Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Naupu haitu yaku, i Yohanes, nangepe moni mpo suara ntona dea novoo nongare-ngare ri suruga. Niulira, "Haleluya! Ratoiyamo Alatala! Sabana Iamo nompakasalama kita. Iamo Alatala anu naoge bo nakuasa!

² Ratoiyamo Ia sabana pombabotusiNa nakana bo nanoa. NihukuNamo bajinga haitu, anu nompakadaa dunia apa nipakenina tona ntanina nosipogau ante ia. Nipesava nu Alatalamo mombine haitu sabana pompatesi topangoseaka-natopangoseaka Alatala."

³ Bo nongare munimo tona dea haitu, "Haleluya! Ratoiyamo Alatala, sabana unu nu apu nompalabu ngata haitu molumura sampe ri kasae-saena, ledo ria kaupu-upuna!"

⁴ Bo ropulu bo ampa totua bo ampa Anu Natuvu haitu nantaputu nombasomba Alatala anu nonturo ri Gadera KamagauaNa. Niulira, "Amin! Ratoiyamo Alatala!"

⁵ Naupu haitu naria suara lako ri Gadera Kamagaua haitu nanguli, "Umba komiu pura-pura topangoseaka Alatala! Toiyamo Tuputa Alatala! Toiyamo Ia, komiu anu natundu nte Ia, nau tona biasa nau tona naoge katuvuna!"

⁶ Naupu haitu niepeku mpo suara ntona dea novoo mpo soo nu uve oge bo mpo moni guru kede. Nongaremo ira, "Toiyamo Alatala! Sabana, Tuputa Alatala nomparenta pura-pura anu naria! Neliu mpuu KakuasaNa!

⁷ Kamaimo kita modade ante damba rara. Kamaimo kita mantoiya kaogeNa. Sabana, nakavamo eo ponika Ana Bimba. Boti mombine nasadiamo ranika.

⁸ Ia nidekeika pakea mputi nalusu nenggila rapakena." (Pakea nalusu nidekei ka mombine haitu nirapaka pokainggu-pokainggu nanoa anu nipovia ntodea nu Alatala.)

⁹ Naupu sia, nangulimo *malaeka haitu ka yaku, "Tulisimo hitu: Nabelo mpuumo tona nigaga hau ri posusa ponika Ana Bimba." Bo niulina munimo, "Tesa-tesa hitu lako nte Alatala bo nakana mpuu!"

¹⁰ Nangepe tesa haitupa, nantaputumo yaku sampe ri tana ri ngayo malaeka haitu mombasomba ia. Tapi nangulimo ia ka yaku, "Nemo! Nee rasomba yaku. Sombamo Alatala! Sabana yaku hii aga batua nu Alatala nasimbayu mpo iko bo nasimbayu mpo sampesuvumu sampomparasaya anu naroo nanggangisi pepatuduki nakana nipopaisani i Yesus. Apa pepatuduki nakana nipopaisani i Yesus, haitumo poko nu tesa ntona anu nompasimbayu tesa lako nte Alatala."

¹¹ Naupu haitu nikitaku suruga natebuka. Hamaa! Riara suruga nikitaku sangu jara bula. Topesavi jara haitu nosanga "Tona Natutu bo Nanoa." Ia Topotangara bo Topeeva nanoa.

¹² MataNa narega mpo vaya nu apu bo ri balenggaNa nadea songgo magau. Ri karoNa naria sanga nitulisi, tapi aga Ia mboto nangisani sanga haitu.

¹³ Baju ndoe nipasuaNa nilome ri raa. Bo Ia nidae "Tesa nu Alatala."

¹⁴ Tantara-tantara nu suruga anu nombatuntuni Ia nesavi jara bula pura. Pakeara nipovia lako ri kae mputi nalusu bo nagasa.

¹⁵ Bo lako ri ngangaNa nesuvu samata guma natada. Ante guma haitu Ia mombadagi tona pura-pura riara dunia anu nangeva Ia, bo Ia momparenta ira ante ase poboba. Ia mombajeje-jeje pakaoya vua *anggur ri pompea anggur nu Alatala anu Neliu KakuasaNa. Batuana, Ia mompopakita rau rara nu Alatala ka tona nadaa.

¹⁶ Ri bajuNa bo ri timpuNa nitulisi sangaNa ivei: MAGAU NU PURA-PURA MAGAU, TUPU NU PURA-PURA TUPU.

¹⁷ Naupu haitu, nikitaku saito malaeka neangga ri mata nu eo. Nongaremo ia ante suara namangga nompokio pura-pura tonji anu nevoro ri laerava. Niulina, "Kamaimo komiu pura-pura, mangande ri posusa mbaso nipakasadia nu Alatala!

¹⁸ Kamaimo mangande isi ntomate, haitumo magau-magau bo tadulako-tadulako, bo isi tantara-tantara nabia. Kamaimo komiu mangande isi ntopesavi jara bo isi jarara, bo isi manusia pura-pura, haitumo batua, madika, tona naoge katuvuna, bo tona biasa."

¹⁹ Naupu haitu nikitaku binata nadaa pangane bo magau-magau ri dunia ante tantarana nasiromu ala mosieva ante Topesavi jara bula bo tantaraNa.

²⁰ Tapi binata nadaa nisaka sanggani ante nabi mpodava bo ira randua nitedaka nggatuvu riara ntasi apu anu navaya ante *vatu-vatu colonggata navaya. Nabi mpodava haitumo novia tanda-tanda nipokumaaka ante kuasa nidekei nu binata nadaa ka ia. Ante tanda-tanda nipokumaaka, ia nombabagiu tona nimere ante tanda nu binata nadaa bo tona nombasomba *pinoitona.

²¹ Jadi naupu sia, Topesavi jara bula nompatesi pura-pura tantara nu binata nadaa, nitimbeNa ira ante guma nesuvu lako riara ngangaNa. Bo nakava mpuumo tonji-tonji nangande isi karobata ntomate haitu sampe nabasa.

Wahyu

Video Wahyu 19

Ikuti Kami:

KONTAK | PARTISIPASI | DONASI