Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ 'Esa moi riaka dodoto ka 'o ngo-ngaku moi! Ngoi toduaka ma sala to ngoi 'ai nyawa 'o Israeloka yakisilaha. De ngoi tosigou-goungu takisilahidoa ma Jo'oungu ma Dutuka.

² Ngoi 'idadi tongose 'onaka 'ato 'ona yomagae ma sala wileleani ma Jo'oungu ma Dutu. Ma 'ona koyasahewasi kokia wileleani 'iti-tiai.

³ 'Ona koyanakowa kokia ma do-dagi ma Jo'oungu ma Dutu wodiai 'o nyawa de de 'una yomarimoioli. 'Ona yomau yamoteke ka to 'ona ma sirete manga mau, so 'ona koyamotekuwa to ma Jo'oungu ma Dutu.

⁴ 'Okia naga gee 'o besesongoka gee 'o Musa wositota-totara ge'ena ma Kristus watotomokau. So 'o nyawa 'isinoimi gee yongaku-ngaku ma Kristusika, 'idadi yomarimoioli de ma Jo'oungu ma Dutu.

⁵ 'O Musa wosilefoku 'awi bukuoka 'ato nako 'o nyawa yomau yomarimoioli de ma Jo'oungu ma Dutu ma sababu 'o besesongo, 'o nyawa go'ona salingou yatotomo yamoteke 'o besesongo ge'ena.

⁶ Ma ma ngale 'o nyawa yomarimoioli de ma Jo'oungu ma Dutu ma sababu yongaku 'unaka, naga 'o Buku 'Itebi-tebinioka 'ingose konee, "'Uwau ngaro 'ani singina ma dodaka nongose, 'Nago'ona dua yodoa 'o sorogaade?' (ma ngale yaie de wi'asa ma Kristus wo'uti),

⁷ bolo, 'Nago'ona dua yo'uti 'o nyawa yosonge-songene manga ngiiku?' (Ma ngale ma Kristus wigoraka la wo'ahuoli.)"

⁸ Ma dumutu ge'ena la konee, "'O Habari ma Jo'oungu ma Dutuno ge'ena naga nginiokau. So nia 'uruokau, de nia singina ma dodakau." 'O habari ge'enau gee ngomi miosikawasa, ma habari ge'ena 'ingose 'ato 'o nyawa salingou yongaku.

⁹ Sababu nako ngini niongaku de 'ania 'urude 'isupu 'ato, "'O Yesus ge'ena ma Jou", de 'ania singina ma dodaka niongakuokau 'ato ma Jo'oungu ma Dutu wisiwangokali 'o Yesus, ge'ena ngini 'asa ma Jo'oungu ma Dutu winisilaha.

¹⁰ Sababu de 'o singina so 'o nyawa yongaku, so ma Jo'oungu ma Dutu wakidawongo yodadi 'o nyawa gee yomarimoioli de de 'una. De sababu de 'o 'uru so yosidemo 'o nyawa manga bionoka 'ato 'ona wingaku 'o Yesus, so 'ona yakisilaha.

¹¹ 'O Buku 'Itebi-tebinoka 'isilefoku, "'O nyawa yongaku-ngaku ma Jo'oungu ma Dutuka 'asa manga singina koi'oguwa."

¹² 'O Yahudioka de 'o nyawa 'iregu ge'ena kaimatero. Ma Jo'oungu ma Dutu 'una kawomatengoka ge'ena la 'o nyawa 'iodumu manga Jou. 'Una wokula 'o co-catu posironga ma amoko 'o nyawa 'iodumika gee yomasigaso-gasoko yomau wakiriwo.

¹³ 'O Buku 'Itebi-tebinoka 'isilefoku, "'O nyawa 'iodumu gee yomasigasoko ma Jouka, 'asa yakisilaha."

¹⁴ Ma kokia 'o nyawa 'idadi yomasigasoko ma Jouka nako 'ona koyongakuwasi? De kokia 'ona 'idadi yongaku ma Jouka nako 'ona kowigi'isenuawasi? Mita kokia 'ona 'idadi wigi'isene ma Jou, nako komoiwa yositotara?

¹⁵ De kokia 'o nyawa 'idadi yo'asa 'o habari ge'ena nako koyakisulokuwa? Ge'enau so 'o Buku 'Itebi-tebinoka 'isilefoku konee, "Duru 'ena ma sureka 'o nyawa gee 'o Habari ma Owa ma Jo'oungu ma Dutuno yo'asa-'asa manga bo-boa!"

¹⁶ Ma 'o nyawa koiodumuwa yadawongo 'o Habari ma Owa ge'ena. 'Isoka 'o Yesaya wongosekau, "Jou, nago'ona yongaku 'o habari gee miositota-totara?"

¹⁷ So 'o nyawa yongaku ma Kristusika ge'ena sababu yo'isene 'o Habari ma Owa gee yakisitota-totara 'onaka. De 'o nyawa yo'isene 'o habari ge'ena sababu naga yosihabari ma ngale ma Kristus 'awi habari.

¹⁸ Ma ngoi tosano: Naga done 'o Yahudioka koyo'isenuawasi 'o habari ge'ena? Ma rai yo'isenokau! Sababu 'o Buku 'Itebi-tebinoka 'isilefoku konee, "'O habari yo'asa-'asa go'ona manga 'ilingi 'itagi 'o dunia ya'omangukou. Manga demo-demo 'itotarokau 'o tonaka ma do-dogumika."

¹⁹ Ngoi tosanoli: Done 'o Israel ma nyawa yasahekau ge'ena? Ia, yasahekau. Sababu ma sirasi 'o Musa wongosekau, "Koneda ma Jo'oungu ma Dutu wongose, 'Ngoi 'asa todiai ngini niotaleana ma ngekomo 'o nyawa 'ireguka gee ka to ngoiwa 'ai 'umati. Ngoi 'asa todiai ngini niongamo 'o nyawa 'ireguka gee koyomasinako-nakowa.'"

²⁰ De 'o Yesayasi 'ifoloi womoroini wongose konee, "Koneda ma Jo'oungu ma Dutu wongose, ''O nyawa gee koinonuwa ngoi, 'ona 'imakekau, de ngoi tomasidumutu 'onaka gee koida-dasanowa ngoi.'"

²¹ Duga ma ngale 'o Israel ma nyawa, 'o Yesaya kawongosekau, "Koneda ma Jo'oungu ma Dutu wongose, ''O wange moi tapasiku 'ai giama taboootika taki'asoko ma ngale takisilaha 'o nyawa 'o bolu moi gee manga singina 'i'opi-'opini de yoma-malawani.'"

Roma

Video Roma 10

Ikuti Kami:

KONTAK | PARTISIPASI | DONASI