Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali re’e seore ma’i bara sawei mba’a to Yahudi to aliran Parisi pasi singga’a tau to mampoguru porenta i Musa. Sira yako Yerusalem ma’i mangampago i Yesu.
2 Wali tempo sira rata nja’u lipu nakare’e i Yesu, tempo etu sira re’e mangkita anaguru i Yesu sira mangkoni pei taa mamue ruyu singkonong ewa ada nto tu’angi nsira to Yahudi.
3 Wali sira masusa mangangkita palaong to etu apa to Yahudi to aliran Parisi etu pasi samparia to Yahudi to yusa, sira mangalulu kojo ada nto tu’angi nsira. Wali ane ewa ada nsira etu sira tawa maya mangkoni ane taa mamue ruyu singkonong ewa ada etu.
4 Pasi sira seja ane yau lo’u pasar, rata ma’i tawa maya mangkoni ane taa mandiu ruyu singkonong ewa ada nto tu’angi nsira. Pasi ane ewa ada nsira etu boros kojo wo’u to nalulu kojo nsira. Apa ada to si sira pasiwa mamposo’i sangkir, kura pasi pawanga yako ri tambaga, si’a ojo mangika ngkewanya. Wali mabeu kojo palaong to naika nsira mangalulu ada nto tu’angi nsira.
5 Wali tempo to Yahudi to aliran Parisi pasi tau to mampoguru porenta i Musa, tempo sira mangkita anaguru i Yesu mangkoni taa mamue ruyu mangalulu ada to etu, sira masusa kojo rayanya wali sira mangampago i Yesu panewa mampotanaka resi Ia, sira manganto’o, “Maka pei anaguruMu taa mangalulu ada nto tu’angi ngkita? Apa tempo sira mamue damangkoni, tempo etu sira taa mangika singkonong ewa ada to etu?”
6 Wali i Yesu mangansono, to’oNya, “To pantuntu tuntu i mPue Allah tempo owi, i Yesaya, ia re’e mampakanasaka yami mangkonong komi to ojo gombomu manoto. Wali monso pu’u gombo to ratulis nja’u raya ntuntu i mPue etu. Apa i Yesaya ia mangantulis gombo i mPue Allah to manganto’o, ‘Tau si’i mampakabae Aku ojo ri nganganya, pei rayanya longko yako resi Aku.
7 Wali tau to ewa wetu tare batuanginya mampue resi Aku, apa ane sira mampoguruka tau, sira ojo mampoanika mampoguru tuntu i mPue Allah, pei kamonsonya anu to napoguru nsira etu ojo ada nto lino.’ Wali etu semo to nato’o i Yesaya mangkonong komi.
8 Wali komi ojo mangaliunaka porenta i mPue Allah pei mangalulu kojo ada nto lino.
9 Komi mampobuuka komi pande kojo tempo mampobo’o porenta i mPue Allah see komi maya mangalulu ada ngkomi.”
10 Wali i Yesu manganto’o wo’u, to’oNya, “I Musa ia re’e manganto’o tempo owi, ia manganto’o, ‘Pakabae pa’amu pei indomu.’ Pasi Ia manganto’o seja, ‘I sema tau to mampoja’a pa’anya bara indonya, tau etu taa maya taa rapopate yau.’ Ewa see anu to rapotundeka ri raya ntuntu i mPue Allah.
11 Pei yusa to nupotundeka ngkomi. Apa komi mampotundeka tau taa mawei nempo taa mangalulu porenta etu. Komi manganto’oka sira taa mawei ane taa mangansawang pa’anya bara indonya ane manganto’oka sira ewa si’i, to’onya, ‘Aku taa kukoto mangansawang komi apa anu to masipato aku mangawaika komi, aku roomo mamparajanjika yau darapampueka resi i Pue Allah.’
12 (7:11)
13 Wali ewa wetu nuika ngkomi ojo mangaliunaka tuntu i mPue Allah see maya mangalulu ada ngkomi. Pasi boros wo’u palaong to yusa to nuika ngkomi mangaliunaka tuntu i mPue Allah.”
14 Wali yako etu i Yesu mampokio wo’u tau boros pei manganto’oka sira, to’oNya “Padongeka kojo pasi pobatuangka gombongKu si’i komi samparia.
15 Apa tau nempo magege palenya tempo mangkoni, si’a palaong to etu mampakarikasika rayanya ri pangkita i mPue Allah. Apa si’a anu to masua ri raya ntau to mampakarikasika rayanya ri pangkita i mPue Allah. Pei lengko pasi gombo to masuwu yako ri raya ntau etu, etu semo to mampakarikasika rayanya.
16 Wali i sema tau to nadonge ntalinganya, padongeka!”
17 Wali ojo karoonya i Yesu manganto’o gombo etu, Ia mampiyaika tau boros panewa Ia masua ri raya banua. Tempo ri raya banua etu anaguruNya mampotanaka resi Ia mangkonong batuanginya rapa to Ia owo room manganto’o etu.
18 Pei i Yesu manganto’oka sira, “Wimba, pasi komi seja taa manasa gombo etu? Bara taa nunsani ngkomi kesaa anu to nakoni ntau, si’a to etu to mampakarikasika ia ri pangkita i mPue Allah?
19 Apa anu to nakoni ntau etu si’a masua ri raya sia ntau, pei ojo masua ri raya ngkomponya panewa polas yau.” Wali ewa wetu nato’o i Yesu mampakanasaka sira pangkoni samparia paka maya rakoni.
20 Wali yako etu i Yesu manganto’o, “Kesaa to masuwu yako ri raya ntau, etu semo anu to mampakarikasika tau re’e pangkita i mPue Allah.
21 Apa ri raya sia ntau re’e mampobuuka anu to maja’a sampe napolengkoka anu to maja’a etu, ewamo magoyal, malima, mampopate sa’e,
22 masala, manipu, pamporani ndaya maja’a kojo, kaloo raya mangkita anu nsa’e, bawiwi, mangei, pasi madoyo.
23 Wali samparia palaong to maja’a etu paka yako ri raya ntau, see naka ia mangika. Wali palaong to maja’a etu, etu semo to mampakarikasika raya ntau ri pangkita i mPue Allah.”
24 Wali yako etu i Yesu pasi anaguruNya mayoko yako ri Galilea yau njo’u lipu-lipu to ri awe ngkota Tirus pasi Sidon. Ojo karata nsira nja’u samba’a lipu etu, sira masua ri raya banua ntau. Wali tempo etu i Yesu taa rani tau boros mangansani Ia nja’umo nja’u ria. Pei taa mawali apa re’e tau to mangkita Ia.
25 (7:24)
26 Wali nja’u lipu etu re’e samba’a tau we’a, tau etu tau Yunani, si’a to Yahudi. Ia yako ri kota Penisia nja’u propinsi Siria. Tau we’a etu ia re’e samba’a ananya to kodi to we’a seja, ananya etu naposuak measa. Wali tempo tau we’a etu mangandonge i Yesu nja’u nja’u ria, ia yau mangampago. Panewa rata resi i Yesu ia madungku yau ri wawo ntana ri tangoNya manga’angga Ia. Ia manganto’o, “Kuporapika resi Komi see Komi damangarubak measa yako resi anangku.”
27 Pei i Yesu mangaligi ia, Ia manganto’o, “Taa masipato pangkoni to nakoni nu ngana mayunu pei daratasoka yau asunya. To tao-tao mampokoni ruyu ngana mayunu etu naka bosu.” Ewa wetu sono i Yesu resi tau we’a to Penisia to si’a to Yahudi etu. Ia manganto’o gombo etu see to we’a etu mangansani masipato to Yahudi semo to uyunya isawanginya.
28 Wali tau we’a etu manasanya tau to si’a to Yahudi semo raporapaka ewa ana, wali ia manganto’o, “Monso pu’u Pue, pei ane pangkoni to toronya to nakoni ngana mayunu etu pei maranta bara la’ara meja, pasiwa asu maya seja mansaka mangkoni.”
29 Wali i Yesu manganto’oka tau we’a etu, Ia manganto’o, “Matao kojo pasono ngkorom etu. Wali pawolili muni njo’u anamu apa anamu matao munim. Measa miyaimo yako resi ia.”
30 Wali tau we’a etu mawolili muni pei mampago ananya. Ia mangarata ananya masanang muni, ia re’e maturu-turu ri wawo ngkoi, pasi measa tamo re’e resi ia.
31 Wali i Yesu pasi anaguruNya mayoko yako ri awe ngkota Tirus yau lo’u rano Galilea. Sira mangalulu jaya to liu ri Sidon pasi lipu to rato’oka Sampuyu Kota.
32 Wali nja’u ria re’e tau to mangkenika i Yesu tau to wongo pasi matelo. Tau to mangkeni ia etu mamporapika resi i Yesu see Ia damampotaka tau to wongo pasi matelo etu see ia matao muni.
33 Wali i Yesu mangkentar tau to wongo etu, ojo sira dua malinja sangkodi. Tempo etu i Yesu mangajoloka tanujuNya nja’u wayau ntalinga ngkai etu, pasi Ia mayua ngeru panewa mampotakaka nja’u jila ntau etu.
34 Ojo karoonya etu Ia matingoa panewa mangore nosa. Ia manganto’oka tau wongo, “Epata.” Batuanginya gombo etu, “Tilokamo”.
35 Ojo karoonya i Yesu manganto’o gombo etu, ngkai etu ia nadongemo rao pasi tamo matelo, gombonya manasamo.
36 Wali yako etu i Yesu mamporentang tau boros, Ia manganto’oka tau boros etu, “Ne’e kojo mampakarebaka palaong to nawali si’i resi tau to yusa wo’u.” Pei tau boros etu taa kojo naaya. Sira yau manganto’oka wo’u resi tau to yusa mangkonong palaong to nawali etu. Boros ngkani i Yesu mamporentang sira, manganto’oka sira ne’e mampakarebaka, pei nempo ewa see ojo tiduga-dugang wo’u kaborosinya tau to mampakarebaka.
37 Tau etu sira ipu kojo rayanya, sira manganto’o, “Gete, samparia palaong to inikanya paka magaya kojo! Sakowa tau wongo Ia mampakatao talinganya see nadonge rao. Pasi Ia mampakatao jila ntau to matelo see gombonya masilonga.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA