Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Tan-taretan! Kaula ce’ terrona sopaja bangsa kaula epasalamet. Ban kaula epataronggu nyo’onnagi ka Allah kaangguy reng-oreng ganeka.

² Kaula bangal ngoca’ ja’ bangsa kaula ganeka ce’ samangadda ngabdi ka Allah; tape samangadda ganeka ta’ adhasar ka pangataowan se dhari Allah.

³ Reng-oreng ganeka ta’ oneng carana Allah masae pole hubunganna manossa sareng Salerana. Ban sarrena bangsa ganeka pera’ noro’ carana dibi’, daddi ta’ atoro’ ka cara se etantowagi Allah.

⁴ Hokomma agama ampon epatadha’ sareng Almasih. Daddi sadajana oreng se parcaja ka Almasih, hubunganna sareng Allah ampon sae pole.

⁵ Mosa nyerrat ja’ oreng se masae pole hubunganna sareng Allah adhasar hokomma agama, oreng ganeka bakal odhi’a polana ngestowagi hokomma agama ganeka.

⁶ Nangeng, parkara carana oreng masae pole hubunganna sareng Allah adhasar parcaja ka Allah, Alketab nyebbuttagi sapaneka, "Ba’na ta’ osa atanya e dhalem atena, ‘Sapa se ongga’a ka sowarga?’ (artena ngeba Almasih toron),

⁷ otabana ‘Sapa se torona ka dunnyana oreng mate?’ (artena maongga Almasih dhari pate)."

⁸ Maksodda gapaneka, "Berta dhari Allah jareya ce’ semma’na ka ba’na; badha e colo’na ban badha e atena." Ganeka berta se ekabarragi kaula; berta ja’ oreng kodu parcaja.

⁹ Sabab mon bibirra sampeyan ngakone ja’ "Isa paneka Pangeran," ban e dhalem atena sampeyan parcaja ja’ Allah ampon maodhi’ Isa dhari sedana, sampeyan tanto salamet.

¹⁰ Sabab oreng parcaja sareng atena, kantos Allah narema oreng ganeka menangka oreng se masae pole hubunganna sareng Allah. Ban sareng bibirra oreng ngako, kantos aba’na epasalamet.

¹¹ E dhalem Alketab esebbuttagi, "Oreng se parcaja ta’ kera epakoceba."

¹² Ca’-oca’ ganeka emaksottagi kaangguy sadajana oreng, sabab tadha’ bidana antara oreng Yahudi sareng reng-oreng bangsa laen. Allah se settong ka’issa’ Pangeranna sadajana oreng. Salerana apareng berkat se ta’ sakera-kera ka sadajana oreng se nyo’on tolong ka Salerana.

¹³ E dhalem Alketab esebbuttagi sapaneka, "Pa’-sapa’a se aserro ka Pangeran, bakal salamedda."

¹⁴ Tape kadi ponapa oreng se aserrowa ka Pangeran mon gi’ ta’ parcaja? Ban kadi ponapa se parcaja’a mon gi’ ta’ oneng mereng parkara Salerana? Jugan, kadi ponapa oreng se merengnga parkara Pangeran mon tadha’ oreng se ngabarragi?

¹⁵ Ban kadi ponapa se bisa’a badha oreng se ngabarragi mon oreng ganeka ta’ eotos? E dhalem Alketab esebbuttagi sapaneka, "Ce’ pojurra badha reng-oreng se ngeba Kabar Bagus dhari Allah!"

¹⁶ Nangeng ta’ sadajana oreng narema Kabar Bagus ganeka. Sabab Isa adhabu, "Guste Pangeran, pasera se parcaja ka kabar se ebakta abdidalem sadaja?"

¹⁷ Lantaran gapaneka reng-oreng laju parcaja polana mereng berta, ban oreng mereng berta polana badha oreng se aberta’agi parkara Almasih.

¹⁸ Tape kaula atanya: Ba’ ongguwa reng-oreng ganeka ta’ mereng berta ganeka? Tanto ampon! Sabab e dhalem Alketab esebbuttagi sapaneka, "Sowarana reng-oreng jareya ekaedhing daddi sadunnya, ca’-oca’na reng-oreng jareya napa’ ka konco’na bume."

¹⁹ Kaula atanya pole: Ponapa bangsa Isra’il gi’ ta’ oneng parkara ganeka? Diggal partanya’an ganeka me’ olle esaodi sareng Mosa kaadha’. Mosa adhabu, "Kantha reya dhabuna Allah, ‘Bi’ Sengko’ ba’na epaereya ka settong bangsa se banne ommat, ban bi’ Sengko’ ba’na epapeggella ka settong bangsa se budhu pekkeranna.’"

²⁰ Yesaya jang bangalan pole. Dhabuna, "Kantha reya dhabuna Allah, "Reng-oreng se ta’ nyare’e Sengko’ la tatemmo ban Sengko’; ban Sengko’ ngaton ka reng-oreng se ta’ nanya’agi Sengko’.’"

²¹ Nangeng parkara bangsa Isra’il Yesaya adhabu, "Kantha reya dhabuna Allah, ‘Saare benteng Sengko’ ajuluwagi Tang tanang ka settong bangsa se cengkal ban ta’ ta’at.’"

Roma

Video Roma 10

Ikuti Kami:

KONTAK | PARTISIPASI | DONASI