Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Melaikat ineh nemada' sirenku aceh bued abpa' luk panu' ku abpa' luk mulun, mesor mepad kudeng gelas luk pelaba' do', luk manud remuat ratnan kerusi Allah idi Anak Dumba ineh.

² Idi nan uned dalan bawang ineh, dipar déi' idi dipar tungé', abpa' ineh inan aceh lawa ulun luk kebua' pulu' dueh kua' bang selak, ieh ineh anid-anid bulan; idi don-donneh ineh miak ku ngedo' amung-amung pupu.

³ Idi na luk idi anun-anun luk kidiman Allah bang bawang ineh. Kerusi Allah idi Anak Dumba ineh idi bang bawang ineh. Idi demulun-demulunNeh miak sembayang Neneh.

⁴ Ideh miak nier kiungNeh, idi ngadanNeh uen ngayud nan madu'deh.

⁵ Idi na luk idi dacem teh, idi ideh na sikal ku acang ilu' idi acang aco pana', ngaceku Tuhan Allah sebuleng mangun ku acangdeh, idi ideh miak ngimet macing ruked-ruked peh.

⁶ Idi kebala melaikat negku, "Amung-amung bala ini lutep idi matu. Idi Tuhan Allah luk nemaré roh kuan nabi-nabi ineh, pangeh nengecuk melaikat mada' demulun-demulunNeh ratnan luk na miak na macing dengan mesaget."

⁷ Kebala Yésus, "Ngerawé do'-do', Ui macing dengan mesaget." Samal kuan lemulun luk maya' amung-amung bala luk biré bang surat ini.

⁸ Ui ini Yahya pangeh neninger idi nenier amung-amung ini. Kareb pangeh pindenger idi sinierku, ui netekeradung sembayang inan melaikat luk nemada' amung-amung ineh sirenku.

⁹ Iamo' kebalaneh negku, "Aleg nganau' ineh. Ui pana' mepad teh kudeng iko, idi mepad kudeng kinanakmu teh, ieh ineh nabi-nabi ineh, idi mepad kudeng amung-amung lemulun luk maya' bala surat ini. Do' sembayang inan Allah!"

¹⁰ Idi kebalaneh negku, "Aleg iko ngalum amung-amung bala bada' luk bang surat ini, ngaceku karebneh pangeh muneng.

¹¹ Idi lemulun luk dat, nima' neneh nganau' luk dat teh, idi lemulun luk melutak, nima' neneh nganau' luk melutak teh, idi lemulun luk matu, nima' neneh nganau' luk matu teh, idi lemulun luk meligan, nima' neneh mangun meligan teh."

¹² "Ngerawé do'-do'! Ui macing dengan mesaget! Ui nguit tabparKu, pad Ui ngua' kuan anid-anid lemulun maya' kekamenneh.

¹³ Idi Ui ini Urup luk Pun-pun idi Urup luk Kekiped, Luk Atun idi Luk Muci, Luk Pun-pun idi Luk Kekiped."

¹⁴ Samal kuan lemulun luk maru' kuyu'deh, pad ideh ngalap lalud amé' matun lawa ulun ineh, idi semuet bang bawang ineh maya' tanga'neh.

¹⁵ Iamo' lemulun luk dat, lemulun luk mangun, lemulun luk pasét, lemulun luk ngaté, lemulun luk sembayang inan akang, idi idé-idé luk geregan ku balih idi nganau' luk mebalih, amung-amungdeh ketecan déi' liang.

¹⁶ "Ui ini Yésus pangeh nengecuk melaikatKu maré kali' ratnan amung-amung ini namu bang amung-amung sidang. Ui ini uat idi inul Daud, idi gituen pekak luk merasat ineh."

¹⁷ Idi Roh dengan Decur luk ngaweh pebala, "Amé' tungé!" Idi lemulun luk ninger ineh pana' do' ieh pebala, "Amé' tungé!" Idi lemulun luk meparing do' ieh macing, idi idé-idé luk sikal, do' ieh ngalap abpa' mulun ineh dengan mo'-mo'.

¹⁸ Ui ini Yahya maré kali' kuan anid-anid burur luk ninger bala luk biré bang surat ini: kudeng idé lemulun luk ngeluun bala ini, kali' rungen Allah miak ngula' anid-anid dereh luk pangeh inayud bang surat ini kuanneh.

¹⁹ Idi kudeng idé lemulun luk ngasi' bala luk biré bang surat ini, kali' rungen Allah miak ngetutu' babpatneh ratnan lawa ulun idi ratnan bawang luk meligan, maya' kudeng luk inayud bang surat ini.

²⁰ Idi Ieh luk maré kali' ratnan amung-amung ini nepebala, "Matu! Ui macing dengan mesaget!" Amin! Do' Iko macing, O Tuhan Yésus.

²¹ Idi do' katu Tuhan tau Yésus ngedengan amung-amung muyuh. Amin!

Wahyu

Video Wahyu 22

Ikuti Kami:

KONTAK | PARTISIPASI | DONASI