Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Semeton senamian! Tiang melẽt gati adẽq bangse tiang ẽndah teselametang. Dait tiang tetu-tetu do'eang ie pade tipaq Allah.

² Tiang bau ngebẽng kesaksian bahwe setetune ie pade semanget gati ngawule lẽq Allah. Laguq semangetne nike ndẽq tedasarang siq pengertian saq kenaq.

³ Ie pade ndẽq nenaoq berembẽ adẽqne jari kenaq lẽq arepan Allah sehingge hubungan ie pade kance Allah jari solah malik. Dait lantaran ie pade cume boyaq siq carene mẽsaq adẽqne jari kenaq lẽq arepan Allah, lantaran hal nike ie pade ndẽq patuh lẽq care saq teicanin siq Allah saq jariang manusie kenaq lẽq arepan-Ne.

⁴ Sẽngaq Almasih nike tujuan lẽman Hukum Taurat. Jari, sebilang dengan saq percaye tipaq Almasih tejariang kenaq lẽq arepan Allah.

⁵ Tetulis siq Musa bahwe dengan saq tejariang kenaq lẽq arepan Allah sehingge hubunganne kance Allah jari solah malik atas dasar Hukum Taurat, "Dengan nike gen idup siq ketaatanne lẽq Hukum Taurat nike."

⁶ Laguq dengan saq tejariang kenaq lẽq arepan Allah langan iman tipaq Allah, dalem Kitab Suci tetulis maraq niki, "Ndaq side bebase lẽq dalem angende, 'Sai saq gen taẽk ojok sorge?' (artine jauq Almasih turun),

⁷ atao, 'Sai saq gen turun ojok jurang maut?' (artine saq ngangkat Almasih taẽk lẽman ninggal)."

⁸ Maksutne maraq niki, "Berite lẽman Allah nike rapet gati lẽq side; lẽq biwihde dait dalem atẽnde." Nike berite lẽman Allah mengenai iman saq tiang sebarang.

⁹ Sẽngaq lamun side ngaku kadu biwihde bahwe, Deside Isa nike Junjungan Saq Mulie, dait percaye lẽq dalem atẽnde bahwe Allah sampun ngidupang Deside Isa Almasih lẽman ninggal, make side gen selamet.

¹⁰ Sẽngaq siq atẽne dengan percaye sehingge Allah nerimaq ie jari dengan saq tejariang kenaq lẽq arepan Allah sehingge hubunganne kance Ie jari solah malik. Dait siq biwihne dengan ngaku dait ie gen teselametang.

¹¹ Lẽq dalem Kitab Suci tetulis, "Dengan saq percaye lẽq Ie ndẽq gen teperilaq."

¹² Nike berlaku tipaq selapuq dengan, sẽngaq ndẽq araq bẽdene antare dengan Yahudi kance dengan bangse-bangse lain. Allah saq sopoq nike, Tuhan umaq selapuq dengan. Ie ngicanin berkah saq belimpah-limpah tipaq selapuq dengan saq nunas lẽq Ie. Sẽngaq dengan Yahudi atao dengan bangse-bangse lain ndẽq araq bẽdene. Tuhan saq pade umaq selapuq manusie, Ie ngicanin berkah saq belimpah-limpah tipaq selapuq dengan saq tunas lẽq Ie.

¹³ Dalem Kitab Suci tetulis, "Selapuq dengan saq ngempoh pesẽngan Tuhan gen teselametang."

¹⁴ Laguq berembẽ dengan bau ngempoh Ie lamun ie pade ndẽq percaye? Dait berembẽ ie pade bau percaye lẽq Ie lamun ie pade ndẽqman dengah berite mengenai Ie? Terus berembẽ ie pade bau dengah berite mengenai Ie lamun ndẽq araq dengan saq nyampẽang tipaq ie pade?

¹⁵ Dait berembẽ dengan bau nyampẽang berite mengenai Ie lamun ie pade ndẽq teutus? Lẽq dalem Kitab Suci tetulis maraq niki, "Berembẽ solahne kedatengan dengan-dengan saq jauq Kabar Solah!"

¹⁶ Laguq ndẽqne selapuq dengan Yahudi nerimaq Kabar Solah nike. Sẽngaq maraq basen Yesaya, "Tuhan, sai saq percaye lẽq berite saq tiang sampẽang niki?"

¹⁷ Keranaq nike, dengan-dengan jari beriman sẽngaq ie pade dengah berite. Dait berite nike tedengah sẽngaq araq dengan saq nyampẽang manik Almasih.

¹⁸ Laguq tiang beketuan: Napi tetu ie pade ndẽqman dengah berite nike? Pasti sampun! Sẽngaq araq tetulis lẽq Kitab Suci, "Suare ie pade sampun kedengahan ojok seantẽro dunie, napi saq ie pade sampẽang sampun dateng ojok poton dunie."

¹⁹ Tiang beketuan malik: Napi bangse Israel ndẽqman nenaoq? Penembẽqne Musa bebase, "Allah bemanik maraq niki, 'Tiang gen miaq side jari talon atẽ tipaq bangse-bangse saq ndẽqne bangse Israel. Dait tiang gen miaq side pade sili lẽq sopoq bangse saq bodo.'"

²⁰ Yesaya sayan bani malik bebase, "Maraq niki Manik Allah, 'Dengan-dengan saq ndẽq boyaq Tiang, ie pade sampun bedait kance Tiang; dait Tiang nyatayang diriq Tiang tipaq ie pade saq ndẽq ngetuanang Tiang.'"

²¹ Laguq mengenai bangse Israel, Yesaya bebase, maraq niki Manik Allah, "Sejeloan Tiang ngulurang imen Tiang tipaq sopoq bangse saq pagah dait ndẽq taat."

Roma

Video Roma 10

Ikuti Kami:

KONTAK | PARTISIPASI | DONASI