Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Rua rani lagi Rani Paskah rik Perayaan Ruti Mak Beragi. Imam-imam kepala rik guru-guru agama sedang nyepok renglaya untuk nangkok Isa secara hema-hema, rik untuk ngebunuh Ia.

² "Kidang dang ram lakuko ano pada waktu perayaan," ani tian, "mani kanah timbul keributan."

³ Waktu Isa wat di Betania, di lamban Simon sai tumbai menderita kusta, sai jelma bebai ratong jama Ia. Ia ngusung sai gudu pualam ngisi minyak rum sai mahal, disani jak bakak sai merum. Waktu Isa sedang mejong mengan, bebai udi mecohko gudu udi rik nuang minyak rum udi di atas ulu Isa.

⁴ Pira-pira jelma sai wat di dudi jadi butong rik cawa peperda tian, "Api gunani minyak rum udi diborosko?

⁵ Minyak udi dapok dijual jama rega lebih jak telu ratus duit perak, rik duitni dikeniko jama ulun mejerih!" Maka tian butong jama bebai udi.

⁶ Kidang Isa cawa, "Tagando ia! Mengapi keti nyusahko ia? Ia ngelakuko sai hal sai betik rik terpuji tehadap-Ku.

⁷ Ulun mejerih selalu wat di hantara keti. Unggal waktu kik keti haga, keti dapok nulung tian. Kidang Nyak mak selama-lamani jejama keti.

⁸ Bebai inji radu ngelakuko api sai dapok ia lakuko. Ia radu nyiapko Nyak jama minyak rum untuk penguboran-Ku semakkung waktuni.

⁹ Percayado! Di sunyinni dunia, di dipa gaoh Kabar Betik jak Allah disiarko, perbuatan bebai inji haga diceritako juga sebagai kenangan jama ia."

¹⁰ Raduni Yudas Iskariot, sai jak kerua belas jelma sai nutuk Isa, mik jama imam-imam kepala maksudni ngekhianati Isa jama tian.

¹¹ Tian senang nihan ngedengi tawaran udi, rik bejanji haga ngeni duit jama Yudas. Maka Yudas pun mulai nyepok kesempatan untuk ngekhianati Isa.

¹² Waktu rani mula-mula delom Perayaan Ruti Mak Beragi -- pada waktu ulun nikol biri-biri Paskah -- jelma-jelma sai nutuk Isa betanya jama Ia, "Di dipa Bapak mirak sekam nyiapko kanikan Paskah untuk Bapak?"

¹³ Maka Isa ngayun rua jelma jak tian, "Mikdo mik kota, di disan sai jelma bakas sedang ngusung sai kendi ngisi way, haga betungga jama keti. Tutukdo ia

¹⁴ mik lamban sai ia kuruk rik ucakko jama sekedau lamban udi, 'Bapak Guru betanya, di dipa rang Ia rik jelma-jelma sai nutuk Ia haga nganik kanikan Paskah.'

¹⁵ Ulun udi haga nunjukko jama niku sai ruangan atas sai balak. Ruangan udi radu teratur, lengkap jama perabotanni. Siapkodo sunyinni di disan untuk neram."

¹⁶ Raduni kerua jelma sai nutuk Isa udi mik kota. Di disan tian ngehalu sunyinni tepat injuk sai dicawako ulih Isa. Raduni tian pun nyediako kanikan Paskah.

¹⁷ Bingini, Isa ratong jama kerua belas jelma sai nutuk Ia.

¹⁸ Rik sementara tian mejong mengan, Isa cawa, "Dengiko: sai jak hantara keti, sai tano inji mengan jama-jama Nyak haga ngekhianati Nyak."

¹⁹ Ngedengi seno, jelma-jelma sai nutuk Isa jadi sedih nihan. Radu sai, sai jelma mulai betanya jama Isa, "Tantu lain nyak sai Bapak maksudko?"

²⁰ Isa ngejawab, "Ia salah sai jak keti rua belas inji, sai mengan sepiring jama Nyak.

²¹ Sangun Anak Manusia haga mati injuk sai tetulis delom Alkitab. Kidang hara celakani ulun sai ngekhianati Anak Manusia udi! Lebih baik untuk ulun udi kik ia mak dilaherko sama sekali!"

²² Waktu tian sedang mengan, Isa ngakuk ruti rik ngucap dua syukor jama Allah. Kak raduni Ia ngebelah-belah ruti udi jama culuk-Ni, raduni ngeniko jama jelma-jelma sai nutuk Ia sambil cawa, "Akuk rik kanikdo, inji badan-Ku."

²³ Radu jak seno Ia ngakuk sai piala anggor. Ia ngucap syukor jama Allah, raduni ngeniko piala udi jama jelma-jelma sai nutuk Ia. Kak raduni tian sunyin nginum anggor udi.

²⁴ Radu jak seno Isa cawa, "Injido rah-Ku sai ngesahko perjanjian Allah, rah sai dicurahko untuk lamon jelma.

²⁵ Percayado: Nyak mak haga nginum anggor inji lagi, sampai pada waktu Nyak nginum anggor sai ampai jejama keti di Dunia Ampai Bapa-Ku."

²⁶ Kak raduni tian nyanyiko sai nyanyian pujian. Rik radu jak seno tian mik di Bukit Zaitun.

²⁷ Kak raduni Isa cawa jama tian, "Keti sunyinni haga tegar ninggalko Nyak. Mani delom Alkitab tetulis, 'Allah haga ngebunuh gembalani, rik kumpulan biri-birini haga cerai-berai.'

²⁸ Kidang radu jak Nyak dibangkitko luot, Nyak haga mik lebih mena jak keti mik Galilea."

²⁹ "Mawat," jawab Petrus, "tagando tian sunyinni ninggalko Bapak, nyak sekali-kali mawat."

³⁰ "Ingok," ani Isa, "bingi inji juga, semakkung manuk ngakut rua kali, niku telu kali ngingkari Nyak."

³¹ Petrus ngejawab tegas, "Tagando nyak haga mati jejama jama Bapak, sekali-kali nyak mak haga cawa bahwa nyak mak mengenal Bapak!" Rik jelma-jelma sai nutuk sai bareh cawa injuk reno juga.

³² Tian sampai di suatu rang sai gelarni Getsemani, rik Isa cawa jama jelma-jelma sai nutuk Ia, "Mejongdo di dija sementara Nyak mik bedua."

³³ Raduni Isa ngurau Petrus, Yakobus, rik Yohanes mik jejama jama Ia. Ia mulai ngerasa sedih rik gelisah.

³⁴ "Hati-Ku sedih nihan," ani Isa jama tian, "rasani injuk haga mati gaoh. Tinggaldo di dija rik bejagado!"

³⁵ Isa mik lebih jaoh cutik raduni tesungkor di tanoh rik bedua. Delom dua-Ni Ia ngilu kik ngasi Ia mak ngalami saat penderitaan udi.

³⁶ "Bapa, ya Bapa," cawa-Ni, "mak ngedok sai pun sai mustahil bagi Bapa. Iwakko penderitaan inji jak Nyak-Ku. Kidang dang hak nutuk kehaga-Ku melainko kehaga-Ni Bapa."

³⁷ Radu jak seno Isa muloh rik ngehalu jelma-jelma sai nutuk Ia sedang pedom. Ia cawa jama Petrus, "Simon, pedom kedo niku? Angkah sejam gaoh, niku mak dapok bejaga-jaga?"

³⁸ Raduni Isa cawa jama tian, "Bejaga-jagado, rik beduado in keti mak ngalami cubaan. Sangun ruhmu haga ngelakuko sai benor, kidang keti mak sanggup mani tabiat manusia udi lemoh."

³⁹ Sekali lagi Isa mik bedua jama ngucapko cawa-cawa sai gegoh.

⁴⁰ Radu jak seno Ia muloh luot jama jelma-jelma sai nutuk Ia rik ngehalu tian masih juga pedom, mani tian tegedugok nihan. Maka tian mak pandai api sai haga tian ucakko jama Isa.

⁴¹ Waktu Isa muloh jama tian untuk ketelu kalini, Ia cawa, "Masih kedo keti pedom rik istirahat? Cukupdo! Radu sampai waktuni Anak Manusia diserahko mik culuk ulun-ulun bedusa.

⁴² Minjakdo, ija ram mik. Liak! Ulun sai ngekhianati Nyak radu ratong!"

⁴³ Sementara Isa masih ngicik-ngicik, ratongdo Yudas, sai jak kerua belas jelma sai nutuk Ia ano. Jejama jama ia ratong juga lamon jelma sai ngusung pedang rik pentungan. Tian diutus ulih imam-imam kepala, guru-guru agama rik jelma-jelma sai mimpin Yahudi.

⁴⁴ Si pengkhianat radu nantuko suatu tanda bagi tian. "Ulun sai kusium," cawani jama tian, "Iado jelmani. Tangkok Ia rik usung Ia jama penjagaan sai ketat."

⁴⁵ Pada waktu Yudas ratong, ia langsung mik jama Isa rik cawa, "Bapak Guru!" kak raduni ia nyium Isa.

⁴⁶ Raduni ulun-ulun sai ratong jejama jama Yudas ano nangkok Isa rik ngikok culuk-Ni.

⁴⁷ Kidang salah sai sai wat di dudi nyabut pedangni rik melok hamba imam agung sampai putus cupingni.

⁴⁸ Raduni Isa cawa jama tian, "Api Nyak inji penjahat, sampai keti ratong jama pedang rik pentungan untuk nangkok Nyak?

⁴⁹ Unggal rani Nyak ngajar di Lamban Ibadah di hadap keti, rik keti mak nangkok Nyak. Kidang sangun radu seharusni injuk reno, in tejadi api sai tetulis delom Alkitab."

⁵⁰ Sunyin jelma-jelma sai nutuk Ia tegar ninggalko Isa.

⁵¹ Sai jelma ngura, sai angkah makai sehelai injang untuk nyalok badanni, nutuk Isa. Ulun-ulun haga nangkokni,

⁵² kidang ia ngelepasko injangni ano, raduni tegar riluk.

⁵³ Isa diusung mik lamban imam agung. Di disan sunyin imam kepala, jelma sai mimpin Yahudi, rik guru agama sedang bekumpul.

⁵⁴ Petrus nutuk Isa jak jaoh sampai kuruk mik delom tengebah lamban imam agung. Di disan ia mejong manasko badan redik apui jejama jama pengawal-pengawal.

⁵⁵ Imam-imam kepala rik segenap Mahkamah Agama berusaha ngedapokko bukti-bukti sai nyalahko Isa in dapok ngejatuhko hukuman mati atas-Ni. Kidang tian mak mansa sai bukti pun.

⁵⁶ Lamon saksi sai diurau untuk ngeni kesaksian palsu tehadap Isa, kidang kesaksian tian betentangan peperda tian.

⁵⁷ Raduni pira-pira saksi cecok rik ngeni kesaksian palsu tehadap Isa,

⁵⁸ "Sekam ngedengi ulun inji cawa, 'Nyak haga ngerubuhko Lamban Ibadah inji sai disani ulih manusia, rik telu rani jak seno, Nyak haga ngebangun sai bareh sai lain hak sai disani manusia.'"

⁵⁹ Kidang kesaksian ulun-ulun udi pun betentangan peperda tian.

⁶⁰ Maka imam agung cecok di hadap tian sunyinni rik betanya jama Isa, "Api Niku mak ngejawab tuduhan sai ditujuko jama Niku?"

⁶¹ Kidang Isa hema gaoh. Ia mak ngejawab sama sekali. Raduni imam agung udi betanya jama Ia, "Api Niku Raja Penyelamat, Anak Allah Mahakudus?"

⁶² "Nyakdo Ia," jawab Isa, "rik keti sunyinni haga ngeliak Anak Manusia mejong di kebelah kanan Allah Sai Mahakuasa rik ratong delom awan jak langit!"

⁶³ Maka imam agung nyabik-nyabikko kawaini rik cawa, "Mak perlu lagi saksi!

⁶⁴ Keti radu ngedengi tenggalan cawa-cawa-Ni sai ngehina Allah. Tano api keputusanmu?" Tian sunyinni memutusko bahwa Isa besalah, rik patut dihukum mati.

⁶⁵ Raduni pira-pira jelma mulai ngelui Isa, rik tian nyalok mata-Ni rik mukul Ia, raduni cawa, "Cuba tekok, sapa sai mukul Niku?" Pengawal-pengawal juga nutuk nampar Isa.

⁶⁶ Sementara Petrus masih wat di tengebah, salah sai bebai sai ngelayani jak imam agung ratong mik disan.

⁶⁷ Waktu ngeliak Petrus manasko badanni di redik apui, ia ngeperhatiko betik-betik pudak Petrus rik cawa, "Kan niku juga jejama Isa ulun Nazaret udi?"

⁶⁸ Kidang Petrus nyangkal, "Nyak mak pandai rik mak ngerti api maksudmu," cawani jama jelma sai ngelayani udi. Raduni Petrus mik rangok gerbang lamban imam agung udi. [Waktu seno juga, manuk ngakut.]

⁶⁹ Bebai sai ngelayani udi ngeliak Petrus luot, rik cawa muneh jama ulun-ulun di dudi, "Ia sangun salah sai jak tian!"

⁷⁰ Kidang Petrus nyangkal luot. Mak mesaka jak seno, ulun-ulun di dudi cawa luot jama Petrus, "Mak dapok disangkal lagi niku sangun salah sai jak tian, mani niku jak Galilea!"

⁷¹ Raduni Petrus mulai nyumpah-nyumpah rik cawa, "Nyak mak kenal ulun sai keti maksudko ano!"

⁷² Waktu seno juga manuk ngakut untuk kerua kalini. Rik Petrus ingok bahwa Isa radu cawa jama ia, "Semakkung manuk ngakut rua kali, niku telu kali ngingkari Nyak." Maka Petrus pun miwang tesedu-sedu.

Markus

Video Markus 14

Ikuti Kami:

KONTAK | PARTISIPASI | DONASI