Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Doroi meaine! Enehurorong dohong weai paria, we ambori nehu doroi amene nu boyari fosa Allai feririsa. Tuti yutanai paria we Allai wesa.
2 Imadu kaririai kariri sa we enemirorongfoi niununsa paria na ene esomi we Allai fo, wape Allai ne rang wetarai foi ewaitawana kaha.
3 Weo ewaitawang kariri todoni emasi ria Allai fo kaha, amani rangno Allai dohoni we inontarainesa, amani Kristusi. Etawiai we eru tawang mantaunsa ene rang siai, tuti emarira we ehontai Allai na ne rang dohoni we ambori emasi riati foi nani.
4 Hukumi Musai foi mani, Kristusi niari ambori we reng ahang kaha. Ampafe inontarai mandoni dino yoaso Kristusi mani, wenani mesi na Allai arongreafo.
5 Weo Musai soi deyo, mandoni dino deo mesi na Allai arongreafo na dohong kariri Hukumifoi mani, wenani minohi darang nano ne dohong kaririai na mai pari fo.
6 Wape kariri todoni inontaraine emasi na Allai arongreafo na eroasoafo, Musai ne kaiwo rabuang bei dotu tonina: “Dohonao enemutituai boyo, ‘Mandoni dino dautai to rorafaisi ne?’ [Weo nanai mai kaha weo ne tarai kariri boyo ka Kristusi biari meu ne,]
7 ete, ‘Mandoni dino biari to marareha rorong foi aweu ne?’ [Weo nanai kontai mai kaha weo ne tarai kariri tata taha Kristusi dautai weru marareha rorong foi meai ne.]” Weo roasoane mani, ne tarai tonana kaha.
8 Wape fiani aino kaiwone dotu kariria fo mani tonina: “Allai ne kaiwofo waroi weru mea kaha, mae kefang we mea paria, nayai na meboromiwa tuti na menemirorongwai.” Kaiwo nanai aino amewuwuaifa ne, amani kaiwo we inontaraine eroasoai.
9 Weo masino memadurai na meboromiwa we “Yesusi mani Seng dine,” tuti meroasoai na menemirorongwai we Allai duwiria suwi na marareha rorong foi aha fo mani, Allai feriri mea ki.
10 Weo na taenemirorongfoi taroasoai, ampafe Allai deto tata we inontaraio tabeng riati aha. Tuti tamadurai na taboromine we Yesusi mani Seng dine, ampafe Allai feriri tata.
11 Toyari Sempaisi ne Kaiwofo weai dotu tonina: “Mandoni dino yoasoi mani, fiea dohoni mimaya kaha.”
12 Kaiwo nanai dotu we inontarainesa kiai, weo inontarai Yahudi fosa tuti Yahudi kaha fosa emasi kiai, wiro manei siai weru manei kaha weo ea kiai esobu fariri na eroaso Kristusi fo terai. Weo Seng mansiari foi mani, weSeng we kaiwasanei kiai, tuti inontarai mandoni kontaio eroaso Kristusi tuti esahu na wonongfo mani, mioansa fuba paria.
13 Weo Kaiwofeai dotu deyo, “Inontarai mandoni kontaio esahu Sengnei ne wonong fosa mani ambori feririsa ki.”
14 Wape masino eroasoai kaharai, nana mani esahu we Sempaisi we feririsa todoni? Tuti todoni ambori eroaso mano etaramio kaiwo kariri I kaharai fo? Kontai todoni ambori etaramioai, masino manei wiuwui wesa kaha?
15 Tuti todoni ambori inontarai ewuwu kariri, masino manei demisa kaha? Toyari na Kaiwofo weai dotu tonina: “Inontaraio era ma eha Kaiwo Mahikai fo fosa mani kaiwasa demang wesa.”
16 Wape Israelifosa, wiro ea kiai eroaso Kaiwo Mahikai fo kaha. Weo Yesayai medu toninai deyo, “Sengne waune, toyari manei wiro yoaso kaiwo amemadura ne kahaia.”
17 Ampafe roasoafo kawariai na fianai aino etaramioa fo, tuti fianai etaramioai nanai weneung na kaiwo ewuwua fo, amani Kristusi ne kaiwofo.
18 Wape yutang berahai, tarai we etarami kaiwo kariri Kristusi kaharai e? Todoni kontai etaramioai kawuru ampa! Weo na Sempaisi ne Kaiwofo weai dotu deyo, “Erawamifuifoi dotu wari nunei sentenang ampa, tuti ene kaiwofo dafai wariaia sobu nunei rea naya fo ampa.”
19 Yutang berahai nariai aha mau wo, tarai we inontarai Israeli fosa etafu kaiwofo kaharai e? Todoni kontai etafu kawuru ampa! Weo kaiwone Musai medu kaririai fafong, medu we Israelifosa, deyo, “Allai medu tonina, ‘Inari mea we ambori menemirorong pirahai na imoang inontarai na nu siai fo, tuti inari mea mehasou inontaraio na nu eserawaweraha fosa.’”
20 Yesayai medurai raisa aha deyo, “Allai ne Kaiwo finina, ‘Inontarai mano esera we yau kaha fosa esobu yau ampa, tuti yeinawi yau we mano wiro etutang we yau kaha fosa.’”
21 Wape kariri inontarai Israeli fosa, Yesayai medu tonina, “Allai medu deyo, ‘Rahida neungne isi warahu we inontarai na nuo etapa yau tuti etohong kariri nehu kaiwofo kaha fosa.’”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA