Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sikamma sari’battangku ngaseng! Sanna’ ma’minasaku sollanna nipasalama’ ngaseng sikontu bansaku. Nasanna’mo bateku ampappala’ doangangi ke’nanga mae ri Allata’ala.

² Barania’ ampaui angkana sanna’ lompona sumanga’na ke’nanga anynyomba mae ri Allata’ala. Mingka anjo sumanga’na ke’nanga tena nasituru’ pangngassengang battua ri Allata’ala.

³ Tena naassengi ke’nanga antekamma caraNa Allata’ala ampa’jari bajiki ammotere’ passisambunganNa siagang rupataua. Nalanri cara kalenna ke’nanga naturuki, jari tenamo nanaturuki ke’nanga cara Napappicinikanga Allata’ala.

⁴ Anjo hukkung-hukkung agamaya le’ba’mi Napa’ganna’ Almasi. Jari inai-nai tappa’ mae ri Almasi, a’jari baji’mi ammotere’ passisambunganna siagang Allata’ala.

⁵ Natulisiki Musa angkanaya inai-nai assibajiki siagang Allata’ala situru’ hukkung-hukkung agamaya, iami lattallasa’ lanri mannurukinna mae ri anjo hukkung-hukkung agamaya.

⁶ Mingka ri passala’ antekamma carana taua assibajiki siagang Allata’ala situru’ katappakkang mae ri Allata’ala, kammaminne nakana lalang ri Kittaka, "Tea’ mako angkanai lalang ri atinnu, ‘Inaika lanai’ ri suruga?’ (battuanna angngerangi naung Almasi),

⁷ yareka ‘Inaika lanaung ri pammantanganna tau matea?’ (battuanna angngangkaki nai’ Almasi battu ri kamateanga.)"

⁸ Battuanna kammaminne, "Anjo biritta battua ri Allata’ala sanna’ a’reppese’na ri kau; iamintu niaki ri bawanu siagang lalang ri atinnu." Iaminjo biritta napa’la’banga ikambe; iamintu biritta ri passala’na tappaka.

⁹ Nasaba’ punna mangakuko siagang bawanu angkanaya, "Batara anjo Isa," siagang tappakko lalang ri atinnu angkanaya le’ba’mi Napattallasa’ poleang ammotere’ Allata’ala anjo Isa battu ri kamateanga, ma’nassa lasalama’ mako.

¹⁰ Nasaba’ lanri tappa’na taua lalang atinna, sa’genna nitarimamo ri Allata’ala anjo taua assibajiki siagang Allata’ala. Siagang lanri mangakuna taua siagang bawana, sa’genna nipasalama’ ri Allata’ala.

¹¹ Nia’ tattulisi’ lalang ri Kittaka angkanaya, "Inai-nai tappa’ tena nalanipakala’ba pa’mai’na."

¹² Anne nataba ngasengi sikontu rupataua; nasaba’ tena simmaraenna tu Yahudia siagang bansa-bansa maraenga. Anjo Allata’ala se’rea, Bataranai sikontu rupataua. Napassareangi barakka’Na alla’bia jaina mae ri sikamma tau appala’ tulunga mae ri Ia.

¹³ Nia’ tattulisi’ lalang ri Kittaka angkanaya, "Sikamma tau akkioka mae ri Batara lasalama’ ngasengi."

¹⁴ Mingka antekamma lakkulle taua akkio’ mae ri Batara punna tenapa natappa’ ke’nanga? Siagang antekamma lakkulle tappa’ ke’nanga mae ri Batara punna tenapa nalangngereki biritta battua ri Batara? Kammayatompa, antekamma lakkulle nalangngere’ ke’nanga biritta battua ri Batara punna tena tau ampabattui anjo birittaya?

¹⁵ Kammayatompa pole, antekamma lakkulle taua ampabattui anjo birittaya punna tena nanisuroi ke’nanga? Nia’ tattulisi’ lalang ri Kittaka angkanaya, "Teai sipato’ baji’na kabattuanna tau angngeranga Kabara’ Baji’ battu ri Allata’ala."

¹⁶ Mingka tayangasenna taua antarimai anjo Kabara’ Bajika. Nasaba’ nakana Na’bi Yesaya, "O, Batara, inaika tau ampatappaki biritta napabattua ikambe?"

¹⁷ Iaminjo saba’na na’jari tappa’ taua, nasaba’ allangngereki biritta, siagang nania’ tau allangngereki anjo birittaNa Almasi nasaba’ nia’ tau ampabattui anjo birittaya.

¹⁸ Mingka erokka’ akkuta’nang: Maka tena memang tompa nalangngereki ke’nanga anjo birittaya? Mattantu le’ba’mi! Nasaba’ nia’ tattulisi’ lalang ri Kittaka angkanaya, "Alla’bammi sa’ranna ke’nanga ri sikontu linoa, anrapi’mi kana-kananna ke’nanga mange ri cappa’na linoa!"

¹⁹ Erokka’ akkuta’nang pole: Maka tanaassengapi bansa Israelka anjo birittaya? Boli’mi kamma na Musa rolong ampiali anne pakkuta’nanga. Nakana Musa, "Kammaminne kananNa Allata’ala, ‘LaKupa’jari akkimburuko mae ri se’rea bansa tenaya naUmma’Na Allata’ala siagang laKupa’jari larroko mae ri se’rea bansa dongo’.’"

²⁰ La’bi baraniangangi pole Na’bi Yesaya. Nakana, "Kammaminne kananNa Allata’ala, ‘Tau tenaya naboyA’, iami ambuntulukKa’; siagang Kupappicinikammi KalengKu mae ri tau tenaya nale’ba’ ampakkuta’nangangA’.’"

²¹ Mingka ri sesena bansa Israelka, nakana Na’bi Yesaya, "Kammaminne kananNa Allata’ala, ‘Sikabusu’na alloa Kupajonjo limangKu mae ri se’rea bansa kapala batua siagang tamaeroka mannuruki.’"

Roma

Video Roma 10

Ikuti Kami:

KONTAK | PARTISIPASI | DONASI