Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali yako etu, dadua eowa panewa rata temponya roa to danapangangkoni nto Yahudi roti to tare raginya. Roa etu roa rapangendo temponya bue-bue nto Israel naliunaka mpomakau to mangkeni kapate tempo ia mangkita raa to rapalasika ri wombo nsira la’u tana Mesir tempo owi. Roa etu rato’oka Roa Paskah. Wali tempo etu semo kepala-kepala nto pampue pasi tau to mangampoguru porenta i Musa, sira mangaliwu jaya damangansoko i Yesu panewa damampopate yau. Wali sira manganto’o, “Wimba dataika see tau boros taa mangansani? Apa tempo si’i mosumo tempo Roa Paskah. Wali boros kojo tau siromu ri kota si’i pasi malagi sira to mampobuuka i Yesu semo Makole parajanji i mPue Allah. Wali ane tau boros etu mangansani i Yesu darapopate yau, sira damaja’a rayanya pei damangarotai kita. Wali to tao-tao peas ruyu.”
2 (14:1)
3 Wali yako etu i Yesu pasi anaguruNya yau njo’u Betania pei yau ri banua i nSimon to tempo ruyu ia masaki malobo. Wali sira mangkoni nja’u ria. Ri temponya sira mangkoni etu, ma’i samba’a tau we’a to mangkeni batoro to raika yako ri watu sanganya pualam. Batoro etu bananginya minya to magaya kojo waunya to raika yako ri kale mpinumuya sanganya narawastu. Minya etu masuli kojo olinya. Wali tau we’a etu yau ri awe i Yesu panewa ia mangampu’ak yau lasu nu batoro etu, roo see ia mangawubu minya etu ndate wawo mbo’o i Yesu.
4 Wali ojo pangkita nu yunu i Yesu palaong to naika ntau we’a etu, re’e sira to maja’a rayanya. Sira manganto’o, “Gete! Maka pei ia mangaja’at yau minya etu?
5 Apa ane minya etu pei rapobalu, olinya bae kojo. Yabi wo’u olinya yako saro ntau santo’u mapalaong! Pasi ane rapobalu, doi nu olinya etu maya rawaika yau resi tau to masiasi.” Wali tau to manganto’o gombo etu, sira mampoja’a tau we’a etu.
6 Pei tempo sira mampoja’a ia, i Yesu manganto’oka sira, “Biakmo ia mangika palaong to etu. Ne’e mampoja’a ia! Palaong to inikanya resi Aku etu si’a palaong to maja’a, palaong etu magaya kojo.
7 Monso pu’u matao seja ane mangansawang tau to masiasi, pei komi tiroo boros yoa damangansawang sira apa tau to masiasi sangkani re’e ri oyo ngkomi. Pei ane Aku, Aku taa dasingkasaenya maroo ri lino si’i sindara-ndara pei komi.
8 Wali masipato kojo palaong to naika ntau we’a si’i, apa ia re’e mangawubu minya to magaya waunya etu ri wawo mbo’ongKu apa ia mampasilonga yami korongKu darapongkeli, apa tamo masae Aku damate pasi darapongkeli yau. Wali ojo patanya palaong to etu to ia nakurang mangikaka Aku.
9 Pasi Aku manganto’oka komi, monso pu’u juku ri lino si’i bara imbare rapakarebaka kareba matao si’i, palaong to naika ntau we’a si’i darapakarebaka seja resi tau see tau taa damangkalingan ia.” Ewa wetu nato’o i Yesu manganseko tau to mampoja’a tau we’a etu.
10 Wali ojo karoonya palaong etu mawali, samba’a yako ri sampuyu pei dua to anaguru i Yesu, sanganya i Yudas Iskariot, ia yau resi kepalakepala nto pampue. Naka pei ia yau resi tau etu apa ia mansongka damamposora yau i Yesu resi sira.
11 Wali ojo pandonge nsira songka i Yudas etu, sira masanang kojo raya nsira pasi mamparajanjika damangawaika i Yudas doi. Wali yako etu i Yudas mangaliwu jaya to matao damamposora yau i Yesu.
12 Wali yako etu ratamo eo to napomula roa to danapangangkoni nto Yahudi roti to tare raginya. Ri eo etu nasambale yau nsira ana nu domba to darakoni ri Roa Paskah. Wali tempo etu anaguru i Yesu mampotanaka resi Ia, “Imbare Komi rani kami mampasigenaka Komi pangkoni to darakoni ri Roa Paskah yau wengi sire?”
13 Wali i Yesu mampokau dua mba’a anaguruNya, to’oNya, “Inta njo’u kota. Tempo komi masua ri raya ngkota etu, komi dasimparata pei tau to mamposa’a tampa nue to la’u ue ri rayanya. Wali lulu ngkai etu
14 imbare banua napasua. Wali ane jela ri banua etu, to’oka pue banua etu, ‘Guru ngkita manganto’oka kami mampotanaka bara imbare songi to danapake damangkoni ri Roa Paskah sindara-ndara pei anaguruNya?’
15 Wali tau pue banua etu damansuduka komi samba’a songi to bae. Songi etu ndate juya kadua ntampenya pasi ndatemo samparia anu to kita damampake. Wali ndate ria semo komi damampasigena pangkoni.”
16 Wali ojo karoonya i Yesu magombo, anaguruNya dua mba’a etu mayoko, yau ri kota. Rata nja’u ria, mawali samparia ewa wimba to nato’oka i Yesu sira. Wali sira dua mampasigena pangkoni ri Roa Paskah etu, panewa mawolili muni resi i Yesu.
17 Yako etu, ojo kawenginya rao, i Yesu yau sindara-ndara pei anaguruNya sampuyu pei dua mba’a.
18 Rata nja’u banua to pangampasigena nu anaguruNya pangkoni etu, panewa sira matunda mangkoni. Ri rayanya sira mangkoni i Yesu manganto’o, “Aku manganto’oka komi, monso pu’u re’e samba’a komi to mangkoni sindara-ndara pei Aku si’i, to damamposora yau Aku resi balingKu.”
19 Wali ojo pandonge nu anaguruNya gombo i Yesu etu, sira mawali mawo kojo rayanya. Pasi sira samparia samba’a pei samba’a manganto’oka Ia, “Bara si’anya aku, Pue?”
20 Wali i Yesu mangansono, “Tempo kita majonjo si’i, samba’a komi to sampuyu pei dua to mangantuika seja rotinya ri ue nu ira ngkaju si’i, tau etu semo to damamposora yau Aku.
21 Aku, Wiyaa nto Lino, Aku damate ewa to roomo rapakanasa yami ri raya ntuntu i mPue Allah. Pei tau to damamposora yau Aku, ia damasesa kojo. Wali to tao-tao ane ia taa ipoanaka.”
22 Wali yako etu, tongotongonya sira mangkoni, i Yesu mangoko roti pei manganto’oka i Pue Allah, “Tarima matao.” Roo see Ia mangampesu-mpesutimo roti etu panewa Ia mangantilaka anaguruNya. Ia manganto’o, “Oko pei koni, apa si’i korongKu.”
23 Yako etu Ia mangoko wo’u anu to nainu nsira pei manganto’oka seja i Pue Allah, “Tarima matao.” Panewa Ia mangawaika resi anaguruNya, wali sira samparia manginu.
24 I Yesu manganto’oka sira, “Anu to nuinu ngkomi si’i, si’i semo raangKu. Apa Aku damate mangkapateka to lino, wali raangKu ri tempo Aku mate etu, raangKu etu mawali tondong parajanji to bou to naika i mPue Allah resi to lino. ParajanjiNya to bou etu manganto’o boros tau daralapas dosanya.
25 Pei Aku manganto’oka yami komi, monso pu’u ane karoonya kita mangkoni nene si’i, Aku tawa damanginu wo’u muni tule anggur. Pei ri tempo to darata, tempo i Pue Allah mawali Makole ntau samparia, tempo etu Aku damanginu wo’u tule anggur to bou.”
26 Wali ojo karoonya i Yesu magombo etu, sira menyanyi sindarandara mangabarong i Pue Allah, panewa roo see sira yau ri Tongku Saitun.
27 Wali rata ri Tongku Saitun, i Yesu manganto’oka anaguruNya, Ia manganto’o, “Komi paka damampiyaika yau Aku nene si’i, apa ewa wetu semo to ratulis ri raya tuntu i mPue Allah. I Pue Allah mangaligi mangkonong Aku pasi mangkonong komi, Ia manganto’o, ‘Aku damampopate yau to pangkampang domba, panewa dombanya etu damiyai yau samba’a pei samba’a.’ Etu semo gombo to ratulis.
28 Pei nempo ewa wetu to damawali resi kita, pei yako etu Aku darawangu muni yako ri kapatengKu, panewa roo see Aku damampatiruyu pei komi yau njo’u propinsi Galilea.”
29 Wali ojo karoonya i Yesu magombo etu, i Petrus manganto’oka Ia, “Nempo samparia sa’e mampiyaika Komi, ane aku taa kojo damampiyaika.”
30 Pei i Yesu manganto’oka i Petrus, to’oNya, “Aku manganto’oka korom, monso pu’u re’e katawanya dua ngkani manu matotoro’o nene si’i, korom togo ngkanimo damamposapuka Aku.”
31 Wali i Petrus mangansono, “Gete taa! Aku nempo rapopate yau sindara-ndara pei Komi, aku taa kojo damamposapuka Komi.” Wali samparia anaguru i Yesu paka manganto’o seja ewa see.
32 Wali yako etu i Yesu pasi anaguruNya polas wo’u njo’u tampa to rasangaka Getsemani. Rata nja’u ria i Yesu manganto’oka anaguruNya, “Patunda-tundamo ruyu komi rire mangampeas Aku damakai-kai.
33 Roo see Ia yau, pei tempo Ia yau etu Ia mangansale i Petrus sira togo i Yakobus pasi i Yohanes yau mangalulu Ia. Roo see i Yesu mawali mawo pasi masusa kojo seja rayaNya.
34 Wali Ia manganto’oka sira togo, “Aku mawo kojo rayangKu si’i-si’i. Aku ewamo damate kuepe naika ngkasusa ndayangKu si’i. Wali karoomo komi togo rire pei panaa.”
35 Wali i Yesu Ia mampiyaika sira togo, Ia yau longko wo’u njo’u sangkodi. Roo see Ia mamo’o yau ri wawo ntana pei makai-kai mamporapika resi i Pue Allah ane bara re’e jaya to yusa see Ia taa damangarata kasesa.
36 Ia manganto’o, “O Baba, Komi semo Pa’angKu! Tare kesaa to taa Nukoto ngKomi mangika. Wali Kuporapika resi Komi see Komi mangalimba kasusa to daKurata si’i. Pei ne’e raluluka pamporaningKu. Biakamo pamporani ngKomi semo damawali.”
37 Wali ojo karoonya Ia makai-kai etu Ia mawolili muni resi anaguruNya togo mba’a pei mangarata sira togo tongo ngkayorenya. Wali Ia mangalike i Petrus pei manganto’oka ia, to’oNya, “Gete Simon, maka pei korom yore? Wimba, komi togo bara taa nukoto manaa nempo ojo samba’a jam?
38 Panaa pei pakai-kai see nempo ragoda, komi taa mangaluluka. Apa kamonsonya raya ngkomi rani mangewa tempo ragoda etu, pei komi taa gana karoso ndayamu damangewa.”
39 Wali ojo karoonya i Yesu mampogomboka i Petrus etu, Ia yau wo’u makai-kai kadua ngkaninya. Pei pakai-kaiNya etu sewaju ewa pakaikaiNya to uyunya.
40 Wali karoonya makai-kai, Ia mawolili wo’u muni resi anaguruNya togo mba’a etu pei Ia mangarata sira togo tongo ngkayoreNya wo’umo apa yore kojo mata nsira. Wali sira togo taa nansani bara kesaa to danato’oka nsira resi i Yesu apa mea kojo raya nsira.
41 Wali i Yesu yau muni wo’u makai-kai katogo ngkaninya. Panewa karoonya Ia makai-kai Ia mawolili muni resi anaguruNya togo mba’a. Ia manganto’oka sira, “Wimba, komi bara tiroo maturu pei yore-yore? Ganamo. Si’i-si’i ratamo temponya Aku, Wiyaa nto Lino, daraposora yaumo resi tau to madosa.
42 Wali pambangu pei yaumo kita. Apa lo’a, tau to damamposora yau Aku daratamo.” Wali sira opo yau muni resi anaguru i Yesu to wayu.
43 Wali tempo i Yesu mampogomboka anaguruNya etu, ratamo i Yudas. Ia seja samba’a anaguru i Yesu yako ri oyo nsira sampuyu pei dua. Wali ia rata sinjaya-njaya pei tau boros to mangkeni wada pasi pampomobak. Naka pei tau boros etu yau mangoko i Yesu apa napokau ngkepala-kepala nto pampue pasi tau to mampoguru porenta i Musa pasi tau tu’a nto Yahudi.
44 Wali ojo karata i Yudas to mangamposora yau i Yesu etu, ia mansaka yau mampago i Yesu pei manganto’o, “Pa’a Guru!” Panewa ia manganengu. Naka pei ia manganengu i Yesu apa tempo sira tawa rata, ia re’e manganto’oka yami tau boros etu tondong etu, to’onya, “Tau to dakunengu, Ia semo i Yesu. Sokomo Ia pei jagai kojo Ia tempo komi mangkeni.”
45 (14:44)
46 Wali ojo karoonya ia manganengu i Yesu, tau boros to mangalulu ia etu mangansoko i Yesu.
47 Pei ojo pansoko nsira i Yesu, re’e samba’a tau to nja’u ria to mangarebu wadanya panewa mangansayu yau sambali ira ntalinga nto papolaong ngkepala nto pampue to bae angganya.
48 Wali roo see i Yesu manganto’oka tau boros, to’oNya, “Maka pei komi mangangkeni wada pasi pampomobak ma’i damangansoko Aku? Wimba, komi mampobuuka Aku si’i bara tau to kara-kara?
49 Gete, ponto-ponto eo Aku mangampotundeka tau nja’u raya banua i mPue Allah, pasi komi nja’u seja tempo etu. Wali maka pei komi taa mangansoko Aku nja’u ria? Pei biakamo see tibanang gombo to natulis yami nto pantuntu tuntu i mPue Allah tempo owi.”
50 Wali ojo karoonya i Yesu magombo etu, anaguruNya miyai yau samparia mampiyaika Ia.
51 Pei re’e samba’a ngkai to mangurawa to mangalulu i Yesu. Ngkai etu pakenya ojo sanja’i kain lena raposada. Wali tau boros to nangansoko i Yesu, sira mangansoko seja ngkai etu, pei ojo pakenya sira mangkongko.
52 Wali ia ojo mangalapa yau kain to ipakenya etu pei ia lambemo miyai.
53 Wali yako etu, tau to mangansoko i Yesu etu, sira mangkeni Ia resi kepala nto pampue to bae angganya, i Kayapas. Nja’u ria nasiromumo seja songonya kepala nto pampue pasi tau tu’a nto Yahudi pasi tau to mampoguru porenta i Musa apa sira semo to biasa mangabotus tau to mangewa porenta-porenta nto Yahudi. Wali see naka i Yesu rakeni mampotango sira.
54 Pasi tempo i Yesu rakeni etu, i Petrus mangalulu Ia pei ia longko yako ri payuNya. Wali ia rata ri tango banua i ngKayapas, panewa masua ri tongonata pei matunda ri oyo nsawei mba’a to papolaong i ngKayapas etu. Wali sira samparia paka matunda-tunda ri awe nu apu maneru.
55 Wali kepala-kepala nto pampue pasi songonya to pobotus nto Yahudi, sira mangaliwu matamanasa to taa monso to damampakasala i Yesu see sira maya mampopate yau Ia. Pei sira taa mangarata.
56 Apa nempo boros tau yau ri tango nto pobotus yau manganto’o gombo to taa monso, gombo nsira mampakasala i Yesu etu taa maya rapake apa wungka yusa gombo nsira etu, see naka to pobotus etu taa mangarata sabanya damampopate yau i Yesu.
57 Wali yako etu re’e wo’u bara sawei mba’a tau to makore ri tango nto pobotus etu. Tau etu manganto’o seja anu to taa monso mangkonong i Yesu. Sira manganto’o,
58 “Kami re’e mangandonge ngkai si’i manganto’o, ‘Aku damampakaja’aka yau banua i mPue Allah to naika ntau si’i, pei ri rayanya togo mbengi Aku damangawangu muni wo’u samba’a banua to si’a naika ntau.’” Ewa wetu nato’o ntau mampakasala i Yesu.
59 Pei nempo sira mampakasala i Yesu ewa wetu, wungka yusa seja gombo nsira, see naka taa seja maya rapake.
60 Wali i Kayapas makore ri tango ntau to nasiromu etu pei ia mangampotanaka resi i Yesu, to’onya, “Wimba, Korom bara tare gombo to daNuponoto to daNuto’o mangansono gombo ntau to mampakasala Korom si’i?”
61 Pei i Yesu Ia taa mangansono. Ia ojo maroti. Wali i Kayapas mampotanaka wo’u resi Ia, to’onya, “Wimba, Korom semo i Kerisitu, Makole parajanji i mPue Allah, Ana i mPue Allah anu rabarong, bara si’a?”
62 Wali i Yesu manganto’o, “Aku semo. Pasi komi damangkita Aku, Wiyaa nto Lino, damatunda ri tampa to bae angganya ri tondo ngkana i mPue Allah anu makuasa. Pasi komi seja damangkita Aku dama’i muni ri lino si’i ri wawo limu ndate yangi.”
63 Wali ojo pangandonge i ngKayapas gombo i Yesu etu, ia masusa kojo rayanya, see naka ia mangansiat pake to si ia. Pasi ia manganto’oka tau boros, to’onya “Ia sala kojo apa Ia ojo to lino pei Ia mampoanika i mPue Allah! Kesaa taporanika wo’u matamanasa? Komi mangandongemo Ia mampoanika i Pue Allah. Wali ane pampobuuka ngkomi kesaa kita damangika resi Ia?” Wali tau boros etu mangansono, “Ia taa maya taa rapopate yau.”
64 (14:63)
65 Wali roo see re’e bara sawei mba’a tau mangerusimo i Yesu. Pasi sira mangabombong lio i Yesu panewa mangajanggur. Sira manganto’oka Ia, “To’oka kami i sema to mangajanggur Korom si’i-si’i!” Panewa tau to mangajagai, sira mangantopo Ia.
66 Wali tempo i Yesu rabotus, tempo etu i Petrus re’e maroo-roo la’u tongonata i ngKayapas. Tempo ia la’u ria, ma’i samba’a tau we’a to papolaong i ngKayapas etu.
67 Tau we’a etu mangkita i Petrus maneru, wali tau we’a etu mangalo’aka kojo ia panewa manganto’o, “Korom re’e seja sindara-ndara pei i Yesu to Nasaret etu.”
68 Pei i Petrus mansapu to nato’o ntau we’a etu. Ia manganto’o, “Gete, kesaa batuanginya korom manganto’o gombo to ewa wetu?” Wali yako etu ia yau njo’u wombo mpampa ri tongonata etu. Tempo etu semo manu laki natotoro’omo.
69 Wali roo see re’e wo’u tau we’a to mangkita i Petrus. Tau we’a etu manganto’oka tau to yusa to nja’u ria, to’onya, “Tau si’i seja samba’a anaguru i Yesu.”
70 Pei i Petrus mansapu wo’u gombo ntau we’a etu. Wali taa masae yako etu, tau to yusa to makore nja’u ria manganto’oka i Petrus, “Korom tau Galilea apa gombo ngkorom gombo ntau Galilea semo, wali monso pu’u korom samba’a anaguruNya.”
71 Wali i Petrus mamposapuka kojo, ia manganto’o, “Biakamo i Pue Allah mangahuku aku ane taa monso gombongku. Aku sumpa pei kunsani ngkai to to’o ngkomi etu!”
72 Pei ojo karoonya ia manganto’o gombo etu, manu mansaka matotoro’o wo’u kadua ngkaninya. Wali ojo pangandonge i mPetrus loo nu manu etu, ia mangendo muni gombo to i Yesu roomo manganto’oka yami ia. Gombo etu semo manganto’o, “Re’e katawanya dua ngkani manu matotoro’o nene si’i, togo ngkanimo korom damamposapuka Aku.” Wali i Petrus ngasa-ngasa tumangi mangampobuuka gombo i Yesu etu.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA