Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Tokolompok intau im Parisi bo mototunduí mita kon agama nongkon Yerusalem, namangoi ko'i Yesus.
2 Mosia noko'ontong kon tongonumai murií i Yesus nonga'an ta'e diaí nonomok muna, naí inta kon atorang in agama.
3 Intau mita im Parisi bo Yahudi totok motoindudui kon adat im mogoguyang monia. Mosia in diaípabií monga'an aka diaípa monomok podudui atorang inta ain sinantuí.
4 Onu in taḷuion kom pasar diaípabií ka'anon, aka diaípa bata'an muna. Nobayongpa doman atorang nongkon mogoguyang monia inta umuranpa totok kinadaian monia; umpamanya atorang moyuyuk kong galas, palo, bo pakakas mita inta nongkon tambaga.
5 Manangka intua intau mita im Parisi bo mototunduí mita kon agama Yahudi noliboí ko'i Yesus, "Nongonu sim murií-Mu mita nonga'an ta'e diaí nonomok muna? Nongonu sin diaíbií i mosia dumudui kon adat im mogoguyang naton?"
6 Ki Yesus notubag,"Hei mo'ikow intau mita mongomunapik! No'itutui totok onu inta aim pinota'au muna i Nabi Yesaya soaáḷ mo'ikow, inta pinais nana'a, 'Nana'a in singog i Allah, Intau mita tatua mosumbah ko'i-Nakoí, tongaíbií kon singog, ta'e gina monia noyayukbií ko'i-Nakoí.
7 Diaí im mangale posumba'an monia ko'i-Nakoí, aka atorang intau yo tunduíon monia naíonda bo atorang-Ku intua!'
8 Parentah mita i Allah in tolikudan mita monimu, bo atorang mita intau tua ing kadaian totok monimu."
9 Bo nana'a doman guman i Yesus ko'i monia, "Mo'ikow mopandoi totok monolikud kom parentah i Allah simbaí mota'au moḷukad kon adat monimu tontanií.
10 Ki Musa nobogoidon im parentah nana'a, 'Hormatdon ing ki amaí bo ki inaímu,' bo 'Ki ine im moposingo-singogmai ko'i amaí ande ko'i inaínya, musti hukumon matoi.'
11 Ta'e mo'ikow im motunduí nana'a: Aka intau moguman kong guyanganya, 'Onu i musti ogoiku ko'i amaí bo ko'i inaí, aim bidon pinosumbahku ko'i Allah,'
12 daí pobebasondon monimu intau tatua nongkon kowajibannya motuḷung ko'i amaí bo ko'i inaínya.
13 Daí totunduí monimu tontanií tatua inta ain sinunduí monimu kon intau mita, mangaleon kon mo'ikow monginggamaídon kon singog i Allah. Nobayongpa doman in soaáḷ natua in inaidan monimu."
14 Bo ki Yesus nogoinií kon intau mobayong tatua bo noguman bui ko'i monia, "Indongogai simbaí komangalean monimu!
15 De'emanbií inta kina'an intau im mokonajis, ta'e inta iḷumuaibií nongkon bibig im mokonajis ko'inia.
16 [Daí aka kobongoḷan yo pokidongog.]"
17 Naonda in nonaḷaímai ing ki Yesus kon intau moaíntoí tatua bo sinumu'ot kom baḷoi, murií-Nya mita noliboí ko'i-Nia mongo onu i mangale porumpama'an tatua.
18 Daí ki Yesus noguman, "Daí umpakah yo diaípa doman komangalean monimu? Umpakah yo diaí komangalean monimu kon inta kina'an in diaíbií mokonajis kon intau?
19 Sin inta kina'an tua in diaíbií nongin gina, ta'e nongin sianbií bodongka bui mo'iḷuai." Singog mita i Yesus tua noponyatabií kom bayongan koka'anon mota'aubií ka'anon.
20 Ki Yesus noguman bui, "Inta iḷumuaibií kon intau in mokokotor ko'inia.
21 Sin inta nongkon bonubií ing gina, inta nomukaí nongkon raian mita inta mora'at im mokopopisií kon intau mogaid kon inta moko'oyak naí, monakow, molimod,
22 monualing, monguboḷ, moponapud in diaí totu'u, bo mogaid kom bayongan inta mora'at, modunia, diaí ko'endar, mo'intoi, mokaḷakuang, bo moyoyiga didikon.
23 Bayongan inta mora'at tua momukaí nongkon bonu ing gina bo tuabií im mokonajis kon intau."
24 Onda intua ki Yesus nonaḷaímaidon kon tampat tatua, bo minayak in lipuí inta kon diug in Tirus. Sinumu'ot in Sia kon tobatuí baḷoi, bo ibogon-Nya diaí kota'auan intau kon Sia ingkon tampat tatua. Ta'e diaí nota'au nogadop in Sia.
25 Tobatuí guyanga bobay, inta ki adiínya bobay kinotoḷangan in dimukud mora'at, ain nokodongog kon soaáḷ ki Yesus tua. Sia namangoi sinumungkud kon tayowon i Yesus,
26 bo poḷat nopo'igum simbaí ki Yesus moguntun kon dimukud mora'at nongkon adií tatua. Guyanga tatua de'emanbií intau Yahudi, sia tua nongkon butaíbií im Penisia kon Siria.
27 Daí ki Yesus noguman ko'inia, "Adiíbií mita im musti muna poka'anon, sin diaíbií mopia aka mogamaí kon ka'anon in adií mita bo ogoi kon ungku."
28 Daí kaim bobay tatua doman, "Tuang, ungku mita inta kon siup im meja moka'anbií doman kom muyo-muyok ing ka'anon inta iḷabuí im mongoaídií tatua!"
29 Ki Yesus noguman ko'inia, "Lantaran natua in tubagmu, daí pobuidon, dimukud mora'at iḷumuai bidon nongkon i adiímu!"
30 Daí nobui domandon ing guyanga bobay tatua. Kobaya'annyamai kom baḷoi, nosiugdon makow ing ki adiínya kon tosiugannya bo dimukud mora'at totu-totu'udon iḷumuai nongkon adií tatua.
31 Onda intua ki Yesus nonaḷaímaidon kom butaí in Tirus, bo nongingguput kom bobaya'an-Nya nongin Sidon nopobayak in Danow Galilea. Sia nomilií kon daḷan nongin daerah inta sinangoian "Kotaí Mopuḷuh."
32 Kon tua, oyuíon intau namangoi ko'i Yesus takin nodia kon tobatuí intau bongoḷ bo boboí. Pino'igum monia ko'i Yesus simbaí popo'ukat-Nya in lima-Nya kon uḷu intau tatua.
33 Intau bongoḷ bo boboí tatua dinia i Yesus pinotontanií kon intau nobayong bo pinobonunya ing gonggoyamuk in lima-Nya kom bongoḷan intau tatua, onda intua nonduyaí in Sia bo iyapu-Nya in dilaí intau tatua.
34 Nopaḷut makow kon tua iḷumangag kon ḷangit ing ki Yesus bo nogina noropot poḷat noguman kon intau tatua, "Epata," mangalenya, "Kobukatdon!"
35 Bongoḷan intau tatua nobukat bo noḷukoí domandon bui in dilaínya bo nota'audon sia nosingog.
36 Bo ki Yesus nolarang ko'i monia komintan im mongonguman kon soaáḷ tatua ko'i ineka. Ta'e naímai tua im pololarang i Yesus, ta'e naímai tua doman im poposiar magií-makow monia.
37 Bo bayongan intau inta nokodongog kon tua moherang totok. Mosia noguman, "Tua komintan inaidan-Nya notompia! Nodapot im binalií-Nya intau bongoḷ nokodongog bo intau boboí nokosingog!"
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA