Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Manga anạ u sěmbaụ! Kahumangku e mẹ̌deạu bansaku e masal᷊amatẹ̌. Kụ iạ e ringangu kạguwạu naung měkẹ̌kal᷊iomaneng su Ruata e waug'i sire.

² Iạ bahani mẹ̌bera u i sire měngkate makěhagẹ̌ mẹ̌tahamawu su Ruata. Arawe pẹ̌tatěngkaghising i sire e wal᷊inewe niwěnta su kasingkạ bọu Ruata.

³ I sire wẹ̌gaweng kakakoạ u Mawu Ruata e měngul᷊ị kapia pẹ̌kakauhu taumata e ringang'E. Kụ ual᷊ingu i sire mapulu tumol᷊e kakakoạ i sire hala, ute i sire tawe sumasuměllung su kakakoạ u nilahẹ u Ruata.

⁴ Toratẹ̌ seng nighanap'i Kristus. Kụ apan taumata mạngimang si Kristus pẹ̌kakauhe ringangu Ruata e seng naul᷊ị kapia.

⁵ I Musa e němohẹ, u taumata apan mẹ̌sěngkapian Duata ual᷊ingu toratẹ̌, ute taumata ene sarung mẹ̌biahẹ̌ ual᷊ingu tụtuhụ toratẹ̌ ene.

⁶ Arawe su hal᷊ẹ̌ u kakakoạu taumata mẹ̌sěngkapian Duata e ual᷊ingu pangangimang su Ruata e, Binohẹ Susi e nẹ̌bera kere ini: "Kumbahang i kau mẹ̌bera su ral᷊ungu naungu, 'Kụ kai i sai tangu masapuạ sarang sorga?' (mangal᷊ene mẹ̌bawa si Kristus parěllusẹ̌),

⁷ arau 'I sai kai sarung duměllusẹ̌ su wanuan taumata nate?' (mangal᷊ene měhengkẹ si Kristus wọu papate)."

⁸ Timonane kai kere ini, "Habarẹ̌ bọu Mawu Ruata ene kai marědu-rěduhi kau; su mohongu ringangu su ral᷊ungu naungu." Ene e habarẹ̌ kụ ilẹ̌habari kami; habar'u taumata kụ harusẹ̌ mangimang.

⁹ Batụu kereu i kau mangakum mohongu, u "I Yesus kai Mawu", kụ i kau mangimang su ral᷊ungu naungu u Mawu Ruata e seng napẹ̌bangung i Yesus wọu papate, kụ i kau sarung masal᷊amatẹ̌.

¹⁰ Ual᷊ingu naung e, taumata mangimang hakịu Mawu Ruata manarimạ i sie makoạ taumata mẹ̌sěngkapian Duata. Taumata ene mangakung mohonge, hakịu i sie ipakasal᷊amatẹ̌.

¹¹ Su ral᷊ungu Winohẹ Susi e mạbawohẹ, "Taumata mangimang tawe sarung kuměllohẹ̌."

¹² Ene e nariadi su patikụ taumata, batụu tawẹ pinẹ̌tatěntangenge sutal᷊oaran tau Yahudi ringangu wansa wal᷊ine. Duata mang sěmbaụ ene e kai Mawum patikụ taumata. I Sie mạngonggọu al᷊amate ipẹ̌dẹ̌dal᷊embo su kěbị taumata apan mědẹ̌dorong tul᷊ung si Sie.

¹³ Su ral᷊ungu Winohẹ Susi e mạbawohẹ, "Patikụ apan měkẹ̌kui Mawu, sarung masal᷊amatẹ̌."

¹⁴ Kaiso kereapa taumata makapẹ̌kui Mawu kereu i sire wẹ̌dang ta nangimang? Dingangu kereapạe i sire makapangimang su Mawu Ruata kereu i sire wẹ̌dang ta nakạdingihẹ̌ habarẹ̌ mạanun Sie? Dingangu kai makaringihẹ̌ habaru Mawu kereapa i sire kerẹu tawẹ u mělahabare?

¹⁵ Kai makahabaru apa i sire kerẹu i sire tawe nirolohẹ̌? Su ral᷊ungu Winohẹ Susi e mạbawohẹ kere ini, "Kawe kapiane rarěntan taumata apam měmpẹ̌bẹ̌bawa habaru Injilẹ̌ bọu anun Duata!"

¹⁶ Kaiso wal᷊inewe kěbị taumata měnẹ̌narimạ u Injilẹ̌ e. Batụu i Yesaya nẹ̌bera, "Mawu, i sai wue nangimang su habar'i kami?"

¹⁷ Kai watụ u ene nakapangimang taumata ual᷊ingu i sire makạdingihẹ̌ habarẹ̌, dingangu habarẹ̌ e ikẹ̌karingihẹ̌, ual᷊ingu piạ taumata měmpẹ̌lẹ̌habar'i Kristus.

¹⁸ Arawe iạ makiwal᷊o: Těngadẹ̌ bue i sire tawe nakạdingihẹ̌ habarẹ̌ ene ěng? Nal᷊ahẹu wọu wue! Batụu su ral᷊ungu Winohẹ Susi e mạbawohẹ kere ini, "Tingih'i sire seng timeleng su kaguwạu dunia, manga waweran sire seng natẹ̌pasu pondol᷊u dunia."

¹⁹ Iạ makiwal᷊o kapia: Apa tau Israel ta nakaěnna ngae? Balako kakiwal᷊o ene kahumotongange pakisimbahe si Musa. I Musa nẹ̌bera, "Kere ini hengetang u Ruata, Iạ mapakariading kamene piạ sasasingking su wansa sěmbaụ kụ bal᷊ine kawanua ringangu Iạ sarung mapal᷊angeh'i kamene su wansa sěmbaụ kụ bodoe."

²⁰ I Yesaya e limembo laing kawahanine. I sie nẹ̌bera, "Kere ini e hengetang u Ruata, 'Taumata apan tawe němpẹ̌deạ si Siạ e seng nẹ̌sombangu Iạ. Dingangu Iạ e manodẹu watangeng-Ku si sire apan tawe makakiwal᷊ong Iạ.'"

²¹ Arawe waugu Israelẹ̌ e i Yesaya nẹ̌bera u, "Kere ini hengetangu Mawu, 'Kanandung Iạ e mang mạnogor'u l᷊ima-Ku e su wansa sěmbaụ kụ ta mal᷊ahimang dingangu mararendehẹ̌.'"

Roma

Video Roma 10

Ikuti Kami:

KONTAK | PARTISIPASI | DONASI