Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ki zep hen Alap mo dam taha nakore zini in ëna iwe de weyana ap goltrëblaka. Zen hëndep de ëgwën hap de weyasa. Weyana in lalak tanganna– men kiye, kaca lalakna. Zen Alap zëre mo komal tum nakon tine gwenan– men zëwe Zëna Domba Tane zem in han inikin gwendake.
2 Weyana in dekon tine gwenan ëna iwe de ora ngïrïnnïk. Hen ho alpnak iwe ëngaya gwen hap de tenya hen ki eihya-alp eihya-alp san ëzauk sone gwenan. Zen ben jamkam eini ëtë gwenan. Zëno ala nakon sa tïngare zi ausuna sang-sang nakon ëdawem gwe-gwer.
3 Alap mo husus gwibinni bëjen ëna iwe etan jowen, sap Zen dekon sa Zëna Domba Tane zem in han zerïrïk gïl gwera. Zëwe de zini Alap en hon sa lowehe gwer.
4 Zen sa Alap mo nwe-masena kara da gweblal, hen Alap sa zëre mo bosena zëno mae mo mirenak ale tabir-zimdi.
5 Zen molya yakla ngatan naban lampu ngatan naban dwam neizimk, sap zëwe Bian Alap Zën sa yakla mo kim ngatan gwe-gwera. Zëwe de lowehen wenya dekam teipsïn zi mo kim sa tïngare langna hëndep denaban ïrïk nïl gwer.
6 Hwëna ki zep Alap mo dam taha nakore zini in asa gubluka, “Kïtak mensa namen sane gwenda, zen eiwa dena hen taïblïbin tanganna. Zini men zen Bian Alap mo ola aha zi hip ayang nulzimnira gwenan, zen Bian Zëna desa enho nakon golëlowehe gwenda. Zen zep namen asa zer sonera– dekam de kïtak Zënaka de betek gweblan wenya ebe mae hap hamal hap anakan goltreizimdin hip, ‘A kirekam sa nabakam jower.’”
7 Yesus hen dekam zep gu aneka, “Emki ësan: Ëe asa nabakam hatazal. Men zen de bukuna an mo hamal hap de ol tan-tan san ang taꞌak, hëꞌho gwibinni zëbon mae onak lwaꞌan.”
8 Ëe an Yohanis mesë kïtak ansa ëre mo nwekam hlauk hen ikim sane gwek. Kim hya gwesïk, ki zebë Alap mo dam taha nakore zini in mo nwenak ïk gwe hezak– in zen kïtak abe hap goltrëblaka, dekam de desa boltere tan hap.
9 Hwëna ki zep asa gubluka, “Bahem! Asa bahem boltere tan. Sap ëe hen Zëbon de babu gwen zi– in ki hen em, hen in ki hen wal bose wal om, in zen Yesus hup de ol dawemna ayang nulzimnira gwenanke. Ëe hen deban mae apdenak– tïngan men zen bukuna an mo ol san ang ta gwenanke. Diki Alap Zëna en naka em boltere tan.”
10 Ki zep etan asa gubluka, “Bukuna an mo hamal hap de ola bahem aning gun, sap angkam mes kirekam de kïtak jowen hap denak golek de gwer.
11 Zi jal-jala dikire jal-jal enkam lowehe gwek. Men zen enlala karek-karek naban lowehe gwenan, dikire zëre mae mo timsi karek nul gwek. Men zen Alap mo dwam gwibin sin ang ta gwenan, dikire desan en ang ta gwek. Hen enho lalakkam de lowehe gwen wenya, dikire kire enkam lowehe gwek.”
12 Yesus ki zep etan gu aneka, “Emki sap ëenlala gwen: Molya holo gwek Ëe ki asa hatazal. Dekam asa tïngare zi hip golzimzir– men kire enkam zëre mae mo syala lwazimkye.
13 Ëe an nonol lonesen nakore Zi hen aumwa topnak de Zi. Okama yang gulsun srëmnakë gwëk, hen okama hom gwennak Ëe nama asa gwër.
14 “Zini men zen zëre mae mo pakeanna ano kalkam ngan dasibik hëꞌho gwibinni zëbon mae onak lwaꞌan. Sap zëbe mae hap Ëe asa golzim– dekam de ëna awe bïtï gwen hap denaye, hen ëngaya gwen hap de tetan dansa de twenblanda gwen hap denaye.
15 Hwëna anakarekam de zini molya awe bïtï gwezak: Enlala kawesïn zini, meiyer hlaul gwen zini, kahalo soson zini, zi ta gwen zini, yang tabin dowalsa de betek gwibirida gwen zini, hen boton tam zini. Kirekam de zi hip hen mes srën ëna hamal dazimk.
16 “Ëe an Yesus. Ëe mesë ëre mo dam taha nakore zini insa Yohanis hip zer soneblak– zen de hamal hap de ol tan-tanna ansa Yohanis hon tïngare Kristen zini ebe mae hap golzimdin hip. Ëe an Daud Bak mo ausu nakon de saltïn Zini– mensa nen guk gweblakke. Ëe an Zen– hleng gwen hap de zïl gwen keis niye.”
17 Alap mo Enhona man guꞌura, “Alap mo Domba Tanena in dikire nabakam hatak!” Tïngan men zen ansa ësane gwenan, dikire hen anakan ëguk, “In eiwa, dikire nabakam hatak!” Domba Tanena in sa deban mae golëlowehe gwera– san de we wal zeban de golgwë gwenna kiye. Sap Yesus Zën gubiridaꞌara, “Men zen ëho-hole gweꞌan, emki Abon onak yaïng gwezan. Sap esa totoresa ëngaya gwen hap de hona ansa ulin– ba maesa de syal gwibin srëmkam!”
18 Ëe, Yohanis, ëe ama jalse gwen ola ansa ebe mae hap golzimꞌin– tïngan men zen bukuna awe de hamal hap de aïsïlï ansa ësane gwe-gwenanke: Men nara zëre mo enlalakam aïsïlï an kon mas-mas nuꞌik, Alap sa zëbe mae hap karekna mas gulzimdi– men kirekam okamanak de zisi de heip gun hup de ola bukunak awe lwakke.
19 Hen kirekam– men nara bukuna an kore aïsïlsï jek-jak gunnu. Kire zini molya ëngaya gwen hap de tenya in mo danna dwinbik, hen molya ë lalakna iwe bïtï gwek– men kirekam bukunak awe srip gulsukye.
20 Dekam zep Yesus, men zen tïngare bukunak de ola ansa nëbe mae hap golzimꞌira, etan gu aneka, “Eiwa tangan, Ëe nabakam asa hatazal!” Ëe ki zebë ding gulbluk, “In aïrïs, Bian Yesus! Emki nabakam hatazan!”
21 Aya-wal oso-wal, dikire Bian Yesus mo kwasang-kwasangna tïngan ebon mae onak lwa gwek.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA