Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 No'idudui kon tua inontongku ki Adií in Domba sinimindok kon tudu im Buḷud Sion. Kotaki-takinnya oyuíon 144.000 intau inta kom pogot monia aim pinaisan in tangoi-Nya bo tangoi i Amaí-Nya.
2 Bo dinongogku in singog nongkon ḷangit naonda bo singog in dunuk moḷoben bo naí doman singog ing gotup inta totok im moropot. Singog inta dinongogku tua naí doman onda bo singog ing kecapi mita inta kinuti in intau inta mota'au mokuti.
3 Mosia tua nopomanyanyi in lagu inta mobagu kon tayowon tampat pomomarenta'an bo kon tayowon im mahaḷuk opat bo itoi mita. Diaíbií tobatuímai intau mokobalajar kon lagu tatua, kolikudbií in intau inta 144.000 inta aim pinobebas nongkon dunia na'a.
4 Mosia tua intau inta umuran nodarit naonda bo porawan, sim mosia diaíbií mosiug takin bobay. Mosia umuran dumudui magií-makow ko'i Adií in Domba kon ondakabií im bayaían-Nya. Mosia sinobusdon nongkon sigad in intau mita. Mosia tuata inta ain pinobebas bo inogoi saḷaku sosumbah inta muna ko'i Allah bo ko'i Adií in Domba tatua.
5 Mosia diaíbií dodai onda monguboḷ; bo diaíbií doman im mokotor ko'i monia.
6 No'iduduimai kon tua aku'oi noko'ontong kon tobatuí malaekat ibanea inta iḷumayug noḷantud kon ḷangit. Malaekat tatua nodia kon Habar Mopia inta mononoi sim poyaputon kon intau kon dunia na'a bo kom bayongan bangusa, suku bahasa bo negara.
7 Malaekat tatua nomaḷuí noropot totok, nana'a: "Ko'ondokdon ko'i Allah, bo pomuliadon in Sia! Sin na'adon in wakutu i Allah mohakim kon dunia. Sumbahdon in Sia inta ain nomia kon ḷangit, butaí dagat bo bayongan bokakak!"
8 Malaekat induanya dinumudui kom malaekat inta muna bo sindaḷan mopobaḷuí, "Ain noḷabuí! Kotaí im Babel inta moḷoben tatua ain noḷabuí! Sia inta ain nopoḷoḷangu kom bayongan bangusa takin tubig in anggur -- tuata in anggur nongkon ibognya inta mokotor!"
9 Malaekat intoḷunya dinumudui doman kom malaekat taya dua tatua bo sindaḷan doman nopobaḷu noropot, nana'a: "Intau inta mosumbah kom mahaḷuk tatua takin patongnya, bo oyuíon tanda im mahaḷuk tatua kom pogot ande kon limanya,
10 yo intau tatua monginum kon anggur i Allah, tuata in toruí-Nya inta ain inalin-Nya kom bonu in tampat-Nya, bo diaíbií gina'atan topilikpamai! Intau mita tatua toko sikisa'an kom bonu in tuḷu bo balerang kon tayowon im malaekat mita mosuci bo kon tayowon Adií in Domba tatua.
11 Poyok in tuḷu inta mopororiga ko'i monia tua umuran bidon mo'idamonik. Singgai doḷom diaí goga-gogaian poposikisa'an ko'i monia inta nosumbah kom mahaḷuk tatua bo patongnya bo inta ain sinon tanda'an in tangoi mahaḷuk tatua."
12 Daí kon na'a, umat i Allah inta motoindudui kom parentah-Nya bo mosatia ko'i Yesus, musti mokopotabah.
13 Bo aku'oi bui nokodongog kon singog nongkon soroga noguman, "Paisdon in na'a: Mulaidon tana'a makow, koḷungangadon in intau mita minatoi inta minatoi kowakutu in yogotpa nogaid kon oaíidan i Tuhan!" "Totu'u intua!" tubag in Roho i Allah. "Mosia im mogogai bidon mogaid kon oaíidan monia, lantaran boli im pinogaidan monia umuran kotaki-takin monia."
14 No'iduduimai kon tua, aku'oi noko'ontong kon tobatuí goḷom mobudoí. Kon tudu ing goḷom tatua oyuíon in tobatuí intau ilimituí naonda bo intau. Sia nogi bandow im mahkota buḷawan bo kokada-kadai in sabit inta moḷanit.
15 Onda intua, tobatuí malaekat ibanea iḷumuai nongkon Baḷoi i Allah. Bo malaekat tatua nomaḷuí ko'i-Nia inta ilimituí kon tudu ing goḷom tatua, kai-nia: "Pongaḷoikadon in sabit-Mu nion bo yangkitdon tana'a makow, sin wakutunyadon mokoyut in na'a, noguyangdon in dunia na'a, mota'audon ratabon!"
16 Bo Sia inta ilimituí kon tudu ing goḷom tatua nopongaḷoi domandon in sabit-Nya kon dunia na'a, bo sino'inutnyadon bungai in dunia na'a.
17 No'iduduimai kon tua aku'oi noko'ontong doman bui kon tobatuí malaekat ibanea inta iḷumuai nongkon Baḷoi i Allah kon soroga. Sia nokadai doman kon sabit inta moḷanit.
18 Nopaḷut makow kon tua, tobatuí malaekat ibanea, inta nongawasa kon tuḷu, namangoi nongkon meja pototuduan kon sosumbah. Sia nomaḷuí noropot kom malaekat inta nokadai kon sabit moḷanit tatua, "Pongaḷoidon in sabit-Mu nion bo sabitdon bungai mita in anggur inta kon dunia sin nogurangdon mita im bungainya!"
19 Daí malaekat tatua nopongaḷoi domandon in sabitnya kon dunia na'a bo nonyabit kom bungai mita in anggur tatua bodongka pinogambatnya kom bonu ing gilingan moḷoben, tuata ing gilingan toruí i Allah.
20 Buangai in anggur mita tatua giniling kon ḷuai ing kotaí bo iḷumuaidon in duguí nongkon gilingan tatua, mo'ilig naonda bo ongkag. 300 km ing koyayuk kino'iligannya, bo kolinowea gogioí bodoyowaí nometer.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA