Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Sya arakove, inaemeno sya kawasae Yahudi mansai rave, sya bekero rinanuga somamo indamu Amisye po mansapaya awa ayao kakaije rai, weti ribe sambayambe Aijo mansai.
2 Syo raen onawamo ubeke dave wo Amisye arijat. Weramu wo arijato tugaive omamo wo raen kobe ramu.
3 Ware ubeker utavondi taune awa unanuije so rai: ware wo Ananyao Musa rarijat indamu umamai no Amisye amune rai. Weramu wantatukambe Amisye apa unanuijo tugae Po ratayao indamu vatane umamai no Amune rai. Muno wonae utavondi Apa unanuije so raiji.
4 Weramu Ananyao Musa ama mbekere ndea mamai no Kristusa nui. Wirati vatan tenambe nanawirati wanave Kristus ai onawamo umamaisyo Amisye amune rai.
5 Wusyinoe Musa po unanuije raroron indamu vatane umamai no Amisye amune rai, no taiso: “Vatano rui pirati po Ananyao Musa ama ayao rarijat tenambe tutir, opamo indati kova nuge nuganui.”
6 Weramu Musa apa ayao kaijinta mo raura mare vatane maveti umamaisyo Amisye amune rai weye wanave Ai. Apa ayao mi so: “Vemo nyo raura nanuga rai maisyare somai nora nyare: ‘Are pirati indati seo no munijo ntiti? Are pirati indati pasyo no munijo wene ama uga rai?’” Musa apa ayao umaso ama ine no taiso: Wamare wamo Amisye apa kove rakani indamu Po wansapaya kakaije rai, weamo vemo wansea no munijo ntiti indamu wamo rakani nora, weye Kristus pamo paje wansai no mine so rai to. Muno vemo wamasya no wene ama uga rai nora, weye Kristus pamo kovakato no wene rai to indamu Po wansapaya ayao kakaije rai.
7 (10:6)
8 Weti Amisye apa kove mamo mararaijo wansai, maisyare Ayao Amisye mo raura nakato, mare: “Amisye apa ayao mamo nde mararai wasai to. Omamo no no wasawa rai muno no no wasanuga rai.” Ayao anave so mirati ayao reamo ravovo vatan tenambe mansai:
9 Ranivara nyo Yesus aura kakavimbe nawa rai nyare Opirati Amisy, muno nyanave no no nanuga nyare Amisye po Yesus aijaseo kovakato no wene rai to, wea indati Amisye po napaya nya ayao kakaije ama mangke rai.
10 Weye wamanave Yesus ai no wansanuga rai, weti Amisye pare wamamai no Amune rai. Muno wamanave Ai ti wamo aura kakavimbe wansawa rai, naije Amisye po wansapaya wama ayao kakai ama mangke rai.
11 Maisyare Ayao Amisye mo raura mare, “Vatano are nawirati wanave Ai onawamo manimaumbe jewen, yara manayanambe Apa kove rai.”
12 Muno Amisye apa kove umaso Po raugaje vatano Yahudi mansai muno vatano Yahudi jewene mansai kava, weye vatano Yahudi mansamuinyo vatano Yahudi jewene mansaije ramu. Amisye pamo intabo, Opamo vatan tenambe awa Amisy. Muno Opamo po apa kovo manakoe raugaje mawebe irati vatan tenambe nanawirati ube sambayambe wo awaine mansai.
13 Weye Ayao Amisye mo raura mare, “Are pirati po Amisy awain, opamo Amisye po apaya kakaije rai.”
14 Weti ranivara vatan inta po Ayao Kove ravovo mai rainy, weamo ana wo raranive ma mewena. Muno ranivara wo raranive ma mewena, weamo wanave Amisye ai kakai. Muno ranivara wanave Amisye ai rainy, weamo wo awaine kakai.
15 Wakoe! Ranivara vatane inta de po Ayao Kove ravovo mai jewen, wea umba indati? Kove mamo Amisye po vatan inta matutir indamu wo Ayao Kove ravov. Maisyare Ayao Amisye mo ratoe, mare, “Kove ngkov irati vatano ude wo Ayao Kovo Amisye raugave mansai!”
16 Weramu vatano Yahudi manuga rausiso Ayao Kove so rai ramu. Maisyare anawae Yesaya po raura no wusyinoe pare, “Amisyo winy! Vatan inta panave ayao reamo raugave so rai jewen!”
17 Maisyare omai ti, wandaen: Vatane wanave arono wo Ayao Kove raraniv, muno wo raraniv arono vatane inta po Ayao Kovo Kristus ravovo mansai.
18 Weramu vemo wamo ratantona maisyare somai nora: “Vatano Yahudi wo Ayao Kove rarani dainy.” Yara syo raura syare wo ranaun to! Maisyare Ayao Amisye mo raura no taiso: “Ayao wo ravove maneka manakoe no mine so rai tenambe to, nto nanto no munije ama ruduke raito tenambe to.”
19 Muno vemo wamo ratantona maisyare somai nora: “Yahudi unanta ana wo raranive rai ramu.” Yara syo raura syare unanta rai to! Weye Musa po Amisye apa ayaowe so raura: “Vatano Yahudi weap, indati Syo wasaveti wapananyanyube weye Syo sya muinye rarorono vatano Yahudi jewene mansai. Muno Syo wasaveti wapari rave weye Syo kove raugaje vatano wantatukambe Rinai nanawije mansai.”
20 Umba Yesaya po raura vambunimbe akato, po vatano Yahudi jewene maura pare: “Amisye apa ayao mi so: ‘Vatano wo rinakani jewene wenanawamo soamo unande Rinai to. Wo rinawaine jewen, weramu taune rinarorono mansai to.’”
21 Weramu kawasaeyo Yahudi wonayo Amisy ai, weti Amisye po mansaura pare: “Nugoenta rave Syo vatane wato mawain ude Rinai, weramu makari matu muno ubeta Rinaije ramu.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA