Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sasudah tu ambo mandanga sasuatu, bakcando suwaro gamuruah urang banyak dari sarugo, nan basaru-saru, "Pujilah Allah! Allah kito adolah Allah nan manyalamaikkan; Baliau Allah nan basa sarato bakuwaso!

² Caro Baliau ma ukun adie, sarato bijaksano! Baliau lah manjatuahkan ukunan kabake padusi nan sangaik pajina, nan marusak dunia jo karajo cabulnyo. Allah lah ma ukun padusi nan sangaik pajina tu, dek karano inyo mambunuah pisuruah-pisuruah Allah."

³ Sudah tu, suwaro urang nan banyak tu, basaru pulo baliak, "Pujilah Allah! Asok dari api nan ma anguihkan kota nan gadang tu, ka manggabubu taruih indak ado anti-antinyo!"

⁴ Mako kaduwo puluah ampek pamimpin, sarato jo ka ampek mukaluak nan di sakuliliang kurisi tu, tasungkua, sarato manyambah Allah nan duduak di ateh kurisi. Inyo bi mangatokan, "Amin! Pujilah Allah!"

⁵ Sudah tu, tadanga bunyi suwaro dari kurisi tu nan bakato, "Pujilah Allah, oih kasadonyo pisuruah Allah, sarato jo kasadonyo urang -- gadang ketek -- nan manyambah Allah!"

⁶ Sasudah tu ambo mandanga sasuatu, bakcando suwaro sakumpualan urang nan sangaik banyak; bunyinyo bakcando galombang lauik nan manggilo, bakcando guruah nan manggamuruah. Ambo mandanga urang-urang tu bi bakato, "Pujilah Allah! Dek karano, Tuhan Allah kito Nan Mahakuwaso tu kiniko mamarentah!

⁷ Molah kito basukocito sarato bagadang ati; molah kito mamuji kabasaran-Nyo! Dek karano lah tibo masonyo ari panikahan Anak Domba tu, sarato anak daro-Nyo lah siyap untuak alek tu.

⁸ Pakaian lenan nan bakilauan, lah dibarikan kabake inyo untuak ka dipakai." (Pakaian lenan tu adolah karajo-karajo nan baiak, nan dikarajokan dek umaik Allah.)

⁹ Sudah tu malekaik tu bakato kabake ambo, "Tulihkanlah ko: 'Babahagialah urang nan diundang ka alek panikahan Anak Domba tu.'" Kudian malekaik tu mangatokan pulo, "Ikolah barito nan bana dari Allah."

¹⁰ Ambo tasungkua di adok-an malekaik tu nak ka manyambahnyo, tapi inyo bakato kabake ambo, "Jan! Janlah disambah ambo, sambahlah Allah! Dek karano, ambo ko pun hanyo pisuruah, samo jo bakcando angkau, samo jo bakcando kasadonyo sudaro angkau, nan bapacik taguah kabake kabanaran nan dinyatokan dek Isa Almasih!" Dek karano, kabanaran nan dinyatokan dek Isa Almasih tu lah, nan ma ilhami kasadonyo nabi-nabi.

¹¹ Kudian ambo maliyek sarugo tabukak, sudah tu nampak sikua kudo putiah. Urang nan maracaknyo banamo Nan Satiya, sarato Nan Bana. Baliau adie dalam mamutuihkan ukunan, sarato adie pulo dalam ma adok-i paparangan.

¹² Mato-Nyo bakcando nyalo api, di kapalo-Nyo Baliau banyak mamakai mangkuto. Di diri Baliau tatulih suatu namo; hanyo Baliau sajo nan mangatawui namo tu.

¹³ Jubah nan dipakai dek Baliau lah barandamkan masuak darah. Nan Baliau dinamokan "Firman Allah".

¹⁴ Pasukan sarugo maracak kudo putiah, sarato bapakaian lenan nan putiah barasiah, payi ma ikuik-i Baliau.

¹⁵ Dari muluik Baliau kaluwa sabilah padang nan tajam, jo padang tu lah Baliau ka mangalahkan sagalo banso, Baliau ka mamarentahi urang-urang tu jo tungkek basi. Baliau ka marameh anggur, di dalam tampaik parameh anggur kabangihan Allah, Nan Mahakuwaso.

¹⁶ Di jubah Baliau, sarato jo di pawo Baliau, tatulih namo nan bakcando iko, "Rajo sagalo rajo, Tuhan sagalo tuan."

¹⁷ Sudah tu ambo maliyek, surang malekaik tagak di ateh matoari. Jo suwaro nan kuwaik inyo basaru kabake sadonyo buruang nan tabang di udaro, "Bi kamarilah bakumpua, untuak mahadiri alek gadang nan di adokan dek Allah!

¹⁸ Kamarilah mamakan dagiang rajo-rajo, dagiang palimo-palimo, sarato jo dagiang pahlawan-pahlawan; bi kamarilah mamakan dagiang urang-urang nan maracak kudo, sarato jo dagiang kudonyo bagai, sarato jo dagiang kasadonyo umaik manusia, gadang ketek, budak sarato jo urang mardeka!"

¹⁹ Kudian ambo maliyek binatang tu, sarato jo rajo-rajo bumi, sarato jo tantaranyo, bakumpua untuak baparang, malawan Baliau nan maracak kudo putiah tu, sarato jo tantara-Nyo pulo.

²⁰ Mako binatang tu tatangkok, samo-samo jo nabi palasu, nan lah mambuwek sagalo ka ajaiban di adok-an binatang tu. (Jo sagalo ka ajaiban tu lah, binatang tu mangicuahi urang-urang nan mampunyoi tando binatang tu, sarato jo urang-urang nan manyambah patuang binatang tu.) Sudah tu, binatang tu sarato jo nabi palasu tu bagai, dilompekkan iduik-iduik masuak lauiktan api, nan banyalo-nyalo jo balerang.

²¹ Pasukannyo dibunuah jo padang, nan kaluwa dari muluik Urang nan maracak kudo putiah tu. Mako bi tibolah buruang-buruang, untuak ka manyantuang dagiang urang-urang nan dibunuah tu.

Wahyu

Video Wahyu 19

Ikuti Kami:

KONTAK | PARTISIPASI | DONASI