Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Lepá arepkungan leú et ipuukú nga-nganda sirimanua ka manua, sipasisosogaaké, "Umun kam Taikamanua! Taikamanuanta néné, iaté Taikamanua sipaarau, Taikamanua simalatsat samba sipulugege!
2 Pasihahakimi nia, maadil, sambat sineseat! Aiorak'akéan ukuman ka tubudda sipuoolop tubu simakopé, sipakataí polak, kalulut pusilaingeatnia. Aiukum'akéan nia Taikamanua sipuoolop tubu néné, aipamatei poí sia sapakoiniet Taikamanua."
3 Iageti pusogaddangan mitsá sirimanua simigi, pelé nga-nganda, "Umun'aké lé Taikamanua! Tá te muaari ipukuilú api, sipasilalabó laggai nenda!"
4 Oto purappoddangan leú et ka sia sirua ngapulu epat tai bajá, sambat sia samakluk siepat, sibokkó uddenan purimataat, rapaniddogi Taikamanua, sipuuuddet ka uddenan purimataat. Pelé nga-nganda, "Amen! Umun kam Taikamanua!"
5 Iageti maarepnangan nga-nga sibara ka uddenan purimataat, sipasikukua, "Umun kam Taikamanua, kam sangamberi sapakoiniet Taikamanua, sikebbukat sambat tasulé, sipaniddogi Taikamanua!"
6 Lepá mitsá, arepkungan kelé nga-nganda sirimanua simakopé igi; ipunau, kelé ipuja nga-ngan onut koat, samba kelé guru-ruu nga-ngan leleggu. Akuarep sikuadda, "Umun kam Taikamanua! Aipoi si Tuhan Taikamanuanta Sipulugegengan lé amurimata!
7 Kau imangká samba imagora bagatta, kau taumun kam pulatsanannia! Aiailingan poí gogoi putalimogat nia sipuoni Togat Biri-biri, samba talimouakenen, amatarek'an nia itutalimouaké.
8 Leppei simaalit baga simakirisau atukauan ka tubunia, ipakei nia." (Leppei simaalit baga néné iaté, sangamberi simaerú, sigalaira sapaamian Taikamanua.)
9 Iageti kuanangan malaika ka tubukku, "Surat'aké néné: 'Mauktuk te sia sinogai ka punen putalimogat Togat Biri-biri.'" Lepá tuppainangan nia mitsá malaika ikua nia, "Iaté néné katuareman bulat sibulatnia sibara ka Taikamanua."
10 Iageti purappokkungan ka matat malaika masipanindogi nia. Tápoi aikua lé ka tubukku, "Tá kisé! Bá paniniddogi aku. Taikamanua lé paniddogi! Beri aku leú poí kaku pagugulet leú et, kalé ekeu, samba kelé leú sasarainam sipasioomet'aké simaron simuneng'akenen Jesus!"
11 Lepá itsókungan itubuká manua, iageti matoilánangan leú et sangamuneng kuró simabulau. Sikukuddu ka tei-teinia iaté, Oniakenen Simatopit samba Oniet Sibulatnia. Maadil nia masiorak'aké ukuman sambat pasaggangan sigalaiakenennia.
12 Matania kelé juluu api, samba ka uténia maigi kirit purimataat. Ka tou-tounia ai atusurat'aké sara oni; sarat nia lé iagai oni nenda.
13 Leppei sipakeinia, atulogabingan. Nia néné tuoniaké, "Tiboiet Taikamanua".
14 Airatutut nia tai tenterat manua, sipukukuró simabulau samba sipuleppei komang simaalit baga, simabulau simaliná.
15 Ai bebela ka ngu-ngunia sara lanjau simalauru, samba lanjau nenda te ipapakei masikalaaké tai bangsa, samba utéakénangan sia ka gege simaron. Ibubutsit te suat anggur ka kudduat pasibutsinan oloi golut Taikamanua Sipulugege.
16 Ka saraubánia sambat ka bakkapatnia ai atusurat'aké oni néné, "Rimatadda tai rimata, samba Tuhanda tai tuan."
17 Lepá itsókungan leú et sara malaika sipuuuddet ka matat sulu. Iageti pusoganangan simaron, masikua ka tubut sangamberi umá sitububurut ka pata, "Konan kam parurú masiroroi punen sabeu sibaraakenen Taikamanua!
18 Konan kam mukom akkulára tai rimata, akkulára tai panglima, samba akkulára tai pahlawan, konan kam mukom akkulára sikukuddu ka tei-tei kuró samba leú et akkulat kuróra samba akkulára sangamberi sirimanua, sikebbukat samba tasulé, sapagugulet samba sipuuuja!"
19 Lepá itsókungan raparurú, tarimeu sambat sia tai rimata ka polak néné, samba leú et tai tenteratda, raei pasaggak, masisaggangi sikukuddu ka tei-tei kuró simabulau, sambat tai tenterania.
20 Iageti labárangan tarimeu néné sambat tai nabi sipatataju, sigalai kiseiet ka matat tarimeu néné. (Oto kiseiet nenda te igagalai tarimeu néné, masipataju sia sibara toggaiat tarimeu, samba sia sipaniddogi tularat tarimeu.) Iageti ribbaiaké tarimeu sambat tai nabi sipatataju néné ai sia muririmanua, ka bagat api sipuju-juluu, sibara belerang.
21 Iageti tai tenteradda, atumateiakéan sia ka lanjau sibebela ka ngu-ngunia sikukuddu ka tei-tei kuró simabulau. Oto oinangan leú et umá, pakomiddangan leú et akkulára simateiakenen néné.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA