Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ge'enaka de tomalega, de towimake 'o Domba ma Ngowaka woma'okode 'o Sion ma gigie ma dekuoka; 'una de ya 144.000 gee manga mengaka moi-moi 'isilefoka to 'una 'awi ronga de to ma Dea.

² Ge'enaka de to'isene 'o 'ilingi 'o diwanguku 'ikuruusu 'isoka 'o deneta 'ila-laagomo ma guruusu, de 'isoka 'o duturu 'iamo-amokie. 'O 'ilingi ge'ena to'isene 'isoka 'o koroncong yakuti ma 'ilingi.

³ 'O koana ma go-gogere ma bionoka, de mita 'o barangi 'i'ahu-'ahu ngai soata de yopa-pareta gee ma go-gogere ge'ena yosigilolitino, ya 144.000 go'ona yonyanyi 'o nyanyi ma sungi moi. 'O nyanyi ge'ena komoiwa moi 'idadi yosinyanyi, duga ka gee ya 144.000 go'ona gee yakisilahakau 'o duniaka.

⁴ 'Ona ge'ena yotebini 'isoka 'o nyawa koma'iwa yomakapake sababu koma'iwa yomasi'idu de 'o nge-ngeweka. 'Ona wimoteke 'o Domba ma Ngowaka gu'una kiaka naga bato wotagi. Naga 'o nyawa 'iodumoka, 'onau ge'ena yakisilahakau so 'ona yodadi matero ka 'o joro ma hasili ma si-siraka gee yosisuba-suba ma Jo'oungu ma Dutuka de 'o Domba ma Ngowakika.

⁵ 'Ona koma'iwa yoeluku, de manga sala ka ma eta ma koi'iwa.

⁶ Ge'enaka de tamake 'o mala'ekati 'iregu moioli 'isoso 'o ngawa-ngawaka daku 'o gurutie. 'O mala'ekati ge'ena 'i'asa 'o Habari ma Owa 'ika-kakali ma Jo'oungu ma Dutuno, ma ngale 'isitotara 'o nyawa-nyawaka 'o duniaka, ge'ena la 'o sagala sukuka, 'o sagala negaraka, 'o nyawa gee moi-moi manga demo yopake-pakeka de 'o soana-soanika.

⁷ 'O mala'ekati ge'ena 'imapoaka yaamo-amokie 'ingose 'ato, "Salingou winihoromati de winisingounu ma Jo'oungu ma Dutu de winisiarene sababu 'una 'ifoloi 'awi kuasa 'iamoko de 'awi singina posironga 'isureka! Sababu ma 'orasi ya'adonokau ma Jo'oungu ma Dutu wahakimi 'o nyawa 'o duniaka 'iodumu. Winisuba ma Jo'oungu ma Dutu, sababu 'unau wosidadi-dadi 'o diwanga, 'o tonaka, 'o ngooto de 'o 'akere ma utu 'iodumu!"

⁸ 'O mala'ekati gee ma di-disiraka 'iboa 'itagioka, de moioli 'iboa de kaingosekau, "Ee! 'O Babel ma kota 'iamo-amoko ge'ena 'itorouokau! 'O Babel ma nyawa manga nyafisuu ma dorou ge'ena 'o nyawa 'o duniaka yamotekokau, ge'ena matero ka 'o daluku 'isi-siapoto yakikula so yaki'eto."

⁹ 'O mala'ekati ngai modidi 'iboaka de 'o ngai moioli 'iboa, de 'isigasoko yaamo-amokie 'ingose 'ato, "'O nyawa gee yasuba-suba 'o haewani de mita to 'ena ma patongo, de to 'ona manga mengaka bolo manga giamoka de ma 'ena 'o haewani ge'ena ma no-nako,

¹⁰ 'o nyawa go'ona 'asa ma Jo'oungu ma Dutu posironga wakingamoka, so 'ona matero ka 'o daluku ma cuka yakisi'okere! 'O nyawa yoodumu go'ona 'asa yosangisara 'o walira 'iluru-lurusu ma dodaka, 'o mala'ekati 'itebi-tebini de 'o Domba ma Ngowaka gu'una 'awi bionoka.

¹¹ 'O 'uku ma dowo gee yakisa-sangisara 'o nyawa-nyawa go'ona, 'asa 'ikuwuwulu kaisi'ado-'adonika. Ge'enau so gee yasuba-suba 'o haewani ge'ena de to 'ena ma patongo, de gee ma haewani ge'ena ma ronga ma no-nako de ma 'ena 'onaka, 'ona 'asa kaisi'ado-'adonika yosangisara."

¹² Ma ngale ge'ena 'o nyawa gee wisingou-ngounu ma Jo'oungu ma Dutu de manga ngo-ngaku 'ikua-kuata 'o Yesusika, salingou yotongosono ngaro yosangisara ma. 'Ona ge'ena ma Jo'oungu ma Dutu 'awi kawasa.

¹³ Ge'enaka de to'isene 'o 'ilingi 'o sorogaaku kaingosekau, "Nalefo neda: 'Ikurue ne'enau, yosanangioka 'o nyawa gee yosongene 'ena 'ona tatapu wingaku 'o Yesus!" 'O Ngomasa 'Itebi-tebini 'ingose, "Ma goungu! 'Ona 'asa yomaogoro yomanarama 'ikua-kuata, sababu to 'ona manga manarama ma hasili 'asa kaitaurika yakimoteke."

¹⁴ Ge'enaka de tamake 'o kakamoro 'i'are-'arese. Ma kakamoro ge'ena ma dekuoka wimoi wogogerie 'isoka 'o nyawa. 'Awi saekoka 'o tuala 'o guraci ngai moi, de 'awi giamoka 'o sabit ngai moi 'idoto-doto.

¹⁵ Ge'enaka de 'o mala'ekati 'iregu ngai moi 'isupu ma Jo'oungu ma Dutu 'awi Woano 'o sorogaaka. De ma 'ilingi yaamo-amokie 'ingose 'unaka gee wogogerie 'o kakamoro ma dekuoka gu'una konee, "'Ani sabit ge'ena na'ese de no'utukou. Sababu ya'adonokau 'o togutuku. 'O dunia 'isi 'ade-'ade 'isoka 'o sowoko 'i'umukukou so no'utukou!"

¹⁶ Ge'enaka de 'una gee wogoge-gogerie 'o kakamoro ma dekuoka, 'awi sabit wosimanarama 'o duniaku, so 'o dunia mita wa'utuku.

¹⁷ Ge'enaka de tamake 'o mala'ekati 'iregu moioli 'isupu ma Jo'oungu ma Dutu 'awi Woano 'o sorogaaka. 'Ena mita ya'aono 'o sabit ngai moi 'idoto-doto.

¹⁸ Ge'ena 'ipasa de 'o mala'ekati 'iregu ngai moi gee yaku-kuasa 'o 'uku 'iboa 'o su-suba 'idu-dutuuku ma ngiino. De ma 'ilingi yakua-kuatie 'isuloko 'o mala'ekatika gee ya'aono 'o sa-sabaata 'idoto-doto ge'ena, kaingosekau, "Nosimanarama 'ani sa-sabaata ge'ena de nasasoro 'o 'anggur ma sowo-sowoko 'o duniaka, sababu ma 'anggur ma sowoko ge'ena 'ikoki'umukukou!"

¹⁹ So 'o mala'ekati ge'ena ma sa-sabaata 'isimanarama 'o duniaku, de yasasoro 'o 'anggur ma sowo-sowoko ma utuoka. Ge'enaka de yosi'umo 'o 'anggur 'ide-deteo ma ngii 'iamo-amouku, ge'ena la ma Jo'oungu ma Dutu 'awi gorosau.

²⁰ 'O 'anggur ma sowo-sowoko ge'ena yateo 'o kota ma dudunoka, de ma 'anggur 'isiteo-teono doka 'o 'aunu 'i'uisi 'isoka 'o 'akere ma roesou; ma gurutu 'o kilo ratusu sa'angeka, de ma luku rekeni 'o meteri modidiku.

Wahyu

Video Wahyu 14

Ikuti Kami:

KONTAK | PARTISIPASI | DONASI