Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Nampa kuciniki, nakucini’mo anjo Ana’ Gimbalaka ammenteng rate ri Bulu’ Sion. Nia’ Naagang tau 144.000 jaina, niaka ngaseng ri tompo’ kanynyinna ke’nanga tattulisi’ arenNa siagang arenNa ManggeNa.

² Nampa nia’ kulangngere’ sa’ra battu rate ri langika ammarrung sangkamma sa’ra je’ne’ tu’guru’ lompoa siagang sangkamma gunturu’ a’gamarrung lompoa. Anjo sa’raya sangkamma nilangngere’ sa’ra kacapi niko’bika ri pakarena kacapia.

³ Na ri dallekanna anjo empoang kalompoanga, siagang appaka olo’-olo’, kammayatompa sikamma anjo pamimping akkulilinga ri anjo empoang kala’biranga, akkelong ngasemmi anjo tau 144.000 jaina. Kelongang beru anjo nakelonganga ke’nanga. Manna inai takkulleai napappilajari anjo kelonga, pantaranganna anjo tau 144.000 jaina. Yangasemmi anjo ke’nanga tau le’baka nilappassang battu ri linoa.

⁴ Iaminjo ke’nanga le’baka anjagai katangkasanna ke’nanga lanri tenana nale’ba’ sialle siagang bai’-bainea; tangkasaki ke’nanga sangkamma tuloloa. Amminawangi ke’nanga ri Ana’ Gimbalaka manna kemae Nalampai. Iaminjo ke’nanga le’baka nilappassang battu ri sikontu rupataua, a’jari bungasa’ passare mae ri Allata’ala siagang mae ri Ana’ Gimbalaka.

⁵ Tale’bakai a’balle-balle ke’nanga, siagang tena callanna ke’nanga manna sike’de’.

⁶ Nampa nia’ kucini’ se’re malaeka’ maraengang anri’ba’ tinggi rate ri langika. Anjo malaekaka angngerangi biritta iamintu ri sesena Kabara’ Baji’ mannannunganga, untu’ nipabattu mae ri rupataua ri lino; iamintu mae ri sikontu bansaya, sukua, bahasaya siagang pa’rasanganga.

⁷ Akkio’ lompomi anjo malaekaka nakana, "Malla’ mako ri Allata’ala, siagang pujimi kalompoanNa! Nasaba’ narapi’mi wattunna laNaadeli Allata’ala rupataua. Sombami Ia ampa’jariai langika, buttaya, tamparanga siagang sikontu timbusenna je’neka!"

⁸ Battumi pole malaeka’ ribokoanganna anjo malaeka’ uru-urua; akkio’mi anjo malaeka’ makaruaya angkana, "Tu’guru’mi! Tu’guru’mi kota Babel lompoa! Napa’jari nasa’ring ngasemmi je’ne’ anggoro’ sikontu bansaya ri lino, iamintu anggoro’ battu ri napasu gau’ bawanna!"

⁹ Nia’mo malaeka’ makatallu, ribokoanganna anjo malaeka’ ruaya, akkio’ lompoi angkana, "Anjo tau anynyombaya ri anjo olo’-oloka siagang patunna, siagang nia’ pammateinna anjo olo’-oloka ri abanna yareka limanna,

¹⁰ anjo taua langnginungi anggoro’Na Allata’ala, iamintu anggoro’ pangngalarroinNa le’bakamo nipanaung ri pangnginunganna; manna sike’de’ tena nalanipakurang anjo anggoro’ pangngalarroia! Yangasenna anjo taua lanisessai lalang ri pepeka siagang bara a’rinraya ri dallekanna malaeka’-malaeka’ matangkasaka siagang ri dallekanNa anjo Ana’ Gimbalaka.

¹¹ Anjo umbunna pepe’ ansessayai anjo taua lanaiki turus sa’genna satunggu-tungguna. Allo bangngi tena nale’ba’ ammari nisessa ke’nanga, iamintu sikamma tau anynyombaya ri anjo olo’-oloka siagang patunna, sikamma tau niaka pammateina areng battu ri anjo olo’-oloka."

¹² Lalang ri anne passalaka parallui a’jari sa’bara’ Umma’Na Allata’ala, ia amminawang turuka ri parentaNa Allata’ala siagang tamamminraya mae ri Isa.

¹³ Nampa nia’ kulangngere’ sa’ra battu ri suruga angkana, "Tulisiki anne: Maupaki tau matea appakkaramula ri kamma-kamma anne, ilalang nalayanina Batara!" Appialimi RohNa Allata’ala angkana, "Annabai! Lammari ke’nanga anjama terasa’, lanri tuli nia’na wassele’ palayananna ke’nanga anrurungangi."

¹⁴ Nampa kuciniki, na nia’mo kucini’ rammang kebo’. Irate ri anjo rammanga nia’ sitau ammempo sangkammaya nicini’ tau tanja’Na. Ri ulunNa nia’ songko’ bulaeng, na ri limanNa nia’ se’re kandao tarang.

¹⁵ Nampa nia’ se’re malaeka’ maraengang assulu’ battu ri Balla’Na Allata’ala. Akkio’ lompomi mae ri Ia anjo ammempoa irate ri rammanga angkana, "Soeammi kandaoNu siagang akkatto mako kamma-kamma anne, nasaba’ narapi’mi wattunna pakkattoanga; toami buttaya, jari wattunnami nikatto!"

¹⁶ Nampa Napasoemo kandaoNa anjo ammempoa irate ri rammanga nanikattomo linoa.

¹⁷ Nampa nia’ kucini’ se’re malaeka’ maraengannaya pole assulu’ battu ri Balla’Na Allata’ala ri suruga. Anna’gala’ tongi se’re kandao tarang.

¹⁸ Le’baki anjo, nia’mo pole se’re malaeka’ maraengang, iamintu malaeka’ makoasaya ri pepeka, battu ri tampa’ pakkoro’bangnganga. Akkio’ lompomi mae ri anjo malaeka’ anna’galaka kandao tarang angkana, "Soeammi kandaonu nanukere’ ngaseng sikontu rapponna anggoroka ri buttaya, nasaba’ ti’no’ ngasemmi rapponna!"

¹⁹ Jari napasoemi kandaona naung ri buttaya anjo malaekaka, nampa nakere’ ngaseng rapponna anjo anggoroka battu ri poko’na, nampa napasambila antama’ ri pammaccokang anggoro’ pangngalarroi lompoNa Allata’ala.

²⁰ Nipacco’mi anjo anggoroka pantarang kota; nassolommo ceraka battu ri anjo pammaccokang anggoroka sangkamma je’ne’ binanga a’lo’loroka sa’genna tallum bilangngang kilometere’ bellana, siagang la’biringi rua metere’ lantanna.

Wahyu

Video Wahyu 14

Ikuti Kami:

KONTAK | PARTISIPASI | DONASI