Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Radu jak seno ngedengi sai hal injuk suara jelma lamon jak surga sai beseru-seru, "Pujido Allah! Allah ram iado Allah sai nyelamatko; Ia Allah sai agung rik bekuasa!

² Penghakiman-Ni adil rik bijaksana! Ia radu ngeniko hukuman mik atas jelma sai ngelacorko diri sai paling hibat, sai nyadangko dunia jama perbuatan hajorni. Allah radu ngehukum jelma sai ngelacorko diri udi, mani ia ngebunuh jelma-jelma sai ngebantu Allah."

³ Raduni suara jelma lamon udi beseru lagi, "Pujido Allah! Hasok jak apui sai ngemutungko kota balak udi haga ngepul mak taru-taruni!"

⁴ Maka kerua puluh epak jelma sai mimpin rik keepak makhluk sai dikelilingi takhta udi tesungkor rik nyumbah Allah sai mejong di atas takhta. Tian cawa, "Amin! Pujido Allah!"

⁵ Raduni kedengian jak takhta udi bunyi suara sai cawa, "Pujido Allah, hai sunyin jelma sai ngebantu Allah, rik sunyin jelma -- balak lunik -- sai nyumbah Allah!"

⁶ Radu jak seno nyak ngedengi sai hal injuk suara sekumpulan jelma sai lamon nihan; bunyini injuk gelumbang sai begelora rik guntor bebunyi. Nyak ngedengi tian cawa, "Pujido Allah! Mani Tuhan, Allah ram Sai Mahakuasa udi tano memerintah!

⁷ Ijado ram besukaria rik riang, ijado ram memuji kemuliaan-Ni! Mani radu sampai rani pernikahan sai nyating gelar-Ni Anak Biri-biri udi, rik pengantin-Ni radu siap untuk pernikahan-Ni.

⁸ Kawai linen sai bekilauan radu dikeniko jama ia untuk dipakai." (Kawai linen udi iado perbuatan-perbuatan betik sai dilakuko ulih umat-Ni Allah.)

⁹ Raduni malaikat udi cawa jama nyak, "Tulisdo inji: 'Bebahagiado jelma sai diundang mik pesta nikahan-Ni Anak Biri-biri udi.'" Kak raduni malaikat udi nambahko muneh, "Injido kabar benor jak Allah."

¹⁰ Nyak tesungkor di hadap malaikat udi haga nyumbahni, kidang ia cawa jama nyak, "Dang! Dang nyumbah nyak, sumbahdo Allah! Mani nyak pun jelma sai ngebantu injuk niku rik injuk sunyin puari-puarimu sai nyating kuat jama kesaksian Isa!" Mani kesaksian Isa udido sai ngeilhami jelma-jelma sai benubuat.

¹¹ Kak raduni nyak ngeliak surga tebukak, radu keliakan sai kuda handak. Jelma sai nunggang-Ni gelarni Sang Setia rik Sang Benor. Ia adil delom memutusko hukuman rik delom peperangan sai dilakuko-Ni.

¹² Mata-Ni injuk nyala apui rik di ulu-Ni ia makai lamon mahkota. Di diri-Ni tetulis suatu gelar; rik angkah ia tenggalan sai pandai gelar udi.

¹³ Jubah sai dipakai-Ni radu dicelup delom rah. Rik Ia disebut "Sabda-Ni Allah".

¹⁴ Angkatan perang surga nutuk Ia jama nunggang kuda-kuda handak, rik bekawai linen sai handak kecah.

¹⁵ Jak banguk-Ni luah sebilah pedang sai tajam rik jama pedang udi Ia haga ngalahko bangsa-bangsa, rik Ia haga memerintah tian jama tungkok besi. Ia haga memeras anggor di delom alat pemeras anggor butong-Ni Allah Sai Mahakuasa.

¹⁶ Di jubah-Ni rik di paha-Ni ditulis gelar inji, "Raja sunyin raja, rik Tuhan sunyin tuan."

¹⁷ Raduni nyak ngeliak sai malaikat cecok di atas matarani. Jama suara keras ia beseru jama sunyin burung sai hambor di udara, "Ijado bekumpul untuk menghadiri pesta balak sai dirayako ulih-Ni Allah!

¹⁸ Ijado nganik daging raja-raja, daging penglima-penglima, rik daging pahlawan-pahlawan; ijado nganik daging jelma-jelma sai nunggang kuda jama daging kuda-kudani rik daging sunyin manusia balak rik lunik, jelma sai ngebantu rik jelma bebas!"

¹⁹ Kak raduni nyak ngeliak binatang udi, rik raja-raja bumi jama angkatan perang tian, bekumpul untuk betempur ngelawan Ia sai nunggang kuda handak udi rik angkatan perang-Ni.

²⁰ Maka binatang udi tetangkok jejama jama nabi palsu sai radu nyani keanehan-keanehan di hadap binatang udi. (Jama keanehan-keanehan udido binatang udi nipu jelma-jelma sai ngedok tanda binatang udi, rik jelma-jelma sai nyumbah patung binatang udi.) Raduni binatang udi rik nabi palsu udi ditokko hurik-hurik mik delom laok apui sai menyala-nyala jama belerang.

²¹ Rik angkatan perang tian dibunuh jama pedang sai luah jak banguk jelma sai nunggang kuda handak udi. Maka burung-burung pun ratong rik nganik jama rakusni daging tian sai dibunuh udi.

Wahyu

Video Wahyu 19

Ikuti Kami:

KONTAK | PARTISIPASI | DONASI