Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Radu jak seno nyak ngeliak, raduni keliakan Anak Biri-biri udi cecok di atas Bukit Sion. Jejama Ia wat 144.000 jelma sai ditagak masing-masing tetulis gelar-Ni gelar Bapa-Ni.

² Raduni nyak ngedengi suara jak langit menderu injuk bunyi way terjun sai balak rik injuk bunyi guntor sai hibat. Suara udi kedengian injuk suara musik jak jelma-jelma sai main kecapi sai lagi bemain kecapi.

³ Di hadap takhta rik keepak makhluk rik jelma-jelma sai mimpin di sekeliling takhta udi, 144.000 jelma udi nyanyiko suatu nyanyian sai ampai. Nyanyian udi mak dapok dipelajari ulih sai jelma pun selain ulih 144.000 jelma udi sai radu dibebasko jak bumi.

⁴ Tian udi jelma-jelma sai tetap murni injuk muli, mani mak ngadako hubungan jama bebai. Tian nutuk anak Biri-biri udi mik dipa gaoh ia mik. Jak hantara sunyin manusia, tiando sai radu dibebasko sebagai persembahan mula-mula jama Allah rik jama Anak Biri-biri.

⁵ Mak pernah tian bebuhung; rik mak ngedok cela cutik pun jama tian.

⁶ Raduni nyak ngeliak sai malaikat bareh sai hambor langgar di langit. Malaikat udi ngusung kabar tentang Kabar Betik sai abadi untuk disampaiko jama manusia di bumi yakdo jama sunyin bangsa, suku, bahasa rik negara.

⁷ Malaikat udi beseru jama suara sai keras, "Rabaido jama Allah, rik pujido keagungan-Ni! Mani radu waktuni Allah ngehakimi manusia. Sumbahdo Ia sai ngejadiko langit, bumi, laok rik sunyin mata way!"

⁸ Malaikat kerua nyusul malaikat sai mula-mula rik beseru, "Radu hancor! Kota Babel sai balak radu hancor! Ia radu nyani sunyin bangsa jadi mabuk anggor -- yakdo anggor jak nafsu hajorni!"

⁹ Sai malaikat ketelu nyusul rua malaikat udi, sambil beseru jama suara keras, "Jelma sai memuja binatang udi jama patungni, rik ngedok tanda binatang udi di tagak atau culukni,

¹⁰ jelma udi haga nginum anggor-Ni Allah, yakdo anggor kebutongan-Ni sai radu dipikko-Ni mik delom rangni, tanpa dikurang cutik pun! Sunyin jelma udi haga disiksa di delom apui rik belerang di hadap malaikat-malaikat suci rik di hadap Anak Biri-biri udi.

¹¹ Hasok apui sai nyiksa jelma-jelma udi haga mengepul terus-menerus untuk selama-lamani. Di rani di bingi mak ngedok taru-taruni tian tesiksa, yakdo tian sai nyumbah binatang udi rik patungni, sunyin jelma sai ngedok tanda gelar binatang udi."

¹² Delom hal inji umat-Ni Allah sai taat jama perintah-perintah-Ni Allah rik setia jama Isa, perlu jadi tabah.

¹³ Raduni nyak ngedengi suara jak surga cawa, "Tulisdo inji: Mulai tano, bebahagiado jelma-jelma sai mati waktu ngelayani Tuhan!" "Benor!" jawab Ruh-Ni Allah. "Tian haga taru beguai keras, mani hasil pelayanan tian selalu haga jejama tian."

¹⁴ Kak raduni nyak ngeliak, maka keliakan suatu awan sai handak. Di atas awan udi mejong sai jelma sai keliakanni injuk manusia. Di ulu-Ni wat sai mahkota emas, rik diculuk-Ni wat sai arit sai tajam.

¹⁵ Kak raduni sai malaikat bareh luah jak Lamban Ibadah. Jama suara sai keras, ia beseru jama Ia sai mejong di atas awan udi, "Ayunkodo arit-Mu udi rik getasdo tano, mani radu waktuni untuk panen; bumi radu mesak untuk digetas."

¹⁶ Kak raduni Ia sai mejong di atas awan udi ngayunko arit-Ni mik bumi maka bumi pun digetas.

¹⁷ Kak raduni nyak ngeliak sai malaikat sai bareh lagi luah jak Lamban Ibadah di surga. Ia pun nyating sai arit sai tajam.

¹⁸ Radu jak seno, sai malaikat bareh, sai bekuasa atas apui, ratong jak mezbah. Jama suara sai kuat ia beseru jama malaikat sai nyating arit sai tajam udi, "Ayunkodo aritmu udi rik pelokdo uah-uah batang anggor di bumi, mani uah-uahni radu mesak!"

¹⁹ Maka malaikat udi ngayunko aritni mik bumi rik ngarit uah-uah anggor jak batangni, raduni nayarkoni mik delom alat pemeras anggor kebutongan-Ni Allah sai meluap-luap.

²⁰ Uah-uah anggor udi diperas di luah kota, rik jak alat-alat pemeras anggor udi ngalerdo rah injuk way, sejaoh telu ratus kilometer, rik serelom hamper rua meter.

Wahyu

Video Wahyu 14

Ikuti Kami:

KONTAK | PARTISIPASI | DONASI