Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Inan teh dueh aco ketecan kareb nateh Irau Paska idi Irau Ruti luk Na Lamud. Idi imam-imam rayeh idi guru-guru Ukum nenakap dalan sikal ngakem Yésus dengan lulem pad ngaté Neneh.

² Kebaladeh, "Aleg ngakem Neneh kareb irau, pad na luk idi ria'."

³ Kareb Yésus déi' Batitani bang ruma' Simun luk mét susud ineh, idi uned Ieh tudo kuman, idi seburur decur nacing Neneh idi nenguit sebuleng seréi' luk panu' ku umau luk do' buen idi luk mikat rata. Idi ieh nemila' seréi' ineh, idi ieh nengutang umau ineh luun uluh Yésus.

⁴ Idi inan lemulun luk megateh nenier neneh, keburi'deh, "Anunké punneh umau luk do' buen ini uenneh nuso mo'?

⁵ Umau ini miak pisuen, idi raganeh mela teluh ngeratu rigit, idi miak barén kuan lun masi'." Idi ideh nengedaluh neneh.

⁶ Iamo' keburi' Yésus, "Nima neneh, ngudehké muyuh ngesusa' neneh? Ieh nganau' luk do' kuanKu.

⁷ Ngaceku lun masi' megéi' idi dengan muyuh, idi kudeng muyuh sikal, miak muyuh ngedengan nedeh, iamo' Ui ini na megéi' idi dengan muyuh.

⁸ Decur ini pangeh nenganau' luk miak ruenneh. Ieh nengumau bururKu, kareb nateh Ui uen nanem.

⁹ Ngerawé do'-do'! Iapeh-iapeh pana' aput-aput tana' ini Bala luk Do' ineh miak badén, su ineh teh kekamen decur ini miak tetanen teh mangun ku terawé ratnan ineh.

¹⁰ Idi Yudas Iskariot, ieh ineh seburur rat arang pulu' dueh anak sekola' ineh, iné' matun Imam Rayeh, sikal maré Yésus kuandeh.

¹¹ Idi ideh mawang niat neninger ratnan ineh. Idi ideh nepejani' maré usin kuanneh. Idi Yudas pana' nakap dalan kudeng apeh ieh miak maré Neneh bang aceh kareb luk do'.

¹² Bang aco rayeh luk pun-pun ratnan Aco Rayeh Ruti luk Na Lamud, ieh ineh kareb anak duma Paska ineh miak kereten, idi anak-anak sekola'Neh nepebala Neneh, "Iapehké luk pianMu kai amé' nganau' Irau Paska ineh kuanMu?"

¹³ Idi Ieh nengecuk dueh burur anak sekola'Neh, kebalaNeh, "Amé' medueh bang bawang, idi seburur deléi luk nguit aceh sidangur abpa' miak papu' nemedueh, idi do' amé' maya' neneh,

¹⁴ macing nan ruma' luk ulekneh. Idi do' medueh ngitun tuan ruma' ineh, 'Keburi' Guru, Iapehké takep luk inanKu miak kuman Irau Paska dengan anak-anak sekola'Ku?'

¹⁵ Idi ieh miak mada' siren medueh aceh takep luk rayeh déi' dita' luk pangeh tinina' do'-do', idi déi' do' medueh nganau' temina' kuan tau."

¹⁶ Idi anak-anak sekola' ineh iné' bang bawang idi didueh ineh nenier mepad kudeng luk bila Yésus kuan didueh; idi didueh nenganau' temina' Irau Paska ineh.

¹⁷ Idi kareb malem aco idi Yésus nacing dengan pulu' dueh anak sekola'Neh.

¹⁸ Idi uned ideh tudo kuman, idi Yésus nepebala, "Ui pebala nemuyuh, seburur rat arang muyuh luk tudo kuman denganKu sikal masui Negku."

¹⁹ Idi petacu ideh mesusa' niat idi nepebala sua-sua, "Uiké ieh?"

²⁰ Idi keburi' Yésus, Ieh seburur rat arang muyuh luk pulu' dueh, luk ngerereb ruti bang bigan pad-pad denganKu.

²¹ Anak-Lemulun amé' rungen mepad kudeng luk inayud ratnan Ieh, iamo' mesusa' kuan lemulun luk masui Anak-Lemulun. Meluun do' kuan lemulun ineh kudeng ieh na tinganak.

²² Idi uned ideh kuman, Yésus nengalap ruti idi Ieh nesembayang maré ubur, idi nemuri'-muri' ruti ineh, idi nemaré ineh kuan anak sekola'Neh, kebalaNeh, "Lapen muyuh ini idi kuman, ini bururKu."

²³ Idi Ieh nengiding aceh sangkir, idi nemaré ubur kuan Allah. Idi Ieh nemaré kuandeh teh, idi amungdeh pana' nengirup abpa' ratnan sangkir ineh.

²⁴ Idi kebala Yésus, "Ini dara'Ku, ieh ineh dara' pejani' Allah luk inutang kuan lun mula'.

²⁵ Ui pebala nemuyuh, idi na Ui miak ngirup abpa' anggur ineh pad macing aco Ui ngirup abpa' anggur luk mebaruh ineh bang Imet Allah."

²⁶ Idi ideh menani aceh nani, idi ideh iné' déi' Pegkung Saitun.

²⁷ Yésus nepebala nedeh, "Amung-amung muyuh miak buro necan Negku, ngaceku pangeh inayud, 'Allah miak ngaté Lun Matar dumba, idi amung-amung dumba luk sengeriudan ineh miak mepatad.'

²⁸ Iamo' pangeh Ui tumui ratnan até, Ui sikal amé' pa atun muyuh macing Galilia."

²⁹ Idi kebala Pétrus, "Sagan pana' amung-amungdeh necan Namu, iamo' ui na sikal necan Namu."

³⁰ Idi Yésus nepebala neneh, "Ngerawé do'-do', bang aco sini, ieh ineh kareb malem, kareb nateh lal ngekook dueh kua', iko miak ngalum Negku teluh kua'."

³¹ Idi Pétrus meluun tueh nepebala, "Sagan pana' ui maté pad-pad denganMu, na tu-tu ui miak ngalum Namu." Kudeng ini teh bala amung-amungdeh.

³² Kareb ideh nacing su luk titen Getsémani, idi Yésus nepebala kuan anak-anak sekola'Neh, "Tudo muyuh ieni laba' Ui amé' sembayang."

³³ Idi Ieh nenguit Pétrus, Yakub, idi Yahya denganNeh, idi Ieh petacu meberat niat, pad Ieh pelaba susa'.

³⁴ Idi keburi'Neh nedeh, "Mesusa' tu-tu niatKu, malé maté ayuKu, do' muyuh tudo ieni idi matar do'-do'."

³⁵ Idi Ieh nenalan pa atun sesuut, idi Ieh netekeradung idi nesembayang mutuh pad kareb ineh labén Neneh kudeng miak.

³⁶ KebalaNeh, "Ama', O Ama', luk amung-amung inan bang laludMu, idi do' ngatad sangkir ini rat Negku, iamo' ratnan ineh pana' baken maya' pian Dui, iamo' pian Diko."

³⁷ Kareb Ieh nelemubed, Ieh nenier nedeh rudap, idi kebalaNeh ni Pétrus, "O Simun, rudapké iko? Naké iko miak matar bang sejam mo' kinioneh?

³⁸ Matar idi sembayang pad muyuh na semuet bang tutun; sagan pana' niat muyuh geregan, iamo' burur muyuh melaya' peh."

³⁹ Idi Yésus iné' sembayang teh, mepad kudeng sembayangNeh luk atun.

⁴⁰ Idi Ieh nelemubed, idi Ieh nenier nedeh rudap teh, ngaceku ideh medacep mateh. Idi na ideh kali' anun luk miak beléndeh Neneh.

⁴¹ Ieh nelemubed seketeluh kua', idi kebalaNeh nedeh, "Rudapké muyuh teh idi ngato erur muyuh? Nekini pangeh petap. Karebneh pangeh nacing. Nekini Anak-Lemulun miak barén bang palad lun mesala'.

⁴² Tumui muyuh, do' tau nalan. Siruh, lemulun luk masui Negku pangeh nacing!"

⁴³ Kareb Yésus uned pebala, idi Yudas, luk rat arang pulu' dueh anak sekola' ineh, nacing dengan lun mula' luk nengimet pelapet idi rukud, ieh ineh lemulun luk icuk imam-imam rayeh idi guru-guru Ukum idi lun rayeh-rayeh teh.

⁴⁴ Idi lemulun luk nemasui Yésus ineh pangeh nemaré tanu' kuandeh, keburi'neh, "Lemulun luk ui muen, Ieh ineh Yésus. Do' muyuh ngakem Neneh idi matar Neneh do'-do'."

⁴⁵ Kareb Yudas macing idi petacu ieh iné' matun Yésus, idi kebalaneh, "O Guru," idi ieh nemuen Neneh.

⁴⁶ Idi ideh nengakem Yésus idi nengimet Neneh ét-ét.

⁴⁷ Iamo' seburur rat arang amungdeh luk tuped déi' nengangat pelapetneh, idi nenarad demulun Imam Rayeh idi nenangal lalidneh.

⁴⁸ Idi kebala Yésus nedeh, "Petuluké muyuh macing dengan pelapet idi kayuh pad ngakem Negku?

⁴⁹ Bang anid-anid aco Ui idi arang muyuh idi mada' nemuyuh bang Ruma' Allah, idi nateh muyuh nengakem Negku. Iamo' na miak na bala luk inayud bang Surat Allah uen ngacing."

⁵⁰ Idi amung anak sekola'Neh nenecan Neneh, idi neburo.

⁵¹ Idi inan seburur anak adi' luk nemaya' Yésus, luk nengayung ku kibung pu mo'. Idi ideh nenutun ngakem neneh teh.

⁵² Iamo' ieh nenecan ayungneh idi neburo dengan lubpa.

⁵³ Idi ideh nenguit Yésus amé' ruma' Imam Rayeh; idi déi' ima-imam rayeh nepamung dengan lun rayeh-rayeh idi guru-guru Ukum.

⁵⁴ Idi Pétrus nemaya' Neneh rat mado, macing bang sikang ruma' Imam Rayeh ineh, idi ieh netudo pad-pad dengan amung lun pulis, idi nesingidu.

⁵⁵ Imam-imam rayeh idi amung tebubpun besara' ineh nenakap luk nekali' lun ratnan sala' Yésus, ngaceku pian ngaté Neneh; iamo' na luk kali'deh.

⁵⁶ Ngaceku mula' lemulun mangun ku lun nekali' luk mebalih ratnan Ieh, idi luk nekali'deh ineh na petulu.

⁵⁷ Idi inan teh tuda'-tuda' lemulun luk netuped idi mebalih ratnan Yésus, keburi'deh,

⁵⁸ "Kai pangeh neninger lemulun ini pebala, 'Ui sikal ngusag Ruma' Allah ini, luk pinudut lemulun, idi bang teluh aco Ui miak mudut Ruma' Allah luk baken ruen lemulun.'"

⁵⁹ Sagan pana' kudeng ineh idi luk nekali'deh ineh na petulu.

⁶⁰ Idi Imam Rayeh ineh netuped arang uneddeh, idi nengitun Yésus, "Naké Iko ngor adu'deh amu?"

⁶¹ Iamo' Yésus pirud, idi na Ieh nengor sebila' bala pana'. Idi sekua' teh Imam Rayeh ineh nengitun Neneh, "Matuké Iko Keristus, Anak Allah luk buren ineh?"

⁶² Idi kebala Yésus, "Ui ini Ieh, idi muyuh miak nier Anak-Lemulun tudo pa tinueh Luk Meluun Lalud, idi macing dengan laput luk rat déi' langit."

⁶³ Idi Imam Rayeh ineh pana' nenarak ayungneh idi nepebala, "Na ulekneh tau nakap luk nekali' peh?

⁶⁴ Muyuh pangeh neninger kuyoNeh ineh, idi anunké terawé muyuh?" Idi ideh nemutut ukum ineh, do' Ieh pitayen.

⁶⁵ Idi ideh nengimun ngelica' Neneh, idi ideh nengakeb kiungNeh, idi nemukut Neneh, kebaladeh, "Do' Iko mada' idé luk mukut Namu!" Idi lun pulis ineh pana' nengakem Neneh Idi nemepag kiungNeh.

⁶⁶ Kareb Pétrus déi' sikang ruma' ineh, idi seburur anak adi' decur luk demulun Imam Rayeh nelemaba neneh.

⁶⁷ Kareb ieh nenier Pétrus singidu, idi ieh pana' nenutong neneh idi nepebala, "Iko ini teh luk dengan Yésus lun Nasarét ineh."

⁶⁸ Iamo' Pétrus pana' nengena idi nepebala, "Na kali'ku ilung balamu ineh." Kareb ieh neremuat iné' munung tanga', idi lal pana' nengekook.

⁶⁹ Idi anak adi' decur ineh nenier neneh teh idi nepebala nelun luk netuped déi', "Ieh ini teh seburur rat arangdeh ineh."

⁷⁰ Iamo' Pétrus nengena teh. Segageh teh idi keburi' lemulun luk tuped déi' kuan Pétrus, "Matu iko seburur rat arangdeh ineh, ngaceku iko seburur lun Galilia teh."

⁷¹ Idi Pétrus nepebulung, keburi'neh, "Na tu ui miti lemulun luk belén muyuh ineh."

⁷² Idi lal pana' petacu nengekook sekedueh kua'. Idi Pétrus pana' nengerawé ratnan bala luk bila Yésus neneh, ieh ineh, "Kareb nateh lal ngekook dueh kua', Iko miak ngalum Negku teluh kua'." Kareb ieh nengerawé ineh, idi ieh nangi'.

Markus

Video Markus 14

Ikuti Kami:

KONTAK | PARTISIPASI | DONASI