Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Lun Parisi dengan tuda'-tuda' guru Ukum luk pangeh nacing rat déi' Yerusalim iné' matun Neneh.
2 Idi ideh nekali' tuda'-tuda' anak sekola'Neh luk nekuman ruti dengan ticu' luk melutak, ieh ineh luk na biru' maya' adat lun Parisi.
3 (Ngaceku lun Parisi dengan amung-amung lun Yahudi na kuman kareb nateh ideh sibaru', ieh ineh maya' adat tepundeh.
4 Kudeng ineh teh kareb muli' rat kadai, na ideh miak kuman kareb nateh ideh nesibaru', idi mula' teh luk baken-baken luk ilapdeh idi binaya'deh, mepad kudeng maru' amung-amung sangkir, kuden, belanga tekaling, idi pagau.)
5 Lun Parisi idi guru-guru Ukum nengitun Neneh, "Ngudehké anak-anak sekola'Mu na nganau' mepad kudeng bada' lun rayeh, iamo' ideh kuman ruti dengan na sibaru'?"
6 Idi kebala Yésus nedeh, "Matu amung-amung luk pangeh bida' Nabi Yésaya ratnan muyuh lemulun luk siayu, mepad kudeng luk inayud: 'Pupu ini ngedita' Negku ku bibir tangdeh, iamo' niatdeh mado rat Negku.
7 Mo'-mo' lemulun ini sembayang Negku, ngaceku ideh mada' ukum-ukum ratnan bada' lemulun.'
8 "Idi ukum Allah muyuh necan, iamo' bada' lemulun muyuh ngimet."
9 Idi teh kebala Yésus, "Muyuh mileh ngarung ukum Allah, pad muyuh miak maya' bada' tepun muyuh.
10 Ngaceku Musa nepebala, 'Do' ngedita' taman-tinanmu,' idi teh, 'Lemulun luk ngedat taman-tinanneh, do' ieh pitayeh.'
11 Iamo' keburi' muyuh, 'Do' kudeng seburur lemulun pebala kuan taman kian tinanneh, Idi anun-anun luk inan ulek kuanmu rat negku pangeh mangun ku Kurban,' (ilungneh, barén inan Allah).
12 Idi na muyuh maré neneh nganau' anun-anun luk kuan taman idi tinanneh.
13 Kudeng ineh teh muyuh ngebeneh bala Allah ngaceku ratnan bada' muyuh, idi mula' teh luk mepad kudeng ineh luk ruen muyuh."
14 Yésus nenawar nelun mula' amé' matun Neneh teh, idi nepebala kuandeh, "Ninger muyuh, amung-amung luk rat Negku, do' muyuh kali' ilungneh.
15 Idi na luk idi anun-anun pana' luk macing rat pa luun burur lemulun idi semuet bang bururneh, miak ngelutak neneh, iamo' luk remuat rat bang niat lemulun, ineh luk ngelutak neneh.
16 Idé lemulun luk inan lalid miak ninger, do' ieh ninger."
17 Idi kareb Yésus nenecan lun mula' ineh idi nesemuet déi' bang ruma', idi anak-anak sekola'Neh nacing Neneh idi nengitun ratnan luk pinginud ini.
18 Idi kebala Yésus nedeh, "Muyuh na meluun ileh rat nelun baken. Naké muyuh kali', anun luk semuet bang burur lemulun luk rat pa luun na miak ngelutak neneh?
19 Ngaceku baken ieh semuet bang niat, iamo' bang batek, idi miak remuat bang temaba'." (Dengan luk kudeng ineh Yésus nengamo amung luk kenen ineh meligan.)
20 Idi teh kebalaNeh, "Anun luk remuat rat bang nait lemulun ineh luk ngelutak neneh.
21 Ngaceku rat déi' dalem, ieh ineh rat bang niat lemulun remuat terawé luk dat, luk mesawa', mano, ngaté, pasét,
22 melili, luk dat, naluk, pinian burur, temaruh, kuyo, medita' niat, bacé.
23 Amung-amung kekamen luk dat ini remuat rat bang niat idi ngelutak lemulun.
24 Yésus nenalan rat déi', id Ieh iné' bang bawang luk muneng ku Sur. Idi Ieh numak bang aceh ruma', pianNeh seburur lemulun pana' na kali', iamo' na Ieh miak sigapung.
25 Ngaceku dengan mesaget bala Yésus nacing inan seburur, luk kuan sebuleng anak decur luk isuut pangeh sinuet ada', idi ieh nacing tekeradung pa kiungNeh.
26 Idi decur ini seburur lun pupu baken luk tinganak déi' Siro Punikia. Idi ieh nemutuh Yésus nala' ada' ineh ratnan anakneh.
27 Iamo' kebala Yésus, "Nima' anak-anak uen ngebor atun, ngaceku na do' ngalap ruti ratnan anak-anak idi nala' kuan uko'."
28 Idi kebala decur ineh, "Matu, O Tuhan, iamo' uko' luk pa liang méja ine pana' kuman areg-areg luk kenen anak ineh."
29 Kebala Yésus neneh, "Ngaceku ratnan bala luk kudeng ini, do' iko muli' pangeh ada' ineh neremuat rat bang burur anakmu."
30 Kareb decur ineh nuli', idi ieh nenier anakneh ineh netelubid luun bitaranneh, idi ada' ineh pana' pangeh neremuat.
31 Yésus neremuat rab bang babpat Sur teh idi nelemaba Sidon iné' Takung Galilia maya' dalan Pulu' Bawang.
32 Idi ideh nenguit seburur lemulun luk mebengel idi meteh buri' iné' Neneh, idi ideh nemutuh Yésus ngerareng ticu'Neh luunneh.
33 Idi Yésus nengatad lemulun ineh rat arang lun mula' ineh, idi nenganau' bua' ticu'Neh bang lalidneh. Pangeh ineh Ieh nengelica' idi nengakem dila'neh.
34 Idi Yésus netengook déi' langit, idi nengarod idi nepebala kuan lemulun ineh, "Eppata," ilungneh, "Mukab iko!"
35 Petacu lalidneh mukab idi dila'neh pana' netaka, idi ieh pebala dengan mesiri.
36 Idi Yésus nemebpeng nedeh na mada' ratnan ineh kuan seburur lemulun pana'. Iamo' kareb Ieh metueh mebpeng, idi meluun tueh lemulun nemada' ratnan ineh.
37 Idi amung-amungdeh pelaba awa, keburi'deh, "Amung-amung luk inau'Neh pelaba do'. Ieh nganau' lemulun luk mebengel miak ninger, idi lemulun luk mebegkeh miak pebala."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA