Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ituduhken malekat e man bangku lau si mereken kegeluhen. Lau e erkilat-kilat bagi kristal. Lau e rehna i bas kursi Kinirajan Dibata ras Anak Biri-biri e nari,
2 janah maler arah tengah-tengah pasar kota e. Arah kawes ras kemuhen lau e lit batang kayu kegeluhen, si erbuah sepulu dua kali setahun, e me sebulan sekali. Bulungna ipake guna pepalem bangsa-bangsa.
3 La lit i bas kota e si kena sumpah Dibata. Kursi Kinirajan Dibata ras Anak Biri-biri e lit i bas kota e, janah suruh-SuruhenNa nembah me man BaNa.
4 Idah suruh-suruhen e me AyoNa, janah isuratken pe gelar Dibata i bas perdempaken suruh-suruhen e.
5 Lanai lit berngi, janah terang lampu ras sinalsal matawari pe lanai perlu sabap Tuhan Dibata me si nerangi suruh-suruhen e, janah kalak enda erkuasa jadi raja seh rasa lalap.
6 Jenari nina man bangku, "Kata enda kerina tuhu, janah terteki. Tuhan Dibata si mereken KesahNa man nabi-nabi, dingen si nggo nuruh MalekatNa encidahken man suruh-SuruhenNa kai si nandangi jadi minter."
7 "Nehenlah!" nina Yesus, "Minter Aku reh! Malem me ate kalak si ngikutken Kata nubuat si tersurat i bas Kitap enda!"
8 Aku, Johanes, nggo megi dingen ngidah si enda kerina. Janah kenca kubegi dingen kuidah si enda kerina, erjimpuh aku nembah i lebe-lebe malekat si ncidahkenca e man bangku. Kusembah ateku ia.
9 Tapi nina man bangku, "Ula sembah aku! Aku pe suruh-suruhen nge, bali ras kam, bali ras senina-seninandu nabi-nabi e; bage pe bali ras kerina kalak si ngikutken kata-kata si tersurat i bas Kitap enda. Sembahlah Dibata!"
10 Tole nina malekat e man bangku, "Ula tutupi Kata nubuat si tersurat i bas Kitap enda, sabap nggo ndeher paksana si enda kerina jadi.
11 Kalak jahat iteruskennalah erbahan jahat; kalak si melket lagu-langkahna iteruskennalah erlagu langkah si melket; kalak si mehuli iteruskennalah erbahan mehuli janah kalak si nggo iserapken guna Dibata teruslah ia nggeluh guna Dibata."
12 Nina Jesus, "Nehenlah! Pedas me Aku reh! Kubaba me upah man kerina jelma rikutken kai si nggo ibahanna.
13 Aku kap si erkuasa mula-mulana nari seh ku kedungenna; Aku kap Tuhan mula-mulana nari ku pendungina."
14 Malem me ate kalak si naptapi jubahna seh bersih. Lit hakna man buah batang kayu kegeluhen e ras bengket arah pintun-pintun gerbang ku bas kota e.
15 Idaraten Kota e ringan kalak si mbau lagu langkahna, tukang sihir, perlua-lua, pemunuh, kalak si nembah berhala bage pe kalak si perbual subuk i bas kata ras i bas perbahanen.
16 "Aku, Jesus, nggo nuruh malekatKu meritaken si enda man bandu kerina guna kiniulin perpulungen-perpulungen. Aku kap urat ras kesusuren Daud; Aku me bintang erpagi-pagi si terang e."
17 Nina Kesah Dibata ras Pengantin si Diberu e, "Marilah!" Kerina si megi kata enda pe arus ikatakenna, "Marilah!" Ise si muas rehlah ia! Janah ise si mesikel, ibuatnalah lau kegeluhen e, la pada nggalar.
18 Kusehken kata pertenget man kerina kalak si megi kata-kata nubuat si tersurat i bas kitap enda, "Adi lit kalak si nambah-nambahi isi kitap enda itambahi Dibata me man bana mara-mara si nggo isuratken i bas kitap enda.
19 Janah adi lit kalak si ngkurangi sitik lah gia kata-kata nubuat si tersurat i bas kitap enda, maka ikurangi Dibata baginna i bas buah batang kayu kegeluhen nari, bage pe baginna i bas Kota si Badia si nggo isuratken i bas kitap enda."
20 Ia, si naksiken kerina enda ngataken, "Payo, bage me jadina. Pedas Aku reh!" Amin. Marilah, o Tuhan Jesus!
21 Lias ate Tuhan Jesus ras kam kerina gelah.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA