Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Mengkitana' na ia to Anak Bembala' ke'deh jao buntu Sion. Den tau nasolan saratuh patang pulo a'pa' sa'bu to pada den sangan-Na Anak Bembala' sola sangan-Na Ambe'-Na Puang Allataala diuki' jio kidena.

² Angkusa'ding gamara jao mai suruga susi oni wai mentalanda gaja buda sola susi oni galugu gumaluguh liwa' tonggo. Ia joo gamara kusa'ding susi too oni mossi' napannoni tomangcu'bikan.

³ Ia joo tau saratuh patang pulo a'pa' sa'bu makkelong mpukelong kelong baru jio olona cadokkoan mala'bih-Na Puang, a'pa' olok-olok na duang pulo a'pa' tomatua-tua. Ia joo kelong te'da tau ngkullei mpelajahhii, sangadinna ia manda joo tau saratuh patang pulo a'pa' sa'bu, to mangkamo dipasalama' lan mai lino.

⁴ Melo tuu lako tau, sanga te'da lalo ia nasola baine. La undi bang lako Anak Bembala', moi umbo nanii male. Ia to tau, mane' iara to dipasalama' dipasusi bungah bua dipangben lako Puang Allataala na lako Anak Bembala'.

⁵ Iamo to tau te'da lalo namangnguraga, na te'da too nampugauk kasalan.

⁶ Ngkitana' mesa' malaeka' laen mentia' liwa' tande. Nabawai to Kareba Kasalamatan to te'da cappa'na la dipangpeissenan lako tolino, iamo to sininna rapu tau, tondok, basa na bangsa.

⁷ Metambai nakua, "Massompa kamu' lako Puang Allataala, pakala'bihhi, sanga wattun-Nami Puang la rra'tah kara-karana tolino. Massompa kamu' lako Puang to mpaden langi' na lino, tasik na sininna mata wai."

⁸ Mangkai joo malaeka' bungahna, ratu omi to malaeka' mangpenduan metamba nakua, "Rondonmi. Rondonmi kota Babel liwa' tonggo. Mangkami to-Babel mpalangoii anggoro' to sininna bangsa. Ia to anggoro' iamo to panggaukan gaja'na."

⁹ Mangkai joo den pole' omi malaeka' mangpentallun metamba nakua, "Ia to tossompai joo olok-olok na tau-taunna sola mpake tandana jio kidena iarika limanna

¹⁰ la nniso' anggoro' kamabirisan-Na Puang to mangkamo diballuan tama isotan kamabirisan-Na to tangdirau wai moi ci'di'. Battuananna la disessa joo tau lan api manglanya-lanya jio olona Anak Bembala' sola malaeka'-Na Puang.

¹¹ Ia to rambunna joo api pangsessa la endek tarruh bang de' te'da cappa'na, nasaba' te'da ka'tunna disessa tarruh bang joo tau allo bongi. Iamo to tossompai joo olok-olok sola tau-taunna na to tompake tanda sanganna."

¹² Jaji la sabbara' to umma'-Na Puang Allataala. Iamo to tonturu' pakkaeloran-Na Puang Allataala, namatappa' lako Puang Isa.

¹³ Ssa'ding pole' omo' gamara jao mai suruga nakua, "Uki'i tee, 'Mammula tee too masannang to tau ke naalami bilangan taun-Na Puang Allataala, namate.'" Nakua Roh Allataala, "Tongan. Kendenmi mangjama mabanda', na ia to panggaukanna nabenmi Puang Allataala to pahalana."

¹⁴ Mangkai joo kukitami den saleu' mabusa. Den susi tau cumadokko jao mpake mahkota bulawan, na ntoe sae' gaja taran.

¹⁵ Naden omi mesa' malaeka' messun lan mai Bola Puang Allataala metamba mpauanni joo to cumadokko jao saleu' nakua, "Passaetanmi tuu sae'mu. Saetannamo to lino, endekmo to assele' padang."

¹⁶ Napassaetanmi to sae'na do' lino, mpeparei to assele' padang.

¹⁷ Ngkita pole' omo' mesa' malaeka' pole jio mai Bola Puang Allataala jao suruga, to ntoe too sae' gaja taran.

¹⁸ Mangkai joo, den malaeka' to ngkuasai api messun jio mai to ngenan pangkaroban, metamba ngkuanni joo malaeka' ntoe sae' gaja taran nakua, "Passaetanmi tuu sae'mu, sae'mi to anggoro' do' lino, sanga matasakmi."

¹⁹ Napassaetanmi to sae'na do' lino, nasae'i to anggoro' jio mai batangna, namane' mpenca'beanni tama kalo'bong matonggo to dinii llese anggoro'. Ia tee dipasangrapangngi birih-Na Puang Allataala.

²⁰ Dilese tee anggoro' jio saleanan kota. Na ia joo wainna dipalolong male susi bangmi sa'dan rara. Gaja tonggo joo sa'dan na ia to mandalanna angge kalang nyarang tallu ratuh kilometere' mambelanna.

Wahyu

Video Wahyu 14

Ikuti Kami:

KONTAK | PARTISIPASI | DONASI