Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Mongowutata ngoimani, u heololu'u wawu u heduau ode Allahuta'ala, deuwitoyito alihu tawu lo Yahudi salamati.

² Otawau deu timongoliyo to'otutuwa hepokarajawa ode Allahuta'ala, bo timongoliyo dila mongarati tomimbihu kohondaki lo Allahuta'ala.

³ Timongoliyo dila motota wololo tumumula banari to talu lo Allahuta'ala wawu timongoliyo bo hepongusahawa mopotihulo obobanari limongoliyo lohihilawo, tunggulo timongoliyo dila ta'aluku to kohondaki lo Allahuta'ala mopobanari olimongoliyo.

⁴ Patuju lo hukum lo Tawurat, deuwitoyito alihu timi'idu tawu ta paracaya ode oli Isa Almasih, popobanariyo lo Allahuta'ala.

⁵ Ti nabi Musa ma loluladeyi tomimbihu tawu ta hepongusahawa tumumula banari dadasari to hukum lo Tawurat odiye, ”Titalotita ta mokaraja mao nga'amila aturangi lo hukum lo Tawurat, tiyo ma tumumulo.”

⁶ Tiyo olo loluladeyi to kitabi tomimbihu tawu ta tumumula banari dadasari to imani odiye, ”Dila mao hepomikirangi tatonu ta mowali mobotula mola ode soroga wawu dila mao hepomikirangi olo tatonu ta molahe mola ode delomo mawutu.” Makusudu lo ayati boyito odiye: Dila paralu mobotula mola ode soroga mola motiyangayi oli Isa Almasih molaheyi wawu dila paralu olo molahe mola ode delomo mawutu mola modelo mayi oli Isa mobotulayi monto delomo kuburu.

⁷ (10:6)

⁸ Ayati entiye boyito o wumbutiyo odiye, ”Habari lonto Allahuta'ala boyito membide to olemu, deuwitoyito to delomo tunggilumu wawu to delomo hilamu.” Makusudu lo ayati boyito deu habari mopiyohe lonto Allahuta'ala boyito ma pilopotunggulayi lami ode olimongoli. Tuwango habari boyito, deuwitoyito tawu musi paracaya ode oli Isa Almasih.

⁹ Sababu wonu timongoli mongaku lo tunggili mongoli deu ti Isa Almasih Eya wawu paracaya to delomo hila limongoli deu Allahuta'ala ma lopobongu mayi o-Liyo lonto kuburu, timongoli ma salamati.

¹⁰ Sababu wolo hilawo tawu paracaya tunggulo popobanariyo lo Allahuta'ala wawu wolo tunggilo tawu mongaku tunggulo poposalamatiyo lo Allahuta'ala.

¹¹ Odelo loiya to kitabi odiye, ”Titalotita ta paracaya ode o-Liyo, dila ta mole'e.” Odito loiya tula-tulade to kitabi.

¹² Tomimbihu usalamati diyaluwo bedawa lo tawu lo Yahudi meyalo tawu ta dila Yahudi, sababu Eya lo tawu nga'amila bo tuwawu. Tiyo mura da'a hila-Liyo ode tawu nga'amila ta hepohileya turungi ode o-Liyo.

¹³ Odelo loiya tula-tulade to kitabi odiye, ”Titalotita ta mohile turungi to Eya, ma salamati.” Odito u tula-tulade to kitabi.

¹⁴ Bo wololo timongoliyo mohile turungi to oli Isa Eya wonu timongoliyo dipo paracaya ode o-Liyo? Wololo timongoliyo mowali paracaya ode o-Liyo wonu timongoliyo dipo lo'odungohe habari tomimbihu Tiyo? Wololo timongoliyo mo'odungohe habari tomimbihu Tiyo wonu dipoluwo ta lopotunggulo habari boyito ode olimongoliyo?

¹⁵ Wawu wololo timongoliyo mowali mopotunggulo habari boyito wonu dipoluwo ta lopoahu olimongoliyo? Odelo woluwo tula-tulade to kitabi odiye, ”Mayilaba piyohiyo lo podudungga mayi lo ta hepopotunggula lo habari mopiyohe lonto Allahuta'ala!” Odito u tula-tulade to kitabi.

¹⁶ Bo dila nga'amila tawu ma lololimo habari mopiyohe boyito. Odelo ti nabi Yesaya lohihilawo loloiya odiye, ”Wu Eya, tawu-tawuwalo dila mololimo habari u hepopotunggulo lami.” Odito loiya li nabi Yesaya.

¹⁷ Wolo uodito, imani yito timimbulu monto u modudungohe habari mopiyohe lonto Allahuta'ala tomimbihu ti Isa Almasih.

¹⁸ Bo poleleu mayi: Dila ponga lo akali tawu lo Israel dipo lo'odungohe habari boyito. Odelo loiya tula-tulade to kitabi odiye, ”Habari boyito ma lolo'opa mota ode ngoyilanggubu duniya wawu ma tilunggula mota sambe ode ujungi lo duniya.” Odito u tula-tulade to kitabi.

¹⁹ Bo poleleu mayi olo: Dila ponga lo akali bangusa lo Israel dila mongarati lo habari boyito, sababu woluwo to kitabi loiya lo Allahuta'ala ode tawu lo Israel loli oli nabi Musa odiye, ”Wau ma motoliango bangusa ta hehulode ta dila umati-U, alihu timongoli mohihiya wawu moyingo.” Odito loiya lo Allahuta'ala loli oli nabi Musa.

²⁰ Ti nabi Yesaya lebe barani mao li nabi Musa mopotunggulo Pirimani lo Allahuta'ala odiye, ”Tawu-tawuwala ta dila hepololohe ola-U ma lo'otapu ola-U wawu Wau lopopatatao lo batanga-U ode tawu ta dila pe'enta mao lohintu owoluwo-U.” Odito Pirimani lo Allahuta'ala u pilopotungguli nabi Yesaya.

²¹ Bo tomimbihu tawu lo Israel woluwo loiya lo Allahuta'ala loli oli nabi Yesaya odiye, ”Timi'idu dulahu Wau wudu-wudu mayi olu'u-U ode umati ta dila ta'ati wawu mo'owali molawani ola-U.” Odito loiya lo Allahuta'ala loli oli nabi Yesaya.

Roma

Video Roma 10

Ikuti Kami:

KONTAK | PARTISIPASI | DONASI