Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Mangkai joo ssa'ding omo' susi gamaranna tau buda jao mai suruga metamba nakua, "Pakala'bihhi Puangta' Puang Allataala! Iamo mangpasalama', mala'bih na makuasa.

² Sanga tongan na maruruhhi pangra'tah-Na! Nara'tahmi kara-karana to baine bandarang nggajatan lino mpugaukki to mesirisan, na napabalahhimo to kadibunoanna taun-Na."

³ Metamba pole'mi joo tau buda nakua, "Pakala'bihhi Puang! Ma'bongmo joo kota tonggo, na ia to rambunna mangngumbun bang de', te'da cappa'na!"

⁴ Ia joo duang pulo a'pa' tomatua-tua sola a'pa' olok-olok, suju' ssompa Puang Allataala to cumadokko jao cadokkoan mala'bih. Pada mangkadai nakua, "Tonganmo! Pakala'bihhi Puang!"

⁵ Ta'pa den omi gamara jio mai cadokkoan mala'bih nakua, "Ee, sininna taun-Na Puang Allataala to ssompai, la tobiasa, la tomapangka', pakala'bihhi Puangta'!"

⁶ Mangkai joo kusa'ding pole' omi susi gamaranna to sangtorroan tau buda, susi bombang nnumbung na susi galugu gumaluguh. Mangkada nakua, "Pakala'bihhi Puang! Mangparentami Puangta' Puang Allataala to makuasa!

⁷ Tamangmaroah-roah mpakala'bihhi to kamala'biran-Na! Sanga nadete'mi allo kabottingan-Na Anak Bembala', nasadiamo to tobotting baine.

⁸ Ia to pakean kaen lenan cundallak dibenni la napake." (Ia joo pakean kaen lenan iamo to panggaukan melo to napugauk umma'-Na Puang Allataala).

⁹ Nakua joo malaeka' lako aku', "Uki'i tee: Masannang to toditambai lako joo pangmaroasan tobotting." Namane' mangkada pole' nakua, "Ia tee kareba tongan pole jio mai Puang Allataala."

¹⁰ Suju'na' jio olona joo malaeka' la ssompai, apa napangkadaina' nakua, "Danggi'! Danggi' sompana'. Puang Allataalara musompa! Nasaba' pada todisuariki' sola to sile'tomu to nturu' pangngajaran-Na Puang Isa!" Ia joo pangngajaran-Na Puang Isa iamo mpamasumanga' nabi.

¹¹ Ngkita omo' suruga titimbak, anna den nyarang mabusa lan. Na ia to tossakei disanga Maruruh na Tongan. Maruruh mangra'tah kara-kara sola mangrari. Disanga too Kada Puang Allataala.

¹² Ia to matanna dukku susi api na ia to ulunna mpake buda mahkota. Den sanga diuki' jio kalena, apa ia manda nnissenni battuananna.

¹³ Ia to pakean malando napake mangka dilummui rara.

¹⁴ Ia to surudadunna suruga undi nturu'i ssakei nyarang mabusa, namangpakean lenan mabuccang macerrong.

¹⁵ Den pa'dang liwa' taran messun lan mai anga'na, na iamo napake la ntaloi sininna bangsa. Naparentai mpake tekken bassi, nalese tooi to anggoro' lan panglulluran anggoro' kamabirisan-Na Puang Allataala, battuananna mpangpekitanni kamabirisan-Na.

¹⁶ Den sanga diuki' jio pakean malando-Na na upan-Na, "Rajana sininna raja na Puangna sininna puang."

¹⁷ Ngkita pole' omo' mesa' malaeka' ke'deh jao allo. Metambai lako sininna manuk-manuk jao langi' nakua, "Sirempun kamu' mimale lako pangmaroasan-Na Puang Allataala

¹⁸ ngkande juku'na raja, pangbarani, surudadu, nyarang sola tomessakena. Juku'na sininna tau, la tokaissenan, la tobiasa, juku'na to kaunan iarika totangkaunan!"

¹⁹ Kumane' ngkitai joo olok-olok sola tuu lako raja lan lino na surudadunna sirempun la nnewai mangrari joo tossakei nyarang mabusa sola surudadun-Na.

²⁰ Apa ditalomi anna dijokko joo olok-olok sola nabi tangtongan, namane' dipembuangan tuo tama api colo' manglanya-lanya. (Ia to nabi tangtongan iamo to mangka mpugauk tanda makalaen-laen jio olona joo olok-olok. Ia joo tanda napake joo olok-olok mpalao sala tau to den tandana joo olok-olok jio kalena na ssompa tooi joo tau-taunna.)

²¹ Na ia to surudadunna dibuno mpake pa'dang to messun lan mai anga'-Na joo tossakei nyarang mabusa. Ratu ngasanmi to manuk-manuk ngkandei samosona juku'na tuu lako to dibuno.

Wahyu

Video Wahyu 19

Ikuti Kami:

KONTAK | PARTISIPASI | DONASI