Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Limbah te aku mite, palus mamala Anak Tabiri te mendeng intu hunjun Bukit Sion. Hayak Dengae aton 144.000 biti oloh je intu lingkau genep bitie aton tarasurat aran Ayue tuntang aran Bapae.
2 Palus aku mahining auh bara langit letu-letus sama kilau danum soho manjato tuntang sama kilau auh garuntong nyaho je paham. Auh te tarahining kilau auh musik ain kare tukang main kacapi je kanjerae mangacapi.
3 Intu taharep padadusan tuntang epat taloh belom dengan kare pamimpin intu hakaliling padadusan te, 144.000 biti oloh manyanyi ije nyanyi taheta. Nyanyi te dia tau iajar awi eweh bewei beken bara ewen je 144.000 biti te je jari iliwus bara hunjun petak.
4 Ewen te oloh je tinduh kilau oloh bawi bujang, awi ewen jaton puji hinje dengan oloh bawi. Ewen manuntut Anak Tabiri te akan kueh bewei ie haguet. Bara marak kakare ungkup oloh kalunen, ewen te ih je jari iliwus kilau parapah je pangkasolake akan Hatalla tuntang akan Anak Tabiri.
5 Ewen dia puji mananjaro; tuntang isut mahin jaton kasalan intu ewen.
6 Palus aku mite ije biti malekat beken je tarawang gantong intu langit. Malekat te mimbit kabar tahiu Barita Bahalap je katatahie uka inyampai akan olon hong kalunen iete akan kakare bangsa, suku, bahasa tuntang negara.
7 Malekat te mantehau hapan auh je hai, "Keleh mikeh dengan Hatalla, tuntang keleh manara kahain Aie! Basa katikae jari sampai Hatalla mahakim olon. Keleh manyembah Ie je manjapa langit, petak, tasik tuntang kakare tahasak danum!"
8 Malekat je kaduee manuntut malekat je solake sambil hamauh, "Jari manjato! Lewu Babel je hai jari manjato! Ie jari mawi kakare bangsa babusau dengan anggor -- iete anggor kipen karayape!"
9 Ije biti malekat je kateloe manuntut due malekat te, sambil mantehau hapan auh je hai toto, "Oloh je manyembah meto te dengan hampatonge, tuntang je mandino tanda ain meto te intu lingkaue atawa intu lengee,
10 oloh te kareh mihop anggor ain Hatalla, iete anggor kalait je jari inusoh akan huang sarangae, isut mahin jaton katapase. Oloh handiai te kareh ingapehe huang apui tuntang barirang intu taharep kare malekat je barasih tuntang intu taharep Anak Tabiri te.
11 Asep apui je mangapehe kare oloh te kareh mangangkewul harajur palus katatahie. Ewen te ingapehe raju-rajur handau hamalem, iete ewen je manyembah meto te tuntang hampatonge, oloh handiai je mandino tanda aran meto te."
12 Huang hal toh ungkup ain Hatalla je baketep manumon kare parentah Hatalla tuntang baketep dengan Yesus, buah ewen te tanggar ateie.
13 Palus aku mahining auh bara sorga hamauh, "Surat jetoh: Manampara bara katika toh, salamat kare oloh je matei metoh ie bagawi akan Tuhan!" "Bujur!" koan Roh Hatalla tombah. "Ewen kareh terai bagawi babehat basa hasil gawin ewen kareh harajur mampahayak ewen."
14 Limbah te aku mite, palus lembut ije baunandau baputi. Intu hunjun baunandau te mondok ije biti je ampie sama kilau olon. Intu takolok Ayue aton ije makota amas, tuntang intu lengee aton ije arit je banyihi.
15 Limbah te ije biti malekat beken balua bara Human Hatalla. Hapan auh je hai, ie mantehau oloh je mondok hunjun baunandau te, "Keleh mariwis arit Ayum te tuntang getem metoh toh kea, basa katikae jari sampai uka manggetem; kalunen jari masak uka inggetem!"
16 Palus oloh je mondok hunjun baunandau te mariwis arit Ayue akan hunjun petak maka kalunen palus inggetem.
17 Limbah te aku mite ije biti malekat beken tinai balua bara Human Hatalla hong sorga. Ie kea mahin mimbing ije arit je banyihi.
18 Limbah te, ije biti malekat beken, je kuasa mahunjun apui, dumah bara mesbeh. Hapan auh je hai toto ie mantehau malekat je mimbing arit banyihi te, "Keleh mariwis aritm te tuntang tetek kare bua anggor hunjun petak, awi kare buae te jari masak!"
19 Maka malekat te mariwis arite akan hunjun petak tuntang mandarap kare bua anggor bara batange, palus manjakahe akan huang eka mahamis anggor, iete eka kalait Hatalla je hasep.
20 Kare bua anggor te ihamis intu luar lewu, tuntang bara sarangan eka mahamis te balua daha mahasor kilau batang danum kapanjange telo ratus kilo meter tuntang kandaleme due meter.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA