Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Malạekatẹ̌ e mal᷊aing napatodẹ si siạ sal᷊ụ kụ akẹ e makạonggọu pẹ̌bawiahẹ̌. Sal᷊ụ ene měngkate kụkuhěnabẹ̌ kere kasěnaěng dingangu mẹ̌lelehẹ̌ bọu kaderang kawawantugu Ruata ringangu Ahusu Domba e,
2 sutal᷊oaran dal᷊eng su soa ene. Su wiwihu sal᷊ụ ene, su ruamběka e piạ kalu pungu pẹ̌bawiahẹ̌, kụ mẹ̌bẹ̌bua mapul᷊o dua su sul᷊ene sěntaung, mangal᷊ene sěmbul᷊ang sěnsul᷊e. Daung e ipěpẹ̌pakẹ baugu mạpakaul᷊en tědụ u kěbị umatẹ̌.
3 Su ral᷊ungu soa ghẹ̌guwạ ene e tawe kadiongeng kaěbakeng měnsang apạe kahinoěngu laaneng Duata. Kaderang kawawantugu Ruata e ringangu Ahusu Domba ene sarung ene su ral᷊ungu soa ene. Manga ěllang'E sarung mẹ̌kal᷊iomaneng si Sie,
4 ringangu makasilo ghatin'E. Areng'E sarung bohekang su rěhụ i sire.
5 I sire tawe wahal᷊uasu měgausẹ̌ sol᷊o arau tualagu matangěllo, batụu hěbi e semben tawẹ apa, dingangu kai Mawu Ruata sẹ̌sane sarung manualagẹ̌ si sire. Tangu i sire sarung mẹ̌parenta kere sěngkatau ratu e sarang kakalẹ̌.
6 Tangu malạekatẹ̌ e nẹ̌bera si siạ, "Manga wawera tamai ini e mamben těngadẹ̌ dingangu kapangimangeng. Mawu Ruata kụ seng něngonggọu Rohkẹ̌'E su manga nabi e seng něndolohu malạekat'E něnodẹ su manga ěllang'E apa kụ sarung lighạ mariadi."
7 "Pẹ̌daringihẹ̌ko ini e!" angkuěng u Mawu Yesus, "Iạ e sarung lighạ duměnta! Kariangkamang i sain tụtuhụ manga wawerang hengetang su ral᷊ungu bukẹ̌ ini!"
8 Iạ i Yohanes seng nakaringihẹ̌ dingangu nakasilo patikụ ini e. Sarangke iạ seng nakaringihẹ̌ dingangu nakasilo ute iạ e naěnsạ e su těngon malạekatẹ̌ kụ seng něnodẹ u kěbị ene si siạ, dingangu iạ e měnaung mẹ̌suba si sie,
9 arawe i sie kawe nẹ̌bera si siạ, "Kumbahang! Abe pẹ̌suba si siạ! Pẹ̌subawe su Mawu Ruata! Batụu iạ e mal᷊aing ěllang kere i kau, dingangu kere manga anạ u sěmbaụ manga nabi ringangu kěbị taumata apang kụ mạhuntuhụ manga tatanata su ral᷊ungu bukẹ̌ ini!"
10 Mase i sie nẹ̌bera kạpia, "Kumbahangbe mapakapěnisu manga wawerang hengetang kụ seng nitěbal᷊ẹ̌ su ral᷊ungu bukẹ̌ ini, u seng masandigẹ̌ tempone patikụ ini e sarung mariadi.
11 Taumata ral᷊akị e, balạe pẹ̌kakoạ e ral᷊akị; taumata mal᷊amuhụ e walạ e apẹ̌těngkal᷊amuhụ u watangenge; i sain tụtol᷊e kapulun Duata e, balạ e hanesẹ̌ apatol᷊e kapulun Duata, dingangu i sain hanesẹ̌ měbẹ̌biahẹ̌ samatang baugu Ruata e, balạ e hanesẹ̌ apẹ̌biahẹ̌ samatang baugu Ruata."
12 "Pẹ̌daringihẹ̌ko ini!" angkuěng u Mawu Yesus, "Sen tawe mararěngụ Iạ sarung duměnta kụ mẹ̌bawa wawalarẹ̌ baugu mamal᷊isẹ̌ apan taumata tuhụewe apang kụ seng nịkakoạ e.
13 Kai Iạ e kahumotongange ringangu kasamuriange; Kai Iạ e Mawu wọu panẹ̌takenge sarang pěngěnsueěnge."
14 Kariangkamang i saing měngẹ̌nguhasẹ̌ lakụ e sarang mawurěsi hakịewen i sire iapakawala mahungkaěng buang kalum pẹ̌bawiahẹ̌ dingangu sumuẹ̌ su ral᷊ungu soa ene lumawesẹ̌ pasěllangenge.
15 Arawe i saing kụ měmpẹ̌kẹ̌koạ kal᷊awọu tatingkaị, apang měpẹ̌pakẹu wal᷊ikụ mata, tahapẹ̌sundal᷊ẹ̌, tahapate, tahapaněmba mahang duata, tahakontiang, bae su wawera ore lai ringangu kakanoạ e, kěbị i sire ene katatanakenge ute su l᷊ikudu soa ene.
16 "Iạ e, i Yesus, seng bọu něndolohu malạekatẹ̌-Ku sol᷊ong anung kamene tadeạu i sie makapaul᷊ịu manga hal᷊ẹ̌ tamai ini waugu karal᷊ambang manga jamaatẹ̌. Iạ e kai hěnton Daud; kai Iạ e wituingu Raki kụ matuahẹ̌ e."
17 Rohkẹ̌ u Ruata e ringangu kaghiang bawine e něhengetang u, "Wọete!" I sai-sain kụ nakaringihẹ̌ ini e hinon lai mẹ̌bera u, "Wọete!" I saing kụ narou, pěmpẹ̌haungke! Dingangu i saing kụ dụdul᷊agẹ̌ e ute i sie měngkate pěngal᷊ạ akẹ kụ makạonggọu pẹ̌bawiahẹ̌ e kụ tawẹ bawalare.
18 Baugu i sai-saing kụ makạdingihẹ̌ bawerang hengetang su ral᷊ungu bukẹ̌ ini e, tangu iạ, i Yohanes, mạngonggọu tatal᷊umbaghẹ ini; kereu piạu měnamba su wawera tamai ini, ute Mawu Ruata e sarung l᷊ai měnamba hukumang su taumata ene ringangu haghing hombang kụ seng nilahẹ su ral᷊ungu bukẹ̌ ini.
19 Dingangu kereu piạu měnggaing bọu wawerang hengetang tamai ini, ute Mawu Ruata e mal᷊aing sarung měnggaing bahageange kere seng nilahẹ su ral᷊ungu bukẹ̌ ini -- mangal᷊ene wahageange wọu kalum pẹ̌bawiahẹ̌ e ringangu wọu soa susi e.
20 I Sie kụ něhumpạu kěbị habarẹ̌ tamai ini e něhengetang, "Těngadẹ̌, Iạ e sarung lighạ duměnta!" Aming! Děntạ e, o Mawu Yesus!
21 Karimạko Mawu Yesus e mapẹ̌dal᷊embon tatal᷊ěntụ'E su kěbị kawanuan Duata e!
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA