Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ge'ena 'ipasa de to'isene 'okia naga moi 'isoka 'o nyawa yoku-kudai manga 'ilingi yomapoa-poaka 'o sorogaaku konee, "Powisiarene ma Jo'oungu ma Dutu! To ngone nanga Jo'oungu ma Dutu 'una ge'ena 'o nyawa wosilaha-laha! 'Una woku-kumati ma sala de woku-kuasa!

² 'Una 'o hukumani wosiputusu 'itiai de 'itero! 'Una womihukumokau gee mi roese mowuku-wukunu gumuna. Ngano munau so 'o nyawa 'o duniaka manga 'ahu 'itorouokau sababu to muna 'ami nyafisuu ma dorou. Mita ma Jo'oungu ma Dutu womihukumu sababu muna makito'oma to 'una 'awi nyawa gee wile-leleani."

³ Ge'enaka de 'o nyawa yoku-kudai manga 'ilingi 'imapoakoli 'ingose 'ato, "Powisiarene ma Jo'oungu ma Dutu! 'O 'uku gee 'o kota 'iamo-amoko ya'uku-'uku ge'ena ma dowo 'asa 'ikuwuwulu koimaogo-ogoruwau!"

⁴ So yopa-pareta yamonaoko de soata de 'o barangi 'i'ahu-'ahu 'o ngai soata gee 'o koana ma go-gogere yosigilolitino, yotalibukuku wisuba ma Jo'oungu ma Dutu gee wogogerie 'o koana ma go-gogeroka ge'ena. 'Ona kayongosekau, "Ma goungu! Powisiarene ma Jo'oungu ma Dutu!"

⁵ Ge'enaka de to'isene 'o 'ilingi 'o koana ma go-gogerino kaingosekau, "Winisiarene ma Jo'oungu ma Dutu ngini nioodumu gee winile-leleani 'una, de nioodumu gee niola-laagomo bolo koniola-laagomuwa winihoromati de winisingounu!"

⁶ Ge'ena 'ipasa de to'isene 'isoka 'o nyawa manga gudaioka manga 'ilingi. 'O 'ilingi ge'ena ma amokie 'isoka 'o deneta 'ikuru-kurutuku ma guruusu, de 'isoka 'o duturu 'iamo-amokie. Ngoi to'isene 'o 'ilingi ge'ena kaingosekau, "Powisiarene ma Jo'oungu ma Dutu sababu to ngone nanga Jo'oungu ma Dutu 'awi kuasa 'ifoloi 'iamoko de ne'ena 'una wopareta!

⁷ Nou, ngone pomore-morene de nanga singina 'isa-sanangi; ngone powisiarene de powihoromati 'una! Sababu ma 'orasi ya'adonokau 'una gee wisironga 'o Domba ma Ngowaka wongaamoko, de wominga-ngaamoko gumuna momadudu-duangou ma ngale yongaamoko.

⁸ 'O baju 'isure-sure gee 'ileto-letongo, 'i'are-'arese de 'itebi-tebini ma Jo'oungu ma Dutu wokulakau munaka ma ngale momasinoa." ('O baju 'isure-sure ge'ena ma ngale 'o manarama yaowa-owa gee ma Jo'oungu ma Dutu 'awi kawasa yadi-diai.)

⁹ Ge'enaka de 'o mala'ekati ge'ena kaingosekau ngoino, "Nalefo ne'ena: 'Yosanangioka 'o nyawa gee yaki'asoko 'o Domba ma Ngowaka wi ngaamoko ma rameno.' "'Asa de 'o mala'ekati ge'ena 'ingoseli, "Ne'ena ge'ena ma gou-goungu 'o demo ma Jo'oungu ma Dutuno."

¹⁰ So tobukuku tanu tosuba, ma 'ena kaingosekau ngoino, "'Uwa noisuba! Tagi wonisuba ma Jo'oungu ma Dutu, sababu ngoi mita katowile-leleani ma Jo'oungu ma Dutu 'isoka ngonali de 'ani 'esa moi ka 'o ngo-ngaku moi gee yomasiga-gao ma gou-goungu 'o Yesus 'awi do-dotokika!" Sababu 'o do-dotoko 'iti-tiai gee 'o Yesus wosidumu-dumutokau ge'ena yakisikuata ma Jo'oungu ma Dutu 'awi kawasa ma ngale yositotara ma Jo'oungu ma Dutu 'awi demo.

¹¹ Ge'enaka de tamake 'o sorogaa 'ipelenga, de tamake 'o kuda ya'are-'arese moi. Wo'asa-'asa wi ronga 'o Woti-tiai de 'Idadi Powingaku. 'Una wosiputusu 'o hukumani de woparangi ge'ena 'itiai.

¹² 'Awi ako 'iletongo 'isoka 'o 'uku ma lurusu, de 'awi saekoka 'o tuala 'o gudaioka womasinoaku. 'Awi roesoka 'isilefoka 'o ronga ngai moi, de ka 'una duga wanako 'o ronga ge'ena.

¹³ 'O juba gee 'idawaruokau 'o 'aunuku womasinoaku. De 'una wisironga ma Jo'oungu ma Dutu 'awi Demo.

¹⁴ 'O sorogaa ma tentara gee yopa-parangi wimoteke 'una, ya'asa 'o kuda ya'are-'arese, de manga baju 'isure-sure gee 'i'are-'arese de 'itebi-tebini.

¹⁵ 'Awi 'urude 'isupu 'o wase moi 'idoto-doto, de ma wase ge'ena 'una 'asa wosikala 'o nyawa 'iodumu gee kowimote-motekuwa, de 'una 'asa wakipareta de 'o papadi 'o besi. 'Una 'asa 'o 'anggur wateo, wodeteo ma Jo'oungu ma Dutu gee wi kuasa 'iamo-amoko 'awi do'otasa ma 'anggur 'ide-deteoku.

¹⁶ 'Awi jubaka de wi 'uguruoka 'isilefoka 'o ronga naneda, "'O Koana gee 'awi kuasa 'ifoloi 'iamoko de 'o koa-koana yoodumu de 'o Jou gee 'ifoloi wodaduie de 'o jou-jou 'iodumu."

¹⁷ Ge'enaka de tamake 'o mala'ekati moi 'ima'okode 'o wange ma ako ma dekuoka. De ma 'ilingi 'iamo-amokie 'imapoaka 'o namoro 'iodumika gee 'isoso-soso 'o ngawa-ngawaka, "Nou, nimatoomu ma ngale podoboa 'o rame ma amoko gee ma Jo'oungu ma Dutu wodiai!

¹⁸ Nou, nia'odomo yosonge-songenuku manga akeme ge'ena la 'o koa-koana manga akeme, 'o kapita manga akeme, 'o solodado manga akeme; nou nia'odomo 'o kuda yo'asa-'asa manga akeme de ma kuda moi-moi ma akeme de 'o nyawa 'iodumu yoamoko de yotingoono manga akeme, 'o yongosi de gee koyoyongo-yongosuawau manga akeme!"

¹⁹ Ge'enaka de tamake 'o haewani gee 'o ngootie 'isupu-supu, de 'o dunia ma koa-koana de manga solodado yomatoomu ma ngale wirikudoti 'o kuda ya'are-'arese wo'asa-'asa de 'awi solodado.

²⁰ So 'o haewani gee 'o ngootie 'isupu-supu ge'ena yatagoko yosidatagoko de 'o nabii ma ngeluku gee 'idiaiokau 'o no-nako 'ihera-herangi 'o haewani ge'ena ma bionoka. De 'o no-nako 'ihera-herangi ge'ena, 'o haewani ge'ena 'isihaga 'o nyawa-nyawa gee to 'ona de ma 'ena 'o haewani ma no-nako gee manga mengaka de manga giamoka de 'o nyawa-nyawa gee yasuba 'o haewani ge'ena ma patongo. Ge'enaka de 'o haewani de 'o nabii yoelu-eluku gee kayowango-wango yaki'umo 'o walira 'isiluru-lurusuku.

²¹ De to 'ona manga solodado go'ona 'o kuda 'i'are-'arese wo'asa-'asa wakito'oma de 'o wase gee 'awi 'urude 'isupu-supu. So 'o sagala namoro mita 'iboa 'i'odomo kayasorokumou yakito-to'omaku manga akeme ge'ena.

Wahyu

Video Wahyu 19

Ikuti Kami:

KONTAK | PARTISIPASI | DONASI