Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Iageti malaika nenda leú et, amasisaú-saú ka tubukku, oinan purimanuaiat. Bagat oinan néné, makirisau kelé kristal, samba aimuguguruk sibara ka uddenan purimataat Taikamanua, samba purimataat Togat Biri-biri,
2 ka talagat enungan laggai nenda. Ka bet-bet oinan nenda, ka rua ngasilánia, ai loinat bubuakat purimanuaiat, sipububua, pulu rua ngamitsá ka bagat sangarura, iaté sangamitsá sangalaggó ipubua. Buluknia momoi itupakei, masialeaké tai bangsa.
3 Ka laggai nenda, tá anai sia beri sara siorak pateleiat Taikamanua. Uddenan purimataat Taikamanua, sambat Togat Biri-biri, tukakau ka laggai néné. Ka tubunia te rapaniniddou sapaguguletnia,
4 samba raitsó matania. Oninia tususurat'aké ka tou-toura.
5 Táan leú maperlu ka sia alito sambat torot matat sulu, aipoí táan anai soibó; Tuhan Taikamanuangan lé poí, itotoroji sia. Iageti purimataddangan leú et, teret buru-burú.
6 Iageti kuanangan nia malaika ka tubukku, "Tiboiet néné bulat sibulatnia, samba katonemiet. Tuhan Taikamanua sipanguruat'aké Ketsatnia ka tubudda tai nabi, aikoiniakéan malaikania, bulé rapatoilá, ka tubut pakoinietnia, aponia sipuaaili simaruei."
7 Oto pelé nga-ngan Jesus, "Lelek'aké kam néné! Táan mauju kuoi. Mauktuk te sia sireddet sibalat, ka bagat buko néné!"
8 Aku té néné si Johannes, akuarep'an samba akuitsóan sangamberinia néné. Lepá akuarep samba akuitsó nia néné, purappokkungan ka matat malaika, sipasitotoiláaké sangamberinia ka tubukku; oto aikugegelai kupaniddogi nia,
9 kuanangan ka matakku, "Tá kisedda! Bá paniniddogi aku! Taikamanua lé paniddogi! Aipoí aku kaku leú et, pagugulet leú et, kelé ekeu, samba kelé sasarainam tai nabi leú et, samba sangamberi simareddet ka sitonéakenen buko néné!"
10 Lepá kuanangan mitsá, "Buí nupakele nia, sangamberi sibalat ka bagat buko néné, aipoí amalegrengan tetrenia ipuaili sangamberinia.
11 Eddangan nia rariu-riuaké mugalai jo, ka sia sijo, sia kasit-sit'akenen, eddangan nia rakau tubudda kasit-sit'akenen, siobá masireddet siobat bagat Taikamanua, edda imariu-riu rareddet siobat bagat Taikamanua, sia sikokoiakenen ka Taikamanua, edda ramariu-riu rapurimanua simakokoi ka Taikamanua."
12 Iageti kuanangan nia Jesus, "Lelek'aké néné! Táan mauju oi aku, kuabbit upa, masilumun'aké sangamberi sirimanua, siripot sigalaira.
13 Aku té néné siboikí, sambat sikatei-tei; aku té néné Tuhan Panandaatnia, samba Kalepakatnia."
14 Mauktuk te sia sipaliná saraubára, pat liná, bailiu bara hakra, masikom buat loiná purimanuaiat, samba oi ratugurú ka laggai, ka matatbaliu geratnia.
15 Tápoi sia geti sigalaiaké galajet sikataí, sipugagaut, sipusisilainge, sipasimamateiaké sirimanua, sipasibubuluji sabulungan, samba sipaboboko, ka titiboat elé ka galai tubu, ka tei-tei irip laggai lé kudduatra, sangamberidda néné.
16 "Aku sipuoni Jesus té, amasikoiniaké samalaikakku ka tubumui, bulé isegéaké nia, pagalaiat néné, ka tubumui, sibailiu puuktunganda sapaamian. Punuteteu Dapid te aku néné; aku té nenda usutat simapató."
17 Iageti kuanangan nia Ketsat Sipunenan sambat Talimouakenen Sinanalep, "Konan kam!" Sangamberi sipasiaarep néné, buítá leú et rakua ka sia, "Konan kam!" Kasei simaonggou kau ioi! Kasei siobánia, kau raalá oinan purimanuaiat, sitá saki.
18 Kasei sipasiarep sibalat ka bagat buko néné, aku sipuoni si Johannes, ikua ka matamui: ké ratuppai baí apa pá, ka tiboiet sibalat néné, tuppainangan leú et ukumanda Taikamanua, iaté sangamberinia paoreat, sitularat'akenennia ka bagat buko néné.
19 Iageti, ké ai sia sibeleki, rubeiat sibalat ka bagat buko néné, belekinangan leú et rubeiatnia, Taikamanua, ka sitularat'akenennia, ka bagat buko néné, iaté rubeiat sibara ka loinat purimanuaiat, samba sibara ka laggai sipunenan néné.
20 Oto nia sipasisesegéaké sangamberinia katuareman néné masikua, "Sibulatnia, táan mauuju kuoi!" Amen! Konan'an ale Tuhan Jesus!
21 Bulé ikau panguruatnia Tuhan Jesus, ka tubudda sangamberi paamian Taikamanua!
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA