Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Hataholi Farisi bubuak esa ma mese agama de'ubee leme Yerusalem mai leo Yesus mai.

² Lita Yesus ana mana tungan de'ubee la'a no lima nala ta balisi tunga agama, fo nde la'a-linu tehu ta lafui oe lakahuluk, tunga agama nakanenete na fa.

³ Hataholi Farisi la leondiak boe, basa hataholi Yahudi la ho'u lahele bei ba'ikai nala ha'da na. Ala ta nau la'a-linu fa, metema ala beita lafui oe lakahuluk tunga eno-dalak fo nananaketu basa ka so.

⁴ Ala asa lini beek neme pasa ka mai soona, ala safe lakahuluk hata ndia dei, fo besa ka la'an. Ala ho'u lahele bei ba'ikai nala nakanenete fe'en ba'u ka, fo nde nakanenetek la'eneu, safe nggalaas, safe mango, ma safe lou-laa liti la.

⁵ Hu ndia de, hataholi Farisi la ma mese agama sila la latane Yesus lae, "Tao le'e de, O ana mana tunga mala la'a-linu te ala ta lafui oe fa? Hu beek de, ala ta tunga ita bei ba'ikai nala ha'da na fa?"

⁶ Boema Yesus nae, "Emi hataholi manadea dale kala! Hata fo Yesaya nafa'da elan la'eneu emi, memak tete'e ka la'en. Yesaya nafa'da nae, 'Manetualain nae leo ia, Hataholi sila la lakaluku-lakatele leu Au, ka'da linik hala-kokola nala, tehu dale nala doo ka neme Au mai.

⁷ Palsuma la'i esa kana, sila lakaluku-lakatele leu Au, nanahu, sila lanoli hataholi daebafa ka nakanenete nala nono'ka bai de, Au nakaneneteng sila la!'

⁸ Emi ta taoafik neu Manetualain paleta nala fa, boema emi ho'u mahehele hataholi daebafa ka nakanenete nala."

⁹ Boema Yesus nafa'da selu kasa nae, "Emi malela ma seli soaneu emi ta sipok Manetualain paleta na, fo sue ka nde emi ho'u mahele emi nanoli mala.

¹⁰ Musa fe basa paleta nde ia nae, 'Fe ha'da-holomata neu inam no amam,' boema 'Ba'eneu see fo ana soo-supa ina aman soona, muse hukunisan.'

¹¹ Tehu emi manoli mae: Makanaema hataholi nafa'da ina aman nae, 'Hata fo au muse fen neu au inang no au ama nga, au fe basan neu Manetualain so,'

¹² soona emi po'ilotak hataholi ndia neme belaba'un soaneu ana tulu fali ina aman.

¹³ Da'di no emi nanolim fo emi fen neu hataholi la ndia, emi tao mamopo Manetualain dede'a-kokolan. Emi bei tao-no'i dede'ak leondiak ba'u ka."

¹⁴ Boema Yesus nalo hataholi makadotok sila la la'i esa seluk de nafa'da nae, "Mamanene leona, fo daenga emi malelak!

¹⁵ Ta hapu hata esa neme deak fo ana masok leo hataholi a dalek neu, fo daenga ana hapu tao na hataholi ndia nanggenggeo fa. Dede'a nasafali na nae, hata fo ana kalua neme hataholi esa dalek mai, soona hata ndia nde tao nanggenggeo nana.

¹⁶ Da'di, makanaema emi madi'idok soona, mamanene leona."

¹⁷ Lelek fo Yesus la'oela hataholi makadotok sila la boema, neu leo uma dale neu de ana mana tunga nala latanen, nakandandaak ndia sosoa-ndandaan.

¹⁸ Boema Yesus nafa'das nae, "Ade emi boeo beita malela kana fa? Ade emi ta malelak hata fo ana masok leo hataholi esa dalek neu soona, hata ndia ana ta hapu tao na hataholi ndia nanggenggeo fa?

¹⁹ Nana hata fo manamasok ndia, ana ta la'ok tunga ate ka fa, tehu ana la'ok tunga tei ka, fo basa soona, ana kalua seluk." Yesus kokolak nae leondia nana, basa nana'ak lala'ena malole mesa-mesan.

²⁰ Boema Yesus kokolak seluk nae, "Hata fo manakaluak neme hataholi a dalek mai a, hata ndia nde tao nanggenggeo nana.

²¹ Nanahu neme dalek mai, fo nde neme dalen dale mai, dudu'a-aafi mangalau kala moli da'di, fo sila nde tao la hataholi a sosoa-piao, namanako, nanisa,

²² hohonge, ke'dindiu, nakasasa'ek dede'ak, boema ana tao-no'i basa hata mangalauk lala'ena, ma ana da'di hataholi mana dale-he'di hata, ta nanuu ha'da-holomata, nape'da dalek, koao-ndaeaok, ma nanoli doa kana.

²³ Basa hata mangalauk sila la, ala moli da'di leme dalek mai, fo basa sila la nde tao na hataholi a nanggenggeo a."

²⁴ Basa boema, Yesus la'oela mamanak ndia de neu leo nusak manadeka no kota Tiru sa. Ana masok leo uma esa dalek neu, nana Ana ta nau hataholi bubuluk, Ndia nai ndia fa. Tehu Ana ta hapu nafuni na aoina na fa.

²⁵ Inak esa ana inaana na, dula dale mangalau ka masok nai dalen dale. Inak ndia namanene hataholi la kokolak Yesus na'de na, boema neu leo Yesus neu de ana senek neu Yesus mata na,

²⁶ boema ana dokodoe fo ela Yesus usiheni dula dale mangalauk ndia neme ni'iana ndia dalek mai. Inak ndia, hataholi ta Yahudi fa. Ala bongin nai nusa Fenisia nai Siria.

²⁷ Yesus nafa'dan nae, "Muse fe ni'iana la la'a lakahuluk. Ta malole fa, metema emi ho'ima ni'iana la nana'a na fo fen neu busa."

²⁸ Boema inak ndia nae, "Lamatuak, busa manai mei sosolon dae boeo, la'a ni'iana la nana'a elan fo manatu'da leo dae neu a!"

²⁹ Boema Yesus nafa'dan nae, "Hu ka nde o natataam ndia de, fali mu'u ma leona, te dula dale mangalau ka, ana kalua neme o ana ma dalek mai so!"

³⁰ Inak ndia ana fali leona. Ana losa uma boema, nita ana na bei nangape'uk nai pepe'uk lain, tehu dula dale mangalau ka ana kalua te'e-te'e neme ni'iana ndia dalek mai so.

³¹ Basa boema Yesus la'oela nusa Tiru sa de Ana la'ok nakandoo tunga Sidon, fo neu leo Dano Galilea neu. Ana la'ok tunga enok manaleo nusak Kota Sanahulu a.

³² Nai ndia, hataholi la lo hataholi esa nggoa pakek leo Yesus neu. Loke Yesus fo Ana lalaa lima na neu hataholi ndia lain.

³³ Yesus no heok hataholi ndia mesa kana doo dooana faa neme hataholi makadoto kala mai boema, Ana tao limaku'u na leo hataholi ndia di'idoon duas dalek neu. Boema Yesus mu'di ape na, de nafaloe hataholi ndia maa na.

³⁴ Basa ndia boema, Yesus nanganalo leo lalai neu de Ana hela hahae na, boema nafa'da hataholi ndia nae, "Efata," fo sosoa na nae, "Matahuka leon!"

³⁵ Hataholi ndia di'idoo na natahuka, ma maa na mangana'u falik de ana mulai kokolak no malole.

³⁶ Boema Yesus kena-ka'i basa-basas fo ala boso tui dede'ak ndia neu su'di see a boen. Tehu Yesus boetai kena-ka'is, te sila boeo boetai tui-benga lakandoo.

³⁷ Basa hataholi fo lamanene dede'ak ndia, ala dodoo doa kana lanseli. Ala kokolak lae, "Ana tao basa hata lala'ena no malole! Nakalenak bai, Ana tao na hataholi pake kala hapu lamanene ma hataholi nggoa kala hapu kokolak!"

Markus

Video Markus 7

Ikuti Kami:

KONTAK | PARTISIPASI | DONASI