji in keti terus bejuang untuk iman sai radu sekali dikeniko Allah untuk selama-lamani jama umat-Ni.

⁴ Mani tanpa ram sadar, wat kelompok-kelompok sai tantu kuruk mik tengah-tengah ram. Tian jelma-jelma bejat sai memutarbalikko kabar tentang rahmat-Ni Allah ram, untuk masa kesempatan ngelampiasko hawa nafsu tian. Rik tian nulak Isa Almasih, satu-satuni Sai Bekuasa rik Tuhan ram. Radu jak tumbai hukuman untuk tian radu dinubuatko delom Alkitab.

⁵ Sunyinni ano keti radu pandai. Kidang nyak mirak ngingokko keti tentang injuk repa Tuhan nyelamatko umat Israel jak negeri Mesir, kidang radu jak seno ngebinasako jelma-jelma sai mak percaya di hantara tian.

⁶ Ingokdo juga para malaikat sai ngelampaui batas-batas kekuasaan tian, sehingga mak ninggalko rang tinggal tian. Allah ngikok malaikat-malaikat udi jama rantai abadi, di delom rang sai kelam di debah bumi. Di dudi tian ditahan terus sampai hukuman dijatuhko mik atas tian pada Rani sai hibat udi kanah.

⁷ Ingokdo juga kota Sodom rik Gomora rik kota-kota di sekitarni, sai pendudukni ngelakuko hal-hal injuk sai dilakuko ulihni malaikat-malaikat ano. Tian ngelakuko hal-hal sai hajor rik bejat, sehingga tian disiksa jama hukuman apui sai kekal, untuk dijadiko peringatan bagi sunyin jelma.

⁸ Renodo juga kelompok-kelompok udi ngekhayal nyani dusa tehadap badan tian tenggalan. Tian memandang rendah kekuasaan-Ni Allah rik ngehina makhluk-makhluk sai mulia di surga.

⁹ Mikhael tenggalan jadi kepala malaikat-malaikat, mak pernah injuk reno. Waktu ia betangkar jama iblis delom perselisihan tentang sapa sai haga mansa mayat Musa, Mikhael mak bani ngehakimi iblis jama cawa-cawa penghinaan. Mikhael angkah cawa, "Tuhan haga ngebentak niku!"

¹⁰ Kidang jama cawa-cawa sai ngehina, jelma-jelma udi nyerang sunyin hal sai tian mak ngerti. Tian gegoh injuk binatang-binatang sai mak ngedok akal, sai pandai hal-hal delom hati lunikni. Kidang justru hal-hal udido sai nyebabko kehancoran tian.

¹¹ Celakado tian! Tian radu nutuk jalan sai ditempuh ulihni Kain. Ia mansa duit, tian ngejerumusko diri delom kesesekan, gegoh injuk Bileam. Rik tian pun dihancorko mani ngeberuntak injuk Korah.

¹² Waktu keti ngadako pesta mengan, sikap jelma-jelma udi memuakko di hantara niku. Mani tian rakus mengan tanpa liom-liom, rik angkah mementingko diri tenggalan. Tian juga injuk awan sai ditiup ulih angin, kidang mak ngeratongko labung. Tian juga injuk batang sai mak ngehasilko uah walaupun musim uah-uahan, batang-batang sai radu dicabut bakakni rik radu mati sama sekali.

¹³ Gegoh injuk umbak sai ganas di laok nimbulko buroh, reno juga tian ngeburohko perbuatan-perbuatan sai ngeliamko. Tian injuk binatang-binatang sai mengembara rik sai radu disediako rangni ulih-Ni Allah di delom kekelaman sai dasyat nihan untuk selama-lamani.

¹⁴ Henokh, keturunan kepitu jak Adam, tumbai pernah menubuatko tentang jelma-jelma udi. Henokh cawa, "Liak, Tuhan haga ratong jama beribu-ribu malaikat-Ni sai suci

¹⁵ untuk ngehakimi sunyin jelma. Tuhan haga ngehukum jelma-jelma jahat mani perbuatan-perbuatan tian sai bejat. Rik Ia haga ngehukum jelma bedusa rik durhaka mani sunyin cawa sai ngehina diucakkoni."

¹⁶ Jelma-jelma udi selalu gaoh ngomel rik nyalahko jelma bareh. Tian hurik nutuk kemirakan-kemirakan tian sai bedusa. Tian balak awak tentang diri tenggalan, rik ngebelek jelma in mansa untung.

¹⁷ Kidang Puari-puariku sai tecinta, ingokdo api sai tumbai diucakko ulih rasul-rasul-Ni Tuhan Isa Almasih.

¹⁸ Tian ngeni pandai lebih mena jama niku bahwa redik akher zaman haga muncul jelma-jelma sai haga ngereneh keti, yakdo jelma-jelma sai hurik nutuk kemirakan-kemirakan tian sai bedusa.

¹⁹ Tian injido jelma-jelma sai nimbulko perpecohan. Tian mak dikuasai ulih Ruh-Ni Allah, melainko ulih kemirakan-kemirakan tabiat dunia.

²⁰ Kidang keti, Puari-puariku, usahakodo terus hurikmu bedasarko percayamu jama Isa Almasih. Imanmu ano suci nihan. Sementara ano beduado jama kuasa Ruh-Ni Allah,

²¹ rik hurikdo selalu di delom naungan kasih-Ni Allah selama keti nunggu rahmat-Ni Isa Almasih Tuhan ram, sai haga ngeniko jama niku hurik sejati rik kekal.

²² Tehadap jelma-jelma sai bimbang hatini, hagani keti nunjukko rasa kesian.

²³ Tarikdo jelma mik luah jak delom apui untuk nyelamatko tian. Tehadap jelma-jelma barehni hagani keti nunjukko rasa kesian disertai perasaan rabai, kidang nyuohko bahwa kawai tian pun sai radu dikamakko jama kemirakan tian sai bedusa.

²⁴ Allah, sai sanggup ngejaga in keti mak tumbak, rik sai sanggup ngusung niku mik hadirat-Ni sai mulia jama sukacita rik tanpa cela,

²⁵ Iado satu-satuni Allah, Penyelamat ram liwat Isa Almasih Tuhan ram. Iado Allah sai mulia, agung, bekuasa rik bewibawa radu jak tumbai sampai tano rik untuk selama-lamani! Amin.

Yudas

Video Yudas 1

Ikuti Kami:

KONTAK | PARTISIPASI | DONASI