Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ 'O Farisioka 'o bolu moi de 'o 'agamaka yodoto-dotoko yamuruo naga 'o Yerusalemino, yaino 'o Yesusino.

² 'Ona yakimake 'o Yesus wi do-domoteke yamuruo naga manga giama koya'isokuwa de kayo'odomou. 'Ena moteke 'o 'agama ma 'atorangi, salingou 'isira nanga giama pa'isokokasi.

³ 'O Farisioka de mita 'o Yahudioka yoodumu, yamoteke ma gou-goungu manga edete de manga dotumu manga 'adati. 'Ona yooluku yo'odomo nako manga giama koya'isokuawasi moteke kokia naga 'isitatapuokau.

⁴ 'O kianikia gee yo'ijano 'o pasarioka, nako koya'isokuwasi ge'ena koya'odomuwa. De 'o 'atorangi 'iregu 'o gudaiosi yaga-gaono gee manga edete de manga dotumoka, 'isoka manga galasi de manga sawoko yo'isoko ma 'atorangi, de mita manga kia sonaa gee 'o tambaga.

⁵ Ge'enau so 'o Farisioka de 'o 'agamaka yodoto-dotoko go'ona yosano 'o Yesusika, "'Ido'oa so 'ani do-domoteke 'ona manga giama koya'isokuawau de kayo'odomou? 'Okia ma sababu so 'ona yooluku yamoteke to ngone nanga dotumu de 'o edete manga 'adati?"

⁶ De 'una kawakisangokau, "Ngini nioelu-eluku! Posironga yadaenoka 'o Yesaya wosidemosirakau ma ngale ngini ge'ena la: 'Koneda ma Jo'oungu ma Dutu wongose: 'O nyawa-nyawa no'ona 'isuba ngoino duga ka manga 'uru ma kaioka, ma manga singina 'ikurutu ngoioka.

⁷ Ma faedaa koi'iwa 'ona yosuba ngoino, sababu 'ona yosidotoko ka 'o nyawa ma 'atorangi de yadiai 'isoka to ngoi 'ai 'atorangi!'

⁸ Ma Jo'oungu ma Dutu 'awi pareta koniosigisenuwa, so niaga-gao ka 'o nyawa ma 'atorangi."

⁹ Ge'enaka de 'o Yesus kawongosekau, "Ma goungu niobarija ma sala niaitomo ma Jo'oungu ma Dutu wi besesongo, la niosikuata ka to ngini ma sirete nia do-dotoko.

¹⁰ 'O Musa wokulakau 'o besesongo naneda: 'Niakihoromati nia dea de nia 'esa de nago'ona yakisibobeto manga dea de manga 'esaka, salingou yakihukumu yakiso-songene.'

¹¹ Ma ngini niosidotoko 'ato kaidadi 'o nyawa manga balusika yongose, ''Okia naga gee salingou tinikula ma ngale tinileleani, tosisubakau ma Jo'oungu ma Dutuka.'

¹² So ngini niakisidabi 'o nyawa koyakikalesanguwa manga balusika.

¹³ So de to ngini ma sirete nia do-dotoko gee niosidoto-dotoko 'o nyawaka, ngini niaisanga ma Jo'oungu ma Dutu 'awi demo. De 'o gudaiosi niadiai 'isoka koge'ena."

¹⁴ Ge'enaka de 'o Yesus wakitoomuoli 'o nyawa yoku-kudai go'ona de wakidongose 'onaka, "Niosigisene la niasahe!

¹⁵ Koi'iwa 'o kianikia moi gee 'iwosanga 'o nyawa manga dodaku de yakisimediri. Ma 'ena gee 'isupu 'o nyawaka, ge'enau yakisimediri ma Jo'oungu ma Dutu wi bionoka.

¹⁶ [So ngini de nia ngaukoka so tanu nio'isenika.]"

¹⁷ Gee 'o Yesus wakimada 'o nyawa yoku-kudai go'ona so wowosanga 'o woaka de wi do-domoteke yosano, "'O 'ade-'ade ge'ena ma ngale 'okia?"

¹⁸ Ge'enaka de wosango kawongosekau 'onaka, "So ngini ma koniasahewasi? Konianakowa 'ato 'okia naga po'odomo ge'ena koinasimediruwa?

¹⁹ Sababu ge'ena ko 'o singinakuwa, 'ena ka 'o pokoruku so kaisupuokali." De 'o Yesus 'awi demo-demo ge'ena, 'isinyata 'ato 'o 'inomo 'iodumu kaidadi pa'odomo.

²⁰ Ge'enaka de 'o Yesus kawongosekauoli, "Gee 'isupu 'o nyawa manga singinano, ge'enau yakisimediri.

²¹ Sababu 'o singinanou ge'ena 'ibaoro 'o di-dibangi 'ito-torou gee ma duanguku yomakapake kaitimaronga, yotosiki de yoto'oma,

²² yosongou, yosikahaga, yosigurubungu, de yadiai 'okia sonaa moi-moi 'ito-torou, yomadengo-dengoka, yopakisani, yotaleana, yomaie, de 'isusa yakidotoko.

²³ 'Iodumu 'ito-torou gee 'ibaoro 'o singinano, de ge'enau 'o nyawa yakisimediri."

²⁴ Ge'enaka de 'o Yesus woma'aiki ge'enaka dau, de wosikaoko 'o Tirus ma kota ma dateoko. 'O woa moioka womasido-dogumika ma womau 'o nyawa yoku-kudai 'uwa yanako, 'ena kayanakoka 'ato naga woboano.

²⁵ So mimoi gee 'ami ngowaka 'o tokata yodo-dongosamuku migi'isenoka 'o Yesus, de maika 'o Yesusika de mosubaku 'awi bionoka,

²⁶ de moga'asoko la 'o Yesus woginiiki 'o tokata gee 'ami ngowakoka. 'O ngeweka gumuna ko 'o Yahudiokawa, muna molahiri 'o Fenisia ma daeraaka 'o Siriaka.

²⁷ Ge'enaka de 'o Yesus kawomicaguluokau, "Madakau ngaro, la ka 'o ngowa-ngowakosi yo'odomo, sababu koyadaenuwa 'o ngowaka manga 'inomo de ka 'o kaso positowoka."

²⁸ 'O ngeweka gumuna mosango, "Ma goungu 'Aba, ma 'o kaso 'o meja ma timioka mita ya'odomo 'o ngowa-ngowaka manga 'inomo ma dota-dotaka!"

²⁹ Ge'enaka de 'o Yesus wongose munaka, "Sababu 'ani sa-sango ge'ena, kanoliou ngaro, 'o tokata ge'ena 'imagoraokau 'ani ngowakoka!"

³⁰ So 'o ngeweka gumuna molio de mi woaka maika 'ena 'ami ngowaka gumuna moma'iduokau 'o dangiroka, de ma tokata ma 'isupuokau munaka.

³¹ Ge'enaka de 'o Yesus womagoraka 'o Tirusoka de wosikaie 'o Galilea ma talagade waboa 'o Sidonie. 'Una watoaka 'o Kota Mogiooko ma daeraade.

³² Ge'enaka dau 'o nyawa wimoi wito-topongono de womou-mou wi'asano 'o Yesusoka. De yo'ota-'otaka go'ona yoga'asoko la 'o Yesus wi giama widatamiosi womou-mouku gu'una.

³³ So ma rai 'o nyawa gu'una 'o Yesus wisitingaika 'o nyawa yoku-kudaioka de wi ngauku ngai modidi ma sukonoka wi ra-raga wosisumuka 'asa de wakibiti, deika 'awi nga-ngaemikali wa'ao.

³⁴ Ge'enaka de 'o Yesus womatagadesi de woomasa watoomude 'asa deika kawongosekau 'unaka, "Efata!" ma ngale, "'Ipelenga!"

³⁵ Kage'ena de womasi'isenokau de wi demo-demo mita 'i'osakinokau, 'awi nga-ngaeme 'ipalitangokau so.

³⁶ Ge'enaka de 'o Yesus kowakisidabiwa 'ona yoodumu yosijarita nago'onaka naga bato. Ma gee de wotawanono monga, de kayodofoloi monga yosikajarita.

³⁷ De yoodumu yo'ise-'isene go'ona yoherangi ma sala. Sigado kayongosekau, "'Etei! 'Okia sonaa 'iodumu wodiai de kaisureli so! Yakito-topongono ma 'idadi yomasi'isene, de yomou-mou ma 'idadi yobicara!"

Markus

Video Markus 7

Ikuti Kami:

KONTAK | PARTISIPASI | DONASI