Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali ojo karoonya etu, aku mangandonge loo to ewa loo ntau boros kojo magombo sindara, to’onya, “Barong i Pue Allah! Pue Allah ngkita, Ia semo to mampalaes tau, pasi Ia semo to bae kayawaNya pei to makuasa.
2 Apa tempo Ia mangahuku to lino, hukuNya etu masipato pasi singkonong ewa anu to monso. Ia roomo mangahuku lonte bae etu, to mampakaja’a lino apa ia magoyal. Ia mangahuku lonte etu apa saba lonte etu room mampopate yau to papolaong i mPue Allah.”
3 Wali yako etu aku mangandonge wo’u loo ntau boros magombo sindara manganto’o, “Barong i Pue Allah! Apa kumbu nu apu to mangkoni yau lonte etu, re’e kekumbungkumbu singkasaenya.”
4 Wali karoonya sira magombo etu, ketua to dua mpuyu pei opo mba’a pasi anu to opo tuwu etu, sira madungku yau ri tana mampue mampakabae i Pue Allah anu to matunda ri gaderaNya. Sira manganto’o, “Amin. Barong i Pue Allah!”
5 Wali yako etu aku mangandonge loo to yako ri gadera Makole, loo etu manganto’o, “Barong i Pue Allah komi samparia to papolaongiNya, etu semo komi to mangurawa pasi to tu’amo, songonya to mampalaika Ia saba manga’angga Ia.”
6 Wali karoonya aku mangandonge loo etu, aku mangandonge wo’u loo to ewa loo ntau boros, loo etu kawuuwuu ewa wera pasi ewa lamoa. Loo etu manganto’o, “Barong i Pue Allah! Apa i Pue, Allah ngkita anu to Makuasa, Ia semo Makole!
7 Wali anu kita mampakasanang pasi ndende rayanta pasi mangabarong keyawaNya, apa ratamo temponya pampaporongo Ana nu Domba, pasi kasimpandeNya roomo mampasilonga koronya.
8 Kasimpandenya etu ia rawaika baju lena to magaya. Baju etu mayongo pasi makilo.” Baju lena to magaya etu batuanginya palaong ntau to i Pue Allah Puenya to singkonong pei Ia.
9 Wali pomakau i mPue Allah manganto’oka aku, “Tulis gombo si’i. Masanang raya ntau to radinsi tempo roa pampaporongo Ana nu Domba.” Pasi pomakau etu manganto’o wo’u, “Gombo si’i monso yako resi i Pue Allah.”
10 Wali yako etu aku madungku yau ri tana ri tango mbiti mpomakau etu damampue mampakabae ia. Pei ia manganto’oka aku, “Ne’e mampue mampakabae aku, pampue resi i Pue Allah. Apa aku seja to papolaong i mPue sewaju ewa korom pasi ewa a’i-a’imu to mangangkongko seja anu to napotundeka i Yesu. Apa anu to napotundeka i Yesu, etu semo anu to nato’oka i Nosa Mapasing to pantuntu tuntu i mPue Allah tempo owi.
11 Wali yako etu aku mangkita saruga tiloka, panewa aku mangkita jarang to buya pasi re’e to mampolea. To mampolea jarang etu Ia rato’oka i Masipato Rasarumaka pasi i Monso. Ia mangahuku pasi mangamusu baliNya. Tempo Ia mangika palaong etu, Ia mangika to singkonong pei i Pue Allah.
12 MataNya ewa kaa nu apu pasi ndate wo’oNya re’e songko makole malagi. Pasi ri koroNya re’e sanga ratulis, pei sanga etu tare tau to mangansani kasimbalinya yako Ia.
13 Ia mangampake baju to rayo’o la’u raya nu raa. Pasi Ia re’e wo’u sangaNya, etu semo i Tuntu mPue Allah.
14 Wali samparia tentara nsaruga sira mangalulu Ia. Sira seja mampolea jarang to buya, pasi sira mangampake kain lena to magaya, to buya pasi mayongo.
15 Wali Ia to sangaNya i Tuntu mPue Allah, Ia re’e panai mataja to masuwu yako ri ngangaNya. Panai etu danapake damanganangi to lino. Panewa Ia damangkuasang sira Ia mangampake toko wubu. Ia seja damangalombu wua nu anggur la’u raya mbayau mbatu, batuanginya i Pue Allah anu to Makuasa maja’a kojo rayanya tempo Ia mangahuku to lino.
16 Wali ri bajuNya pasi ri pa’aNya re’e seja sanga ratulis re’e ria, sanga etu semo: MAKOLE TO MANGKUASANG SAMPARIA MAKOLE PASI PUE TO MANGKUASANG SAMPARIA PUE.
17 Wali yako etu aku mangkita samba’a pomakau i mPue Allah makore ri mata nu eo. Pomakau etu maroso loonya mangampokio samparia tonsi to mayoko ri rao. Ia manganto’oka tonsi etu, “Mai pei kasiromu mangampea roa to bae to danaika i mPue Allah.
18 Mai mangantungku yau wombo-wombo ntau to mate, etu semo wombo makole-makole, pasi wombo nu ngkepala-kepala ntentara, wombo ntau to maroso, wombo njarang, pasi wombo ntau to mampolea jarang etu. Mai pei tungku yau wombo ntau samparia, to si’a watua pasi to watua, to mangurawa pasi to tu’amo.” Ewa wetu nato’o mpomakau etu.
19 Panewa aku mangkita binatang to maja’a pasi makolemakole nto lino pasi tentaranya sira siromu damangamusu Ia to mampolea jarang buya, pasi joaNya seja sira damangamusu.
20 Pei taa mawali apa binatang to maja’a etu rasoko sindara-ndara pei to pantuntu tuntu to taa monso. To pantuntu tuntu etu mangampake kuasa yako binatang etu tempo seore mangika palaong to taa rapobiasa. Ia mangantipu tau to re’e tondong binatang to maja’a pasi to mampue tau-tau binatang etu. Wali see naka binatang to maja’a pasi to pantuntu tuntu to taa monso etu sira dua rasoko panewa rataji yau lo’u raya ndano nu apu to la’u sedawa to mawea la’u ria.
21 Panewa makolemakole pasi tentaranya etu, sira samparia napopate yau mpanai to masuwu yako ri nganga nTau to mampolea jarang buya. Wali karoonya sira mate yau, ma’i tonsi mantungku yau wombonya jamo imba kabosunya.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA