¹ Ki zep hen Alap mo dam taha nakore zini in ena iwe de weyana ap goltreblaka. Zen hendep de egwen hap de weyasa. Weyana in lalak tanganna– men kiye, kaca lalakna. Zen Alap zere mo komal tum nakon tine gwenan– men zewe Zena Domba Tane zem in han inikin gwendake.
² Weyana in dekon tine gwenan ena iwe de ora ngirinnik. Hen ho alpnak iwe engaya gwen hap de tenya hen ki eihya-alp eihya-alp san ezauk sone gwenan. Zen ben jamkam eini ete gwenan. Zeno ala nakon sa tingare zi ausuna sang-sang nakon edawem gwe-gwer.
³ Alap mo husus gwibinni bejen ena iwe etan jowen, sap Zen dekon sa Zena Domba Tane zem in han zeririk gil gwera. Zewe de zini Alap en hon sa lowehe gwer.
⁴ Zen sa Alap mo nwe-masena kara da gweblal, hen Alap sa zere mo bosena zeno mae mo mirenak ale tabir-zimdi.
⁵ Zen molya yakla ngatan naban lampu ngatan naban dwam neizimk, sap zewe Bian Alap Zen sa yakla mo kim ngatan gwe-gwera. Zewe de lowehen wenya dekam teipsin zi mo kim sa tingare langna hendep denaban irik nil gwer.
⁶ Hwena ki zep Alap mo dam taha nakore zini in asa gubluka, “Kitak mensa namen sane gwenda, zen eiwa dena hen taiblibin tanganna. Zini men zen Bian Alap mo ola aha zi hip ayang nulzimnira gwenan, zen Bian Zena desa enho nakon golelowehe gwenda. Zen zep namen asa zer sonera– dekam de kitak Zenaka de betek gweblan wenya ebe mae hap hamal hap anakan goltreizimdin hip, ‘A kirekam sa nabakam jower.’”
⁷ Yesus hen dekam zep gu aneka, “Emki esan: Ëe asa nabakam hatazal. Men zen de bukuna an mo hamal hap de ol tan-tan san ang taꞌak, heꞌho gwibinni zebon mae onak lwaꞌan.”
⁸ Ëe an Yohanis mese kitak ansa ere mo nwekam hlauk hen ikim sane gwek. Kim hya gwesik, ki zebe Alap mo dam taha nakore zini in mo nwenak ik gwe hezak– in zen kitak abe hap goltreblaka, dekam de desa boltere tan hap.
⁹ Hwena ki zep asa gubluka, “Bahem! Asa bahem boltere tan. Sap ee hen Zebon de babu gwen zi– in ki hen em, hen in ki hen wal bose wal om, in zen Yesus hup de ol dawemna ayang nulzimnira gwenanke. Ëe hen deban mae apdenak– tingan men zen bukuna an mo ol san ang ta gwenanke. Diki Alap Zena en naka em boltere tan.”
¹⁰ Ki zep etan asa gubluka, “Bukuna an mo hamal hap de ola bahem aning gun, sap angkam mes kirekam de kitak jowen hap denak golek de gwer.
¹¹ Zi jal-jala dikire jal-jal enkam lowehe gwek. Men zen enlala karek-karek naban lowehe gwenan, dikire zere mae mo timsi karek nul gwek. Men zen Alap mo dwam gwibin sin ang ta gwenan, dikire desan en ang ta gwek. Hen enho lalakkam de lowehe gwen wenya, dikire kire enkam lowehe gwek.”
¹² Yesus ki zep etan gu aneka, “Emki sap eenlala gwen: Molya holo gwek Ëe ki asa hatazal. Dekam asa tingare zi hip golzimzir– men kire enkam zere mae mo syala lwazimkye.
¹³ Ëe an nonol lonesen nakore Zi hen aumwa topnak de Zi. Okama yang gulsun sremnake gwek, hen okama hom gwennak Ëe nama asa gwer.
¹⁴ “Zini men zen zere mae mo pakeanna ano kalkam ngan dasibik heꞌho gwibinni zebon mae onak lwaꞌan. Sap zebe mae hap Ëe asa golzim– dekam de ena awe biti gwen hap denaye, hen engaya gwen hap de tetan dansa de twenblanda gwen hap denaye.
¹⁵ Hwena anakarekam de zini molya awe biti gwezak: Enlala kawesin zini, meiyer hlaul gwen zini, kahalo soson zini, zi ta gwen zini, yang tabin dowalsa de betek gwibirida gwen zini, hen boton tam zini. Kirekam de zi hip hen mes sren ena hamal dazimk.
¹⁶ “Ëe an Yesus. Ëe mese ere mo dam taha nakore zini insa Yohanis hip zer soneblak– zen de hamal hap de ol tan-tanna ansa Yohanis hon tingare Kristen zini ebe mae hap golzimdin hip. Ëe an Daud Bak mo ausu nakon de saltin Zini– mensa nen guk gweblakke. Ëe an Zen– hleng gwen hap de zil gwen keis niye.”
¹⁷ Alap mo Enhona man guꞌura, “Alap mo Domba Tanena in dikire nabakam hatak!” Tingan men zen ansa esane gwenan, dikire hen anakan eguk, “In eiwa, dikire nabakam hatak!” Domba Tanena in sa deban mae golelowehe gwera– san de we wal zeban de golgwe gwenna kiye. Sap Yesus Zen gubiridaꞌara, “Men zen eho-hole gweꞌan, emki Abon onak yaing gwezan. Sap esa totoresa engaya gwen hap de hona ansa ulin– ba maesa de syal gwibin sremkam!”
¹⁸ Ëe, Yohanis, ee ama jalse gwen ola ansa ebe mae hap golzimꞌin– tingan men zen bukuna awe de hamal hap de aisili ansa esane gwe-gwenanke: Men nara zere mo enlalakam aisili an kon mas-mas nuꞌik, Alap sa zebe mae hap karekna mas gulzimdi– men kirekam okamanak de zisi de heip gun hup de ola bukunak awe lwakke.
¹⁹ Hen kirekam– men nara bukuna an kore aisilsi jek-jak gunnu. Kire zini molya engaya gwen hap de tenya in mo danna dwinbik, hen molya e lalakna iwe biti gwek– men kirekam bukunak awe srip gulsukye.
²⁰ Dekam zep Yesus, men zen tingare bukunak de ola ansa nebe mae hap golzimꞌira, etan gu aneka, “Eiwa tangan, Ëe nabakam asa hatazal!” Ëe ki zebe ding gulbluk, “In airis, Bian Yesus! Emki nabakam hatazan!”
²¹ Aya-wal oso-wal, dikire Bian Yesus mo kwasang-kwasangna tingan ebon mae onak lwa gwek.