Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Jadi mangkawah ma ahu, anjaha tonggor ma, jongjong do Anak ni biribiri in i atas Dolog Sion anjaha rap pakon-Si saratus ompat puluh ompat ribu halak; tarsurat do goran-Ni pakon goran ni Bapa-Ni bani pardompakan ni sidea.
2 Hubogei ma sora hun nagori atas songon parhasak ni buei bah banggal anjaha songon pardobur ni longgur na maling; ia sora na hutangar ai, songon sora ni husapi na giniut ni parhusapi do.
3 Idodingkon sidea do doding na baru i lobei ni paratas ai ampa i lobei ni pargoluh na ompat ai ampa sintua ai; sahalak pe seng dong na boi mangguruhon doding ai, sobali sisaratus ompat puluh ompat ribu halak ai, na tinobus hun tanoh in.
4 Sidea do na so pabutakkon dirini bani naboru; songon anak boru na so haliaban do sidea. Iirikkon sidea do Anak ni biribiri in, atap huja pe Ia laho. Sidea do na dob tinobus humbani hajolmaon, limbuah bani Naibata pakon bani Anak ni biribiri in.
5 Seng dong dapot ladung bani pamangan ni sidea. Seng dong tikas bani sidea.
6 Huidah ma sada malekat na legan habang i tongah langit; adong do bani Ambilan Na Madear sisadokah ni dokahni, siambilankononni bani na mangiankon tanoh in, bani haganup bangsa, marga, hata pakon suku,
7 anjaha maling do sorani mangkatahon: “Habiari nasiam ma Naibata anjaha pasangap ma Ia, ai domma jumpah panorang ni panguhumon-Ni! Sombah nasiam ma Ia, Sitompa langit pakon tanoh pakon laut pakon sagala bah tubuh!”
8 Jadi mangihut ma malekat na legan, ai ma na paduahon, ihatahon ma: “Domma madabuh, domma madabuh Babilon na banggal in, na mambahen mabuk sagala bangsa marhitei anggur sipagarang uhur parbangkison.”
9 Dob ai mangihut ma bani sidea malekat na legan, ai ma na patoluhon, na mangkatahon maling, “Barang ise na manombah binatang ai ampa gana-gana ni, anjaha na manjalo tanda ai bani bohini atap bani tangani,
10 maningon inumonni do anggur hamarahon ni Naibata, na dob pinasirsir seng maragu ibagas panginuman hamarahonni; siarsik-arsikon do ia ibagas apuy pakon hirtah i lobei ni sagala malekat na pansing in ampa i lobei ni Anak ni biribiri in.”
11 Naik ma timus ni hamarsikon ni sidea ronsi sadokah ni dokahni. Seng jumpahan parsaranan arian borgin sagala na manombah binatang ai pakon gana-ganani, sonai sijalo tanda ni goranni ai.
12 Ibagas on sabar do uhur ni halak na pansing, siramotkon titah ni Naibata pakon haporsayaon bani Jesus.
13 Jadi hubogei ma sora hun nagori atas, na mangkatahon, “Suratkon ma: Martuah ma na matei ibagas Tuhan in humbani sonari nari. Tongon,” nini Tonduy in, “na marsaran ma sidea humbani halojaon ni sidea, ai na mangihut ma bani sidea na hinorjahon ni sidea.”
14 Dob ai mangkawah ma ahu, anjaha tonggor ma: Sada hombun na lopak, anjaha i atas hombun ai hundul sahalak na usih hubani Anak ni jolma in, marsortali omas bani uluni anjaha sasabi na marot bani tangan-Ni.
15 Jadi haluar ma sada malekat na legan hun rumah panumbahan ai, na mardilo-dilo marhitei sora na maling hubani na hundul i atas hombun ai: Sabihon ma sasabimu anjaha sabi ma, ai jumpah ma panorang sabion, ai masak tumang ma sisabion na i tanoh in.
16 Jadi isabihon na hundul i atas hombun ai ma sasabini hu tanoh in, isabi ma tanoh in.
17 Luar ma homa malekat na legan hun rumah panumbahan na i nagori atas in, ia pe manjolom sasabi na marot do.
18 Anjaha luar ma humbani anjapanjap ai sada malekat na legan na markuasa pasal apuy, na mandilohon marhitei sora na maling hubani na manjolom sasabi na marot ai, nini: Sabihon ma sasabimu na marot in, buati ma haganup buah ni hayu anggur na i tanoh in, ai domma mabei buahni.
19 Jadi isabihon malekat ai ma sasabini hu tanoh in, ibuati ma sagala buah ni hayu anggur na i tanoh in, anjaha igijigkon ma ai hu kilang hamarahon ni Naibata na banggal ai.
20 Idarat ni huta ai do idogei buah anggur ai, gabe mandarat ma daroh humbani pangilangan ai pala das hubani kokang ni huda, saribu onom ratus stadia daohni.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA