Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ba i'oroma'õ khõgu gõi mala'ika andrõ nungo nidanõ si no ohauhau hulõ mbaluri; idanõnia ba fangorifi. Idanõ andrõ mangele i'otarai dadaoma Lowalangi ba Ono Mbiribiri andrõ,

² adõlõ ba dalu newali mbanua andrõ. Ba zinga nungo nidanõ andrõ, faoma fatambai ba no so dõla geu umbu wangorifi, sowua felendrua kali bakha ba zi dõfi, ya'ia samuza ero sara waw̃a. Bulunia ba te'oguna'õ ba wamadõhõ fõkhõ soi fefu.

³ Ba bakha ba mbanua andrõ ba lõ sa'ae tesõndra zi gõna fangelifi Lowalangi. Ba dadaoma Lowalangi ba Ono Mbiribiri andrõ so dania bakha ba mbanua andrõ. Lafosumange dania Lowalangi ira enoni Lowalangi.

⁴ La'ila dania mbaw̃a-Nia. Ba musura dania ba gangangora dõi Lowalangi andrõ.

⁵ Ba lõ moguna khõra haga wandru ba ma haga luo, bõrõ me lõ si bongi sa'ae, ba bõrõ me So'aya Lowalangi samõsa zohagaini dania ya'ira. Ba mamatõrõ dania ira si mane razo sagõtõ fa'ara.

⁶ Ba imane khõgu mala'ika andrõ, "Sindruhu daroma li andre ba nifaduhusi tõdõ. Ba So'aya Lowalangi, same'e Eheha-Nia khõ ndra sama'ele'õ, zi no mamatenge mala'ika-Nia ba wangoroma'õ ba genoni-Nia hadia zi lõ ara tõ lõ tola lõ alua."

⁷ "Mitõngõni da'e!" Iw̃a'õ Yesu, "Lõ ara tõ ba so Ndra'o. Ya'ahowu niha sanõngõni taroma li fama'ele'õ bakha ba mbuku andre!"

⁸ Ya'o, Yohane, zi no mamondrongo ba si no mangila ma'afefu da'e. Ba me no aefa urongo ba u'ila ia, ba alau ndra'o fõna mala'ika si no mangoroma'õ ma'afefu da'õ khõgu, ba mangalulu ndra'odo khõnia,

⁹ ba imane khõgu, "Bõi! Bõi angalulu khõgu! Angalulu khõ Lowalangi! Bõrõ me enoni gõi ndra'odo si mane ya'ugõ, ba si mane ira talifusõu sama'ele'õ andrõ ba fefu niha sanõngõni menemene bakha ba mbuku andre!"

¹⁰ Ba imane zui khõgu, "Bõi mibini'õ daroma li fama'ele'õ andrõ bakha ba mbuku andre, bõrõ me no ahatõ ginõtõnia alua dania ma'afefu da'e.

¹¹ Niha si lõ sõkhi, ba ya mutohugõ zi lõ sõkhi; ba niha si ra'ira'iõ, ba ya mutohugõ wa'ara'ira'iõnia; ba niha solo'õ somasi Lowalangi, ba ya mutohugõ wolo'õ somasi Lowalangi, ba niha sauri sangosambalõ'õ wolo'õ khõ Lowalangi, ba ya mutohugõ wangosambalõ'õ fa'aurinia ba khõ Lowalangi."

¹² "Mitõngõni da'e!" Iw̃a'õ Yesu, "Lõ ara tõ ba so Ndra'o ba U'ohe luo ba wanulõni ba zamõsana molo'õ nifazõkhinia.

¹³ Si fõfõna Ndra'o ba safuria; Ya'odo Zo'aya i'otarai Mbõrõta irugi Gamozua."

¹⁴ Ya'ahowu niha samabago nukhania irege lõ si ta'unõ. Me ya'ira dania nitehe ba wemanga bua geu fangorifi andrõ ba sowaõwaõ we'amõi bakha ba mbanua andrõ sanõrõ bawa gõli.

¹⁵ Ba niha samalua ngawalõ zi lõ sõkhi, si fakelemu, samalua ngawalõ wohorõ, sange'e, samosumange adu, solau faya, he ba wehede ba ma ba nifalua, ba baero mbanua andrõ so nahara fefu.

¹⁶ "Ya'o, Yesu, si no mamatenge mala'ika andrõ khõu ba khõmi, ena'õ i'ombakha'õ fefu da'e soguna ba mbanua Niha Keriso andrõ. Ma'uwu Dawido Ndra'odo; Ya'odo madala si haga andrõ."

¹⁷ Eheha Lowalangi ba Ono Nihalõ andrõ, lamane, "Aine!" Ba haniha zamondrongo da'e ba lõ tola lõ imane, "Aine!" Haniha zowõkhi tõdõ, ba ya mõi ia! Ba haniha zomasi, ba ya muhalõ nidanõ fangorifi andrõ, ba saohagõlõ!

¹⁸ Ba dozi niha samondrongo Taroma Li fama'ele'õ bakha ba mbuku andre, ya'o, Yohane, ube'e wamangelama da'e: Niha sonõnõ hadia ia ba Daroma Li fama'ele'õ andre, ba Inõnõ dania huku niha da'õ Lowalangi faoma ngawalõ wamakao si no musura bakha ba mbuku andre.

¹⁹ Ba niha sangalõsi hadia ia moroi ba Daroma Li fama'ele'õ andre, ba I'alõsi gõi dania Lowalangi gurakhania si no musura bakha ba mbuku andre -- urakhania moroi ba geu fangorifi andrõ ba moroi ba mbanua ni'amoni'õ andrõ.

²⁰ Imane sama'ele'õ turia andre fefu, "Sindruhu, lõ tola lõ alio so ndra'o!" Yaduhu! Sindruhu! Aine, he So'aya Yesu!

²¹ Ba ya Ibe'e So'aya Yesu howuhowu-Nia ba Mbanua Lowalangi fefu!

Wahyu

Video Wahyu 22

Ikuti Kami:

KONTAK | PARTISIPASI | DONASI