Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai, sanggah roh martumpu hu Bani Parisei ampa deba humbani sibotoh surat, na roh hun Jerusalem,
2 jadi ididah sidea ma deba susian-Ni mangan ruti marhitei tangan na butak, ai ma, seng palobei marburih.
3 Ia halak Parisei ampa haganup halak Jahudi, seng ra mangan anggo lang palobei tangkas iusah tanganni mangihutkon adat ni nalobei.
4 Anjaha anggo mulak hun tiga, seng mangan sidea, anggo lang palobei maridi; anjaha buei ope adat na legan idalankon sidea, songon na mamurihi panginuman, gendi ampa gusi tombaga.
5 Jadi isungkun Parisei ampa sibotoh titah ai ma Ia, “Mase ma lang iihutkon susian-Mu adat ni ompung nalobei, ai mangan ruti do sidea marhitei tangan na butak?”
6 Jadi nini ma dompak sidea, “Sintong do panjahaion ni si Jesayas pasal nasiam, ale sipakulah-kulah, songon na tarsurat ai, ʻIpasangap bangsa on do Ahu marhitei bibirni, tapi uhurni daoh do hun Bangku!ʼ
7 Soya do pambahenan ni sidea pasangapkon Ahu, ai titah-titah ni jolma do ipodahkon sidea.
8 Tading do titah ni Naibata ibahen nasiam, halani mandalankon adat na humbani jolma.”
9 Nini ope bani sidea, “Patut ma tongon iparnalang nasiam titah ni Naibata, halani mandalankon adat nasiam.”
10 Ai ihatahon si Musa do namin, “Pasangap ma bapamu ampa inangmu! Ambah ni ai, barang ise na mamurai bapani atap inangni maningon bunuhon do.
11 Tapi nasiam mangkatahon, barang ise na mangkatahon bani bapani atap inangni, ʻKorban! Artini, sagala na patut pangurupingku bamu, domma na galangkon.ʼ
12 Jadi seng be ilopas nasiam ia mambahen atap aha bani bapani atap inangni,
13 gabe iparseda nasiam do Hata ni Naibata marhitei adat-adat na pinadalan nasiam in. Anjaha buei do na sonin idalankon nasiam.”
14 Dob ai idilo ma use halak na mabuei ai, nini ma dompak sidea, “Nasiam haganup, tangihon ma Ahu anjaha parimbagaskon nasiam ma.
15 Seng butak jolma halani na masuk hun darat hubagas dirini, tapi na luar humbani jolma ai, ai do na pabutakkonsi.
16 Parpinggol na marpanangar, itangihon ma in!”
17 Dob masuk Ia hu rumah, holang humbani na mabuei ai, isungkun susian-Ni ma Ia pasal limbaga ai.
18 Jadi nini ma dompak sidea, “Dihut do hape hanima seng mangarusi ai? Ai seng dapot uhurnima, na so tarbahen butak jolma bahenon ni sagala na masuk hun darat hubagas dirini?
19 Ai seng masuk ai hubagas uhurni, hubagas boltokni do ai laho, dob ai kaluar bani ianan na suhi.” (Marhitei ai torang pansing do sagala sipanganon).
20 Tapi nini ma use, “Na kaluar humbani jolma, ai do pabutakkonsi.
21 Ai humbagas, humbani uhur ni jolma do roh uhur na jahat, parriah-riahon, panangkoon, pamunuhon,
22 parbangkison, pangkauton, hajahaton, panipuon, parsondukbungkason, subil, panreheion, gijang ni uhur ampa pamunuhon.
23 Haganup hajahaton ai humbagas do rohni, ai do na pabutak jolma.”
24 Dob ai bingkat ma Ia hunjai, laho hu nagori Tirus. Masuk ma Ia hubagas sada rumah, ninuhur-Ni, ase ulang adong na mambotoh ai, tapi seng tarponopkon.
25 Tapi mintor tarbogei do ai bani sada naboru, adong do sada boruni siniaran ni setan. Jadi roh ma ia, manrogop hu lobei ni nahei-Ni.
26 Ia naboru ai, parbegu do, bangsa Sirofenisia, jadi ipangindo ma hu Bani, ase iusir setan ai humbani boruni ai.
27 Tapi nini ma mambalosisi, “Bosur ma lobei dakdanak, ai seng patut buaton ruti humbani dakdanak, laho mamberehon ai bani baliang.”
28 Jadi marbalos ma ia, nini ma hu Bani, “Tongon do ai Tuhan, tapi ipangan baliang na i toruh ni meja do rimah-rimah ni dakdanak.”
29 Jadi nini Jesus ma hu bani, “Halani hatamu ai, laho ma ham, domma mandarat setan ai humbani borumu ai.”
30 Laho ma tongon ia, jadi jumpahsi ma boruni ai modom-modom i podoman, anjaha setan ai domma luar.
31 Dob ai itadingkon ma use nagori Tirus, manlopusi Sidon laho dompak Tao Galilea, gabe das ma Ia hu nagori Dekapolis.
32 Jadi adong ma na mamboban hu Bani sada halak na nengel anjaha longah, anjaha ipindo ma hu Bani, ase itampeihon tangan-Ni hujai.
33 Jadi iarahkon Jesus ma ia hubani na suhi, holang humbani halak na mabuei ai, ipamasuk ma jari-jari-Ni hubagas pinggol ni halak ai, martijur ma Ia anjaha ijamah ma dilahni,
34 lanjar mangkawah ma Ia dompak datas, marhosah ganjang, dob ai nini ma, “Hepata!” Artini, “Mungkab ma!”
35 Jadi mungkab ma tongon pinggolni anjaha harhar sangkut-sangkut ni dilahni, gabe dear ma parsahapni.
36 Ipandang ma sidea, ase ulang ipatugah-tugah na masa ai atap bani ise pe. Tapi lambin ipandang, lambin iompot sidea do mambaritahon ai.
37 Jadi longang tumang ma sidea, nini ma, “Dear do haganup ibahen, gabe marpambogei do na nengel, anjaha marsahap ia na longah.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA