Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sekelompoq dengan Parisi dait pire ahli-ahli Taurat lẽman Yerusalem, parek ojok Deside Isa.

² Ie pade serioq pengiring-pengiring Deside Isa bekelor kadu ime saq ndẽq bersi secare agame, ndẽq bisoq imene juluq, menurut aturan agame.

³ Dengan-dengan Parisi, maraq nike ẽndah selapuq dengan Yahudi, taat gati lẽq adat istiadat leluhur ie pade. Ie pade ndẽq gen bekelor sendẽqman bisoq ime maraq saq sampun tetentuang.

⁴ Lamun ulẽq lẽman peken, ie pade ẽndah ndẽq bekelor lamun ndẽq persiq diriqne juluq. Luwẽq warisan lain malik saq ie pade tegel, umpamene hal bisoq jembung, cẽrẽt dait pekakas-pekakas tembage.

⁵ Keranaq nike dengan-dengan Parisi dait ahli-ahli Taurat nike metakẽn lẽq Deside Isa, "Kembẽq pengiring-pengiring Pelungguh nẽnten idup menurut adat istiadat leluhurte, laguq bekelor kadu ime saq najis?"

⁶ Jawab Deside Isa, "Side pade dengan-dengan munapik! Tepat gati napi saq tenubuatang siq Nabi Yesaya, mengenai side pade, 'Maraq niki Manik Allah, Dengan-dengan nike nyembah Tiang cume siq ucapan doang, laguq atẽne jaoq lẽman Tiang.

⁷ Percume ie pade nyembah Tiang, sẽngaq aturan manusie ie pade ajahang, maraqne hal nike aturan Tiang!'

⁸ Prẽntah-prẽntah Allah side pade ndẽq perhatiang, dait aturan-aturan manusie side pade tegel pacu-pacu."

⁹ Beterus Deside Isa bemanik malik, "Side pade ceket gati nolaq prẽntah Allah adẽq side pade bau pertahenang ajahande mẽsaq.

¹⁰ Musa sampun ngicanin prẽntah niki, 'Pade hormatin amaq dait inaqde!' dait 'Sai-sai saq nyumpaq amaqne atao inaqne, harus tehukum matẽ.'

¹¹ Laguq side pade ngajahang: Lamun dengan bebase lẽq amaqne atao lẽq inaqne, 'Napi saq seharusne tiang bẽng lẽq inaq dait amaq tiang, sampun tiang aturang tipaq Allah,'

¹² make side pade bẽbasang dengan nike lẽman kewajibanne nulung amaqne atau inaqne.

¹³ Jari, lantaran adat istiadat leluhurde, side pade nyatayang Manik Allah ndẽq berlaku. Dait masih luwẽq hal-hal maraq niki saq side pade laksaneang."

¹⁴ Beterus Deside Isa ngemanikang malik dengan luwẽq nike, dait bemanik lẽq ie pade, "Pade dengahang adẽq side pade ngerti!

¹⁵ Ndẽq araq napi juaq lẽman luah saq tame ojok dalem dengan saq bau piaq dengan nike jari najis. Sebalikne saq sugul lẽman sopoq dengan, nike saq piaq ie najis.

¹⁶ [Lamun bedowẽ kentok jari dengah harus dengahang.]"

¹⁷ Sewaktu Deside Isa bilin dengan luwẽq nike, dait tame ojok gedẽng, pengiring-pengiring-Ne metakẽn lẽq Ie mengenai maksut perumpamean nike.

¹⁸ Make Deside Isa bemanik lẽq ie pade, "Napi side pade ndẽqman ngerti ẽndah? Napi side pade ndẽq iniq ngerti bahwe saq tame ojok dalem sopoq dengan ndẽq bau piaq dengan nike najis?

¹⁹ Sẽngaq saq tame nike ndẽq liwat atẽ, laguq liwat tian, beterus sugul malik." Siq ucapan-ucapan nike Deside Isa nyatayang bahwe selapuq keloran halal.

²⁰ Beterus Deside Isa bemanik malik, "Saq sugul lẽman dengan, hal nike saq piaq ie najis.

²¹ Sẽngaq lẽman dalem atẽ dengan, timbul pikiran-pikiran jahat saq jari penyebap dengan gawẽq perbuatan saq cabul, memaling, nyematẽq,

²² bezinah, nipu, pitnah, dait gawẽq hal-hal saq jahat, serakah, licik, talon atẽ, sombong dait sengke teajah.

²³ Selapuq saq jahat nike dateng lẽman dalem, dait hal nike saq piaq dengan najis."

²⁴ Beterus Deside Isa bilin taoq nike, dait lumbar ojok daẽrah Tirus. Ie tame ojok sopoq gedẽng dait nẽnten kayun tewikanang siq dengan bahwe Ie araq lẽq derike. Laguq Ie nẽnten bau ngerahasieang kerauhan-Ne.

²⁵ Malahan, sopoq inaq saq bije ninene tekuasein siq roh jahat, dengah mengenai Deside Isa. Ie parek ojok Deside Isa dait sujut lẽq arepan-Ne.

²⁶ Dengan nine nike dengan Yunani bangse Siro-Penisia. Ie tunas tipaq Deside Isa jari sediq roh jahat nike lẽman bijene.

²⁷ Deside Isa bemanik lẽq dengan nine nike, "Kanak-kanak harus tebẽng bekelor juluan. Ndẽqne patut bait keloran kanak-kanak terus tesaut tipaq acong."

²⁸ "Mule tetu, Junjungan Saq Mulie," jawab dengan nine nike, "acong-acong lẽq bawaq mẽje ẽndah ngaken salo-salo saq tegeriqang siq kanak-kanak!"

²⁹ Beterus Deside Isa bemanik lẽq ie, "Lantaran jawabande nike, silaq side ulẽq; roh jahat sampun sugul lẽman bijende!"

³⁰ Dengan nine nike ulẽq. Lẽq balẽ, daitne bijene kenyeke tindoq lẽq lasahne, dait sẽtan tetu-tetu sampun sugul lẽman kanak nike.

³¹ Beterus Deside Isa bilin daẽrah Tirus, dait nerusang pemargian-Ne langan Sidon ojok Danao Galilea, lẽq tengaq-tengaq Dekapolis.

³² Lẽq derike dengan-dengan jauq sopoq dengan kedok dait pakoq ojok Deside Isa. Ie pade tunas lẽq Deside Isa adẽq Ie noloq gading-Ne lẽq atas dengan nike.

³³ Deside Isa gadingang dengan nike, pekelin ie lẽman dengan luwẽq beterus noloq ranggot-Ne ojok dalem kedue kentok dengan nike, terus Deside Isa beludah, dait jamah ẽlaq dengan nike.

³⁴ Sesampun nike, Deside Isa nengadah andang langit sambil bebangsel dait bemanik tipaq dengan nike, "Epata!" artine, "Kebukaqan!"

³⁵ Kentok dengan nike kebukaq dait ẽlaqne jari lemes, dait ie mulai tao ngeraos.

³⁶ Beterus Deside Isa balaq ie pade selapuq adẽq ndaq nyeriteang hal nike lẽq sai-sai. Laguq sayan tebalaq siq Deside Isa, ie pade sayan nyebarang ie.

³⁷ Dait selapuq dengan saq dengah hal nike bengaq gati. Ie pade bebase, "Selapuqne Ie laksaneang secare bagus! Malahan Ie piaq dengan kedok iniq dedengah dait dengan pakoq tao ngeraos!"

Markus

Video Markus 7

Ikuti Kami:

KONTAK | PARTISIPASI | DONASI