Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali a’i-a’i, aku rani kojo rayangku see to Yahudi darapalaes. Wali ewa see nikangku makai-kai resi i Pue Allah mampokaika sira.
2 Apa aku kunsani lengko nsira, pasi aku matamanasa mangkonong ewa wimba kabaenya kadota nsira mangalulu i Pue Allah. Pei nempo madota kojo, pei sira tawa mangansani jaya to monso mangalulu i Pue Allah.
3 Apa sira bo’onya mampodongeka pasi mampalaika anu to nato’o i mPue Allah mangkonong ewa wimba nikaNya manganto’o tau tare dosanya. Sira ojo rani mangalulu porenta i Musa see danato’o i mPue Allah tare dosanya.
4 Pei taa mawali tau rato’o tare dosanya ane yako mangalulu porenta i Musa. Apa yako to naika i ngKerisitu see naka tamore batuanginya mangalulu porenta etu. Wali si’i-si’i samparia tau to mangaya i Kerisitu maya rato’o tare dosanya.
5 Wali tempo owi i Musa mangantulis gombo si’i mangkonong tau to rani mangalulu porenta i Musa see danato’o i mPue Allah tare dosanya. I Musa manganto’o, “Tau ane ia mangalulu porenta etu panewa ia damangarata katuwu.” Ewa see nato’o i Musa, pei kamonsonya tare tau to nakurang mangalulu samparia porenta etu.
6 Wali si’a yako palaong to masuli etu naka pei i Pue Allah manganto’o tau tare dosanya, pei saba yako pangayanya semo. Wali taa masuli! Apa re’e to ratulis ri raya ntuntu i mPue Allah to manganto’o, “Ne’e mampobuuka, ‘Bara i sema tau to nakurang yau nto’u saruga, yau damangkeni mai i Kerisitu see Ia maya mangansawang kita?’ Pasi ne’e mampobuuka, ‘Bara i sema to nakurang yau lo’u lipu ntau mate, yau damangawangu muni i Kerisitu yako ri kapateNya?’” Ne’e mampobuuka ewa wetu apa kita taa parluu yau nto’u saruga damangkeni mai i Kerisitu yako ndate ria, apa Ia roomo nama’i resi kita. Pasi kita taa parluu yau lo’u lipu ntau mate damangawangu muni i Kerisitu yako ri kapateNya, apa Ia room mambangu muni yako ri kapateNya.
7 (10:6)
8 Pei re’e wo’u to ratulis, manganto’o, “Kareba yako resi i Pue Allah re’emo resi komi. Wali komi maya magombo mangkonong kareba etu pasi maya seja mampobuu-buuka mangkonong kareba etu.” Wali kareba etu semo to kami mampakareba manganto’oka tau, “Aya i Pue Yesu.”
9 Apa ane kita mampatimonso, manganto’o, “I Yesu Ia semo Pue,” pasi ane raya ngkita mangaya kojo i Pue Allah room mangawangu muni i Yesu yako ri kapateNya, ane ewa see kita darapalaes.
10 Apa raya ngkita mangaya i Pue Yesu, see naka kita nato’o i mPue Allah tare dosanta. Pasi nganga ngkita mampatimonso pangayanta etu, see naka kita rapalaes.
11 Wali ane ewa to ratulis ri raya ntuntu i mPue Allah, “Tau to mangaya Ia tare to darapakamea.”
12 Wali gombo etu kono kita samparia apa tare pasisalanya to Yahudi pasi tau to si’a to Yahudi. Kita to lino samparia paka samba’aja Pue ngkita. Pasi Ia bae kanotoNya resi samparia tau to makai-kai resi Ia marapi rasawang.
13 Wali palaong etu singkonong kojo pei gombo to ratulis ri raya ntuntu i mPue Allah to manganto’o, “Samparia tau to makai-kai resi i Pue marapi rasawang, tau etu darapalaes.”
14 Wali wimba danaika ntau makai-kai resi i Pue ane sira tawa mangaya Ia? Pasi wimba danaika nsira mangaya ane sira tawa re’e mangandonge kareba mangkonong Ia? Pasi wimba danaika nsira mangandonge kareba etu ane tare tau to mampakarebaka sira?
15 Pasi wimba danaika ntau mampakarebaka kareba etu ane sira tare to mampokau? Pei kamonsonya re’e kojo tau to rapokau, apa re’e to ratulis ri raya ntuntu i mPue Allah to manganto’o, “Matao kojo lempa mbiti ntau to mangkeni kareba matao!”
16 Wali re’e kojo tau to napokau i mPue Allah mangkeni kareba matao, pei si’a samparia tau to mangaya kareba etu. Palaong etu singkonong kojo pei gombo i Yesaya, to pantuntu tuntu i mPue Allah tempo owi. Ia manganto’o, “O Pue, taa boros tau to mangaya kareba mami.” Etu semo gombo i Yesaya.
17 Wali yako pandonge ngkita kareba matao see naka kita mangaya. Pasi yako tau mampakarebaka kita mangkonong i Kerisitu, see naka kita mangandonge.
18 Pei aku mampotanaka, “Wimba, to Yahudi bara taa mangandonge kareba matao? Nadonge kojo! Apa re’e to ratulis ri raya ntuntu i mPue Allah to manganto’o, “Loo ntau to mampakarebaka kareba matao nadonge ntau ri sambawo lino. Pasi gombo nsira natikareba rataka ri suogi lino.” Etu semo to ratulis, wali manasa sira re’emo mangandonge kareba matao.
19 Pasi aku mampotanaka wo’u, “Wimba to Israel, bara taa nansani nsira tau to si’a to Yahudi darawaika seja katuwu to singkasaenya? Nansani kojo! Apa uyu-uyunya re’e gombo i Musa tempo owi, to’onya, “Si’i semo gombo i mPue Allah, Ia manganto’o, ‘O to Israel, Aku damangika see komi damawali timopo raya ngkomi mangangkita pansawangKu resi tau to si’a to Yahudi. Pasi Aku damangika see komi damawali maja’a raya ngkomi mangangkita pamporayangKu resi tau to taa nansani mangkonong aku.’”
20 Pasi re’e seja gombo i Yesaya tempo owi. Ia taa meka mamporata gombo i mPue Allah, to’onya, “Si’i semo gombo i mPue Allah. Ia manganto’o, ‘Tau to taa mangaliwu Aku, tau etu mangarata Aku. Pasi tau to tare mampotanaka mangkonong Aku, tau etu Aku mampapokitaka korongKu.’” Ewa wetu gombo i mPue Allah mangkonong tau to si’a to Yahudi.
21 Pei ane resi to Yahudi Ia manganto’o, “Ponto eo Aku tare pandoongKu rani masingkatao pei komi to mangewa Aku pasi to mabukul kojo.” Etu semo gombo i mPue Allah resi to Yahudi tempo owi.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA