Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Bọu e iạ nakasilo, kụ sěngkakakělla Ahusu Domba e rụdarisị su wowom Bul᷊ud'u Sion. Dingange piạ i sire 144.000 su kataune kụ su apan děhụ i sire e mạbawohẹ areng'E ringangu areng'i Amang'E.
2 Mase iạ nakaringihe tingihẹ̌ bọu l᷊angị kere ghal᷊ěgehu akẹ u tědunang gaghuwạ dingangu kere gal᷊ědụ u rěllụ maihạ-ihạ. Tingihẹ̌ ene ikẹ̌karingihẹ̌ kere tingihu kěcapi kẹ̌kobikangu manga měnanalange.
3 Su těngong kaderang kawawantugẹ̌ dingangu riadikang ěpạ e ore manga mananěmbonange měmpělẹ̌likụ kadera e, i sire 144.000 su kataune e měkẹ̌kantarị u kantarị buhu sěmbua. Kantarị ene tawe ikaěndung i sai wal᷊ine, su l᷊ikudu i sire 144.000 su kataune e kụ seng niapakal᷊iwirẹ̌ bọu dunia e.
4 I sire ene kai apang kụ tạ turạ e, mẹ̌sul᷊ungu parawang, batụu tawe němpěnẹ̌nenggehẹ̌ manga wawine. I sire mạhuntol᷊ẹewe Ahusu Domba e balạewe sol᷊ong apa ral᷊engange. Bọu kal᷊awọu patikụ umatẹ̌ e, i sire ene seng niapakal᷊iwirẹ̌ kere sasěmba kahumotongange su těngon Duata ringangu su Ahusu Domba e.
5 Tawe němpẹ̌kẹ̌konti i sire; dingangu tawẹ sěngkul᷊e sarang kạdodọ si sire.
6 Mase iạ nakasilo malạekatẹ̌ bal᷊ine sěngkatau tụtěllạ marangẹ su l᷊angị. Malạekatẹ̌ ene e něhabaru Injilẹ̌ kakalẹ̌ e mědeạu ihabarẹ̌ su taumata su dunia e waugu patikụ umatẹ̌, hěnto, wera ringangu wanua.
7 Malạekatẹ̌ ene mạmohang dingangu tingihe maihạ u, "Kěngkatakụbeng Mawu Ruata, ringangu pẹ̌daloko kasěllah'E. Batụu seng tempone Mawu Ruata e měhukungu taumata e. Pěmpẹ̌subako si Sie kụ něndiadi langị, dunia, l᷊audẹ̌ dingangu patikụ simbul᷊u akẹ!"
8 Malạekatẹ̌ karuane e nakatol᷊e malạekatẹ̌ humotong kạpẹ̌berane, "Seng nawatang! Soan Babelẹ̌ masaria e seng nawatang! I Sie seng nakakiwukang kěbị umatẹ̌ e ringangu akẹ u anggor'u abul᷊ing pẹ̌sasundal᷊'e!"
9 Malạekatewe katěllune nakatol᷊e malạekatẹ̌ darua e, kapạmokạen tingihe maihạ, "Taumata apang kụ maněmba binatang e ringangu tul᷊adane, dingangu piạ tatialan binatang ene su rěhụ dingangu su l᷊imane,
10 taumata ene sarung manginung anggoru Ruata, mangal᷊ene anggoru ral᷊angehe kụ seng niral᷊ing su ral᷊ungu lainumange, tạ golọ e sarang kadodọ! I sire kěbị ene sarung sigẹ̌sakeng su ral᷊ungu putung dingangu malelang su těngon manga malạekatẹ̌ susi dingangu su těngon Ahusu Domba e.
11 Tipun putung kụ manigěsạ si sire ene sarung hanesẹ̌ tụtiowol᷊ẹ̌ sarang karěngụ e. Ěllo hěbi tawẹ potọ e i sire mạpahang mangal᷊ene i sire apang kụ měmpẹ̌sẹ̌suba binatang ene ringangu tul᷊adane, kěbị taumata kụ piạ tatialane arengu binatang ene."
12 Su ral᷊ungu kakakoạ ini, kawanuan Duata kụ mararingihẹ̌ su kěbị hengetangu Ruata ringangu satia su Mawu Yesus, hinong pakakakědang.
13 Mase iạ nakaringihe tingihẹ̌ bọu sorga nẹ̌bera u, "Bohẹko ini: Manětạ bọu orasẹ̌ ini, kariangkamang taumata nate, kụ mẹ̌tate těntal᷊ang kapẹ̌tangkiange Mawu e!" "Kahěngang!" ungkuěngu Rohkẹ̌ u Ruata e. "I sire sarungbe mangědo wọu měhal᷊ẹ̌ mawěhạ, batụu pul᷊isu pẹ̌tatangkiang i sire sarung duměndingang si sire."
14 Bọu e iạ timatingang, tangu sěngkakakělla e kai piạ binawa mawira. Su wowom binawa ene piạ sěngkatau mạiang kakěllaěng mạngawẹ taumata. Su těmbọ'E piạ makotane wul᷊aeng, dingangu su l᷊iman'E piạ bawẹ̌base mahoro.
15 Bọu e malạekatẹ̌ sěngkatau wal᷊ine nasěbang bọu ral᷊ungu Wal᷊em Mawu. Dingangu tingihe maihạ, i sie nangoro su tau mạiang su wowon binawa ene. "Bẹ̌baseng gaghambesu e kụ pěnsạ e, batụu kai seng tempone maměnsạ; dunia e seng maghurang, hakịu sembeng botonge pěnsakeng!"
16 Tangu i anu kụkaiang su wowon binawa e nangambesu l᷊aambes'E su dunia e, tangu dunia e napěnsạ.
17 Bọu ene iạ nakasilọ e sěngkatau malạekatẹ̌ bal᷊ine sěngkatau simẹ̌bang bọu ral᷊ungu Wal᷊em Mawu su sorga. I sie mal᷊aing nangumbelẹ l᷊aambesẹ̌ mahoro sěmbua.
18 Bọu ene, malạekatẹ̌ bal᷊ine sěngkatau e kụ piạ kawasane su putunge, riměntạ e wọu pananěmbaěnge. Kụ dingangken tingihe maihạ, i sie něngorọ e malạekatẹ̌ měngẹ̌ngumpaedẹ̌ l᷊aambesẹ̌ ene mahoro e angkuěng: "Bẹ̌baseng l᷊aambesu e ringangu hěsạ e manga wuang kalung anggorẹ̌ e wọu pungene su dunia e, u manga wuane e seng masasasạ!"
19 Tangu malạekatẹ̌ ene měngkate něngambesu l᷊aambese su dunia e kụ něhěsạ manga wuang anggorẹ̌ e wọu kalune, bọu ene niwahungke sol᷊ong tampạ u papěhasengu anggoru ral᷊angehu Ruata kụ sụsahoka e.
20 Manga wuang anggorẹ̌ ene nipěha sul᷊ikudu soa, kụ bọu papěhaseng u anggorẹ̌ e tangu piạe raha nelehẹ̌ kụ kere laelehu sal᷊ụ, karaune ute těllu hasụ su kilo metere, ringangu karal᷊unge maraning dua meterẹ̌.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA