Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sura ide hangko iriko Yudasi, hawina Yesu Kerisitu hai halaluna Yakobu. Kupakatu sura ide irikamu halalu au nakakio Pue Ala Umanta mewali taunaNa. Pue Ala mampokaahikau, hai Yesu Kerisitu ina mokampai liliukau duuna i kahaweNa hule.

² Kuperapi bona tetambai kamaahina hai pewatina Pue Ala irikamu hai bona Naweikau roa ngkatuwo.

³ Halalu au kupokaahi! Nguru-nguruna kekuukiakau sura ide bona kupahaweakau kana i katuwo maroa au tahumba sambela hangko i Pue Ala. Agayana ide-ide, tediimi lalungku mobaliki tunggaiaku au nguru-nguruna. Ide-ide kuukiakau sura ide bona nipakaroho pepoinalaimi i paturo au tou hai bona niewa liliuhe tauna au moanti paturo au masala. Lawi Pue Ala mopahawe paturo au tou irikita ope-ope au mewali kiraNa bona iti au tapoinalai, hai paturo iti bara peisa rabaliki.

⁴ Kuuli ope-ope ide lawi arahe guru agama au mesua i olomi au moanti paturo au masala. Rauli tauna iti, kaihirana halalunta hampepepoinalai, agayana katouana barahe mengkoru i Pue Ala. Rauli tauna iti, peisa mpuuke mopabukei peundeana lalunta au kadake, lawi maahi laluna Pue Ala. Kadake mpuu paturonda iti, lawi mobalikihe paturo au tou kana i kabulana laluna Pue Ala, hai mosapuakahe Datunta hai Amputa, iami Yesu Kerisitu. Ia pea au hintoto tapengkorui. Guru au mepakanawohe iti, ina rahuku, lawi hangkoya ara mpuuhe nabi au mampololita kana i pehukunda au napakanotoahe Pue Ala.

⁵ Mewali, halalu, katouana niisa mpuu ope-ope au kuuliangaakau ide. Agayana nauri nodo, kupeinao kupopaingaakau noumba pehukuna Pue Ala i tauna au kadake babehianda. Hangkoya Pue Ala mokabaha to Yahudi au bosa hangko i tampo Masiri. Agayana roo indo, arahe au bara mepoinalai Iria. Mewali tauna iti Napapatehe i pada wungi.

⁶ Nikatuinao wori malaeka au maida i suruga hangkoya. Hantangahe moliungi tampana kuasanda, hai mopalehihe paidaanda. Malaeka iti nahiluhe Pue Ala hai rante au bara ara kamabotuna, hai Natahahe i lalu paidaa au makaindi, hai ina Nataha liliuhe duuna hawe tempona hinangkana kara-karanda Napohuda-hudaa i alo pobotusi au mewulungai.

⁷ Nikatuinao wori kota Sodomo hai Gumora hangkoya hai boea ntanina au hungku. Ampu boea iti mobabehihe nodo au rababehi malaeka au kupololita inona. Mebualosihe, mobabehihe sala hai ngkaya babehianda au merikai, duuna boeanda rahuwe. Pehukuna Pue Ala i to Sodomo hai to Gumora iti mewali pandiri i ope-ope tauna, hai peisa rapandiri nodo api naraka au bara ara kahopoana au mohuku ope-ope tauna au kadake babehianda.

⁸ Mewali, nauri nodo pehukuna Pue Ala hangkoya i tauna au kadake babehianda, batena kadake liliu pea babehianda tauna au mepakanawo ide-ide. Topangipi-ngipi itihe, tedii lalunda i paturo au masala, ido hai mopakedai peahe watanda hai babehianda au kadake. Mosapuakahe kuasana Pue Ala, hai mopakoihe ope-ope au makuasa i suruga.

⁹ Mogalori Mikael au motadulakoi ope-ope malaeka, bara bai mopakoi Datu Tokadake. I kapatena nabi Musa, mombehahanaihe kana i watana Musa ba hema au ina mangala. Mikael bara bai mopapakoi Datu Tokadake hangko i kuasana haduduana, agayana nauliangaa pea: "Pue haduduaNa ina mampokarumpuko!"

¹⁰ Agayana guru au mepakanawo iti, mopapakoihe au makuasa au bara raisa. Au raisa pea, babehia au nodo binata au bara ara pekirinda. Hai anti babehianda au nodo, ido hai ina molambihe pehuku.

¹¹ Marugihe! Moula peahe rara au naporarai Kai hangkoya. Mampeulaihe babehiana Bileam, lawi naurihe moisa kamasalana babehianda, batena iti au rababehi liliu, lawi mohaoki peahe doi. Moewahe Pue Ala nodo Kora hangkoya, hai batena ina nahuku mate worihe Pue Ala nodo Kora.

¹² I pogulu-guluami, guru au mepakanawo iti maandehe hihimbela hai ikamu nodo rangami, agayana mepakaea mpuu babehianda. Ane moguluhe hihimbela hai ikamu, mehioro mpuuhe hai mampekiri peahe watanda. Ihira nodo gawu au nawui himburu agayana bara mopaara uda. Ihira nodo kau au bara maroa: ane hawe tempona mowua, bara ara wuana. Ido hai rawuka peami alana bangi.

¹³ Ihira nodo balumba tahi au moanti ngkaya pupu, lawi tongawa babehianda au mepakaea pea. Ihira nodo betue au bara manoto polumaona. Rauli, moantihe kamabaa, agayana mepakanawo peahe! Pue Ala mopasilolongaahe paidaa au meruu kamakaindina. Ina maidahe inditi duuna kamahae-haea.

¹⁴ Ara lolitana Heno hangkoya au mampololita pehukuna Pue Ala i guru au mepakanawohe i tempo ide. Heno iti iami pemuleana Adama kapituna lapina. Nauli node: "Tou-tou Pue ina mai hihimbela hai malaekaNa au malelaha au bahangkia sabuna kabosanda.

¹⁵ Ia ina mai mampohuda-hudaa kara-karanda ope-ope tauna, hai Ia ina mohuku ope-ope tauna au mosapuaka kuasaNa anti babehianda au kadake. Ope-ope tauna au bara mengkoru Iria ina Nahuku, hai ope-ope lolitanda au mopapakoi Ia ina Nahurungiahe."

¹⁶ Guru au mepakanawo iti mohume-hume liliuhe hai mekakabosaihe. Moula peahe peundeana lalunda au kadake. Anti ope-ope babehianda, mampemahilehe, hai moore-orehe ranganda lawi mampeinaohe mangala lalunda bona mohumbahe rasi.

¹⁷ Agayana ikamu halalungku au kupokaahi, hangangaa nikatuinao apa au rauli surona Amputa Yesu Kerisitu hangkoya.

¹⁸ Au paka rauliangaakau iami: i alo-alo au ina hawe hangko damani alo pobotusi kahopoa dunia, arahe tauna au ina mampopowadi-wadi pepoinalainta. Moula peahe peundeana lalunda au kadake, hai barahe mengkoru i Pue Ala.

¹⁹ Tauna au nodo mopaarahe posisisala i ranganda. Barahe nakuasai Inao Malelaha, nakuasai peari peundeana lalunda.

²⁰ Agayana ikamu halalungku au kupokaahi! Hangangaa mombepakaroho mpolalukau bona maroho pepoinalaimi, lawi paturo au tapoinalai ide malelaha mpuu. Mekakae liliukau moula peninina Inao Malelaha.

²¹ Pue Ala mampokaahikau. Mewali, nipamaroa-roa mpuu babehiami bona tuwo liliukau i lalu ahiNa iti. Hai mampegiakau pewati au ina naweike Amputa Yesu Kerisitu i kahaweNa hule. Au ina Naweike iami katuwo maroa au bara mokahopoa.

²² Ane arahe tauna au bata-bata mani pepoinalainda, nipokaahi wohiraya.

²³ Ane arahe au mehupe hangko i pepoinalainda, ninini hulehe bona molambihe katuwo maroa. Ane nibabehi nodo, ihira ina tehorema hangko i pehuku nodo tauna au rahore hangko i api. Agayana ara worihe tauna au rumihi kamadosanda, au moula peahe peundeana lalunda au kadake. Nipokaahi wohiraya, agayana maroa-roakau bona datikau teanti-anti i lalu dosanda. Nipokaahihe tauna au madosa, agayana nikahihi dosanda. Dosanda iti niimba nodo hampi au kedai.

²⁴ Toyami Pue Ala lawi Ia au makuasa mokampaikau bona datikau manawo, hai Ia ina mokadipura liliukau duuna meangkakau i lindoNa i lalu peawaNa hai barapi ara kamasalami hai matana lalumi.

²⁵ Pue Ala, au bara ara kasimbelana, Ia au mohoremake hangko i huku dosanta anti kanapahurunta Yesu Kerisitu Amputa. Tapakahile hangaNa lawi Ia pea au meawa, au mahile tuwoNa, au makuasa hai au merae, mepongka hangkoya, duuna ide-ide, hai duuna kamahae-haea. Amin!

Yudas

Video Yudas 1

Ikuti Kami:

KONTAK | PARTISIPASI | DONASI